Noveba
Au sa Rawa ni Digitaka Meu Daukaulotu ena Gauna Oqo
“A sa kaya vei ira, Dou lako yani ki vuravura taucoko, ka vunautaka na itukutuku vinaka kivei ira na tamata kecega” (Marika16:15).
Kuria ki na veivakasama oqo na nomu o sa vakarautaka. Ena veimacawa, mo tuvanaka na sala me (1) kilai na vunau, (2) vukei ira na gone mera kila vakavinaka, ka (3) vukei ira mera bulataka ena nodra bula. Tarogi iko, “Na cava me ra cakava na gone me ra vuli kina, kei na sala cava meu vukei ira kina me ra vakila na Yalotabu?”
iMatai ni Macawa: Au sa rawa ni dua na daukaulotu niu qaravi ira tale eso.
Vakauqeta me kilai vakavinaka (ena vakatasuasua): Wilika na Maciu 25:34–40, ka vakamacalataka ni gauna eda qaravi ira kina na tamata eda sa qarava tale tikoga kina na Tamada Vakalomalagi (raica na Mosaia 2:17) ka na kauta mai na marau na veiqaravi oqo ka vukei keda meda rawa ni laki bula vata tale kei na Kalou. Mera vakatasuasuataka mada eso na gone eso na veiqaravi, me vakataka na vakani ira era viakana tu, vakaitokani kei koya e galili, se sikova e dua na tauvimate. Mera qai vakilakila na gone se cava e vakayacori tiko ena vakatasuasua yadua. Vakaraitaka e dua na kedrau iyaloyalo na daukaulotu. Taroga na sala cava era sa qarava tiko kina na Kalou na daukaulotu. Vakamacalataka ni da qaravi ira na tamata eda sa daukaulotu talega.
Vakauqeta mera vakayacora (vakayacori e dua na qito): Cakava e dua na tere ni qito ka volai tu kina e dua na sala e ono na kena veimataqali roka ka mua tiko ki na iyaloyalo i Jisu. Cakava e dua na idusidusi cowiri e tiko kina e ono na roka a tautauvata kei na kena e tiko ena tere ni qito. Ena roka yadua oqo me volai kina na yaca ni tamata mera na laki veiqaravi kina na gone, me vakataka e dua na itubutubu, itokani, kei na dua na neiba. Digitaka e dua na gone me cowiritaka na idusidusi cowiri ka me tukuna na sala mena laki qarava kina na tamata sa dusi o ya. Me qai tosoya sara o gone ki na sukuwea e tarava e tautauvata na roka mai na idusidusi. Vakayacora vei ira na vo ni gone me yacova ni sa yaco sara na qito ki na iyaloyalo ni iVakabula. Tokaruataka vei ira na gone ni gauna eda qaravi ira kina na tani, eda sa qarava tiko na Kalou. Me lagati “When We’re Helping” (CS, 198).
Sa vakarautaki tu na tere ni qito kei na idusidusi cowiri ena sharingtime.lds.org
iKarua ni Macawa: Au sa rawa ni daukaulotu niu sa ivakaraitaki vinaka.
Me kilai na vunau (ena raici ni dua na lesoni ivakaraitaki): Ni bera ni tekivu na Lalai, tara e dua na ituvaki vakavale ena buloko lalai, ka ubia mera kua ni raica na gone. (Ke sega na buloko, sa rawa mo droinitaka ena papanivolavola ka tabonaka ena dua na pepa.) Vakamacalataka na ituvaki vakavale o ya kei na nomu a tara vakacava. Ka solia eso na buloko vei ira eso na gone ka kerei ira mera saga mera tara e dua na ituvaki vakavale e tautauvata kei na nomu o tara. Ni ra sa tara oti, cereka na nomu, ka me raici na kedrau duidui. Kerei ira na gone mera tara tale na nodra vale ka vakatotomuria tiko na nomu. Vakamacalataka ni na rawarawa sara e vuqa na ka ni da vakamuria na kena ivakaraitaki.
