Okotova
Sa Vakarautaki Tu me Noda na Veivakalougatataki ni Matabete
“Ia ko ira sa vakabauta na ilesilesi vakabete oqo, era sa vakabauti au, sa kaya na Turaga” (V&V 84:35).
Kuria ki na veivakasama oqo na nomu o sa vakarautaka. Ena veimacawa, mo tuvanaka na sala me (1) kilai na vunau, (2) vukei ira na gone mera kila vakavinaka, ka (3) vukei ira mera bulataka ena nodra bula. Tarogi iko, “Na cava me ra cakava na gone me ra vuli kina, kei na sala cava meu vukei ira kina me ra vakila na Yalotabu?”
iMatai ni Macawa: Era na ciqoma na matabete na cauravou bula kilikili ni ra sa yabaki 12.
Me kilai na vunau (raici ni dua na iyaloyalo): Vakaraitaka vei ira na gone e dua na iyaloyalo i Jisu Karisito ni qarava tiko na sakaramede. Vakamacalataka ni a solia na sakaramede o Karisito vei ira na Nona iApositolo kei ira na Nona tisaipeli ena iVola i Momani, ka kerea me ratou tomana tikoga na kena masulaki ka votai tiko na sakaramede ena gauna sa lesu kina o Koya. Me wiliki vata 3 Nifai 18:5–6. Tarogi ira vakaoqo na gone: O cei era masulaka tiko na sakaramede ena gauna oqo? O cei e vota yani na sakaramede? Na kaukauwa cava e dodonu me tiko vei koya e masulaka ka vota na sakaramede?
Vakauqeta me kilai vakavinaka (veivosakitaki ni vunau): Vakamacalataka ni matabete sa kaukauwa ni Kalou mera qaravi ka vakalougatataki kina na tamata e vuravura. Ena iotioti ni gauna oqo sa vakavulica vei keda na Karisito ni sa rawa vua e dua ga na tagane me taura na matabete ena rua ga na sala. Me tiko ena kena yabaki ni bula. Kerei ira na gone mera tucake ena gauna era rogoca ni ko cavuta na yabaki ni bula ena ciqoma kina e dua na cauravou na matabete. Wiliwili vakamalua me yacova na tinikarua. Tukuna vei ira na gone ni ikarua ni sala o ya me bula kilikili o cauravou. Vakamacalataka na ibalebale ni bula kilikili, ka vakamacalataka ni sa rawa vei ira na cauravou kei na goneyalewa mera vakayagataka na “My Gospel Standards” me vukea na nodra kila na sala mera bula kilikili kina.
Vakauqeta mera vakayacora (vakaitavi ena itaviqaravi vakayago): Wasei ira vakailawalawa na gone. Lesia e dua na ivakatagedegede mai na “My Gospel Standards” ki na ilawalawa yadua. Kerei ira na ilawalawa yadua mera vakasamataka mada e dua na ivakaraitaki rawarawa e tukuna tiko na nodra ivakatagedegede o ya. Cavuta e vica na vosa me vakatakilakilataka na ivakatagedegede o ya, mera qai tucake na ilawalawa o ya mera matanataka. Vakayacora me yacova ni ra sa vakaitavi na ilawalawa taucoko. Vakamacalataka ni bulataki na ivakatagedegede oqo ena vukea mera bula kilikili tikoga kina na cauravou ena nodra matabete ka ciqoma na cakacakatabu vakalotu ni matabete ka ra bula kilikili tiko na goneyalewa mera ciqoma na cakacakatabu vakalotu ni matabete, me vakataka na papitaiso kei na cakacakatabu vakalotu ni valetabu.
iKarua ni Macawa: Eda sa ciqoma na cakacakatabu vakalotu ni veivakabulai ni matabete.
Sa rawa me vakayagataki na lesoni ivakaraitaki me taleitaki kina, mera vakarorogo matua mai na gone, se vakatakilaitaki e dua na ivakavuvuli ni kosipeli.
Me kilai na vunau (raici e dua na lesoni ivakaraitaki): Me taura e dua na gone e dua na iviu dumu. Mera mai vakaruru kina eso na gone. Vakatauvatataka na iviu oqo ki na matabete. Vakamatatataka ni sa tau na uca, o ira kece na gone era vakaruru tiko o ya era na vakalougatataki mera mamaca tiko, sega ni o koya walega e taura tiko na iviu. Sa vakakina, ni sa mai vakarautaka na Kalou, ena Nona matabete, na sala mera vakalougatataki kina o ira kece na Luvena. Mai na matabete eda sa ciqoma kina na cakacakatabu vakalotu ni veivakabulai me rawa ni da lesu ka laki bula vata tale kei na Kalou.
Vakauqeta me kilai vakavinaka (cokotivata tale ni iba): Vola na veika yadua oqo ki na tiki ni pepa yadua: papitaiso, vakadeitaki, soli ni matabete (tagane walega), edaumeni ni valetabu, kei na veivauci ena valetabu. Kotiva na veitiki ni pepa yadua oqo me tiki ni iba. Vakamacalataka vakalekaleka vei ira na gone na cava na cakacakatabu vakalotu (e dua na cakacaka tabu se veiqaravi e vakayalo na kena ibalebale), ka tukuna vei ira na gone ni so na cakacakatabu vakalotu ni matabete sa veivakarautaki meda lesu ka laki bula vata tale kei na Tamada Vakalomalagi. Droinitaka e va na ikabakaba ena papanivolavola, ka biuta toka e dua na iyaloyalo i Jisu Karisito ena ikabakaba e cake. Wasei ira na gone ki na lima na ilawalawa, ka solia vei ira e yadua na tiki ni pepa iba o a cakava. Kerei ira mera tuvanaka lesu na nodra iba ka wasea na veika era kila baleta na cakacakatabu vei ira na vo ni Lalai. Mera qai laki vakabira na ilawalawa na nodra iba sa tuvani donu oti ena ikabakaba ena papanivolavola.
iKatolu ni Macawa: Au sa rawa ni ciqoma na kaukauwa veivaqaqacotaki mai na veivakalougatataki ni matabete.
Me kilai na vunau (veivosakitaki ni vunau): Kerei ira na gone mera laveta na ligadra ka raica mada. Tarogi ira ena sala sa vukei ira tiko kina na ligadra mera qito, cakacaka, ka vakavakarau ki lotu. Sureti ira mera matanataka na isau ni taro yadua. Ka qai tarogi ira ena sala cava era dau vakayagataka kina na tamata na ligadra mera veivuke kina. Vakamacalataka ni sa rawa vei ira na lewe ni matabete mera vakayagataka na ligadra mera soli veivakalougatataki e dau vukei keda ka veivaqaqacotaki.
Vakauqeta me kilai vakavinaka ka mera vakayacora (raici ni iyaloyalo ka wasea na veika e sotavi): Vakabira wavoki e loma ni rumu na iyaloyalo ni sakaramede, papitaiso, veivakadeitaki, masulaki ni dua na gonelailai, kei na nodra masulaki na tauvimate, ka vakamacalataka na veika e yaco tiko ena iyaloyalo yadua. Sureti ira na gone mera vakatotomuria na ligadra ruarua ena dua na pepa ka kotiva laivi mai. Mera qai vola na yacadra ena matani liga yadua oqori. Sureti ira mera tepitaka e dua vei ira na liga pepa oqo me volekata e dua na iyaloyalo e vakaraitaka tiko e dua na veimasulaki se cakacakatabu vakalotu era a ciqoma mai na liga ni dua na lewe ni matabete. Digitaka eso na liga, ka sureti iratou na gone mera wasea na nodratou nanuma baleta na kena sa vakalougatataka ka vaqaqacotaki iratou kina na matabete. Tukuna vei ira na gone na italanoa ni Nona vakalougatataki ira tiko na gone o Jisu ena 3 Nifai 17:11–25. Biuta e dua na iyaloyalo i Jisu kei ira na gone e mua e liu ni rumu, ka sureti ira yadua na gone mera laki vakabira na ikarua ni ligadra pepa e yasa ni iyaloyalo. Vakamacalataka ni sa tiko vei ira na lewe ni matabete na kaukauwa mera cakacaka ena yaca i Jisu Karisito, ka sa rawa mera vakalougatataki keda, me vaka ga ena vakayacora o Jisu ke tiko oqo o Koya.
Ni ra vukei na gone mera gugumatua ena vakaitavi ena lesoni ena vukea mera na tugana ki lomadra na vunau e vakavulici tiko.
iKava ni Macawa: Au na gole ki valetabu meu laki ciqoma na cakacakatabu vakalotu baleti ira na noqu qase e liu niu sa qase mai.
Me kilai na vunau ka vakauqeta me kilai vakavinaka (rokarokataki): Vakavotuya vei ira na gone ni sa gadrevi sara meda ciqoma na veicakacakatabu vakalotu eso ni bera na noda lesu meda laki bula vata kei na Tamada Vakalomalagi. Kerei ira mera tukuna mai eso na cakacakatabu vakalotu oqori. Vakamacalataka ni vuqa sara era sa mate yani era a sega ni ciqoma na cakacakatabu vakalotu oqo, ka ra sa gadreva dina na noda veivuke. Tukuna vei ira na gone e dua vei ira na nomu qase e liu a mate ni bera ni ciqoma na cakacakatabu vakalotu oqo. Mera yadua na gone e dua na pepa koti e ivakatakarakara ni tamata. Kerei ira mera droinitaki ira ena dua na yasana ni pepa oqo kei na droini nei koya na qase e liu ko sa vakamacalataka vei ira, ena yasana kadua. (Kevaka era kila tiko na gone e dua vei ira na nodra qase e liu a mate ka sega ni se ciqoma na cakacakatabu vakalotu ni matabete, sa rawa mera droinitaki koya.) Mera na cavuta na itoko ni macawa oqo ni ra taura tu na nodra pepa tamata e matadra. Kerei ira mera vakaraitaka mai na kedra iyaloyalo ni ra kaya mai “O au” kei na iyaloyalo i qase e liu ni ra kaya mai “qase e liu.”