Vakayagataka na veimadigi yadua mo vakauqeti ira kina na gone mera dau vakasama. Ena vakatorocaketaki na vuli ni ko bolea na nodra vakasama ena veimataqali taro e veiganiti ki na yabaki ni bula se ituvaki.
Vakauqeta me kilai vakavinaka ka mera vakayacora (rogo italanoa kei na lagasere): Biuta wavoki na iyaloyalo eso ka tukuna vakalekaleka e vica na italanoa mai na ivolanikalou baleta na nodra ivakaraitaki vinaka eso na tamata gone (me vakataki, Taniela kei iratou na nona itokani ena nodratou sega ni via gunuva na mena waini ni tui [raica na Taniela 1:5–16]; Setareki, Mesaki, kei Apetiniko [raica na Taniela 3:4–29]; kei Taniela ena qara ni laione [raica na Taniela 6]). Vakaraitaka na kedrau iyaloyalo na daukaulotu, ka tarogi ira na gone na sala cava era sa ivakaraitaki vinaka kina na daukaulotu. Vakamacalataka ni gauna eda ivakaraitaki vinaka kina, eda sa yaco meda daukaulotu baleta na noda ivakaraitaki ena vukei ira na tamata mera gadreva cake na vulici Jisu Karisito. Wasea na gauna eso o a raici ira kina na gone ena nomu tabanalevu se tabana era a ivakaraitaki vinaka.
Kerei ira na gone mera lagata na “Shine On” (CS, 144). Ni ra lagasere tiko, mera qai solia wavoki tiko e dua na matanisiga e caka mai na dua na tiki ni pepa. Ni gauna e tarovi kina na lagasere, kerei koya na gone sa taura tu na matanisiga me tukuna e dua na sala e rawa ni ivakaraitaki vinaka kina (me vakataka, me daulomasoli, tukuna na ka dina, se sureti ira mai na itokani ki na Lalai).
Sureti ira yadua na gone mera dui cakava ga na nodra pepa matanisiga ka me volai toka kina “Au sa Rawa ni iVakaraitaki Ramase.” Mera qai laveta cake na gone na nodra matanisiga ka lagata “I Am like a Star” (CS, 163), “Jesus Wants Me for a Sunbeam” (CS, 60–61), se “Shine On” (CS, 144).
iKatolu ni Macawa: Au sa rawa ni vakavulica vei ira na noqu itokani na veika me baleti Jisu Karisito kei na Nona Lotu.
Me kilai na vunau (raici ni dua na ivakaraitaki): Lululu ki na vica na gone ka vakatasuasuataka ni ko sa sureti ira tiko mai ki na Lalai mera vulica na veika baleti Jisu. Vakasalataki ira era sa sureti mai mera sureti ira tale eso me yacova ni ra sa sureti taucoko na gone. Vakamacalataka ni sa gadreva sara na Turaga meda daukaulotu kece sara ena noda vakavulici ira na noda itokani baleti Jisu Karisito kei na Nona Lotu.
Vakauqeta me kilai vakavinaka (rogo italanoa): Wasea na italanoa i Peresitedi Spencer W. Kimball baleta e dua na cauravou ni Lalai e a daukaulotu vinaka sara: E dua na tagane a tarogi cauravou oqo ena sitima ni vanua baleta na Lotu Momani. A cavuta kece sara o cauravou oqo na Yavu ni Vakabauta. A kurabui vakalevu na tagane oqo ni sa kila tu o cauravou oqo na veika e vakabauta ka gole sara yani ki Salt Lake City me laki vulica vakavinaka sara na Lotu (raica na Conference Report, Oct. 1975, 117–19; se Ensign, Nov. 1975, 77–79). Vakamacalataka ni noda vulica na Yavu ni Vakabauta ena rawa me vukei keda meda sa daukaulotu ena gauna oqo.
Vakauqeta mera vakayacora (ena raicilesu ni Yavu ni Vakabauta): Vakarautaka e 13 na tiki ni pepa ka nabataka mai na 1 ki na 13. Wasei ira vakailawalawa na gone. Mera qai digitaka na ilawalawa yadua na nodra tikini pepa ka mera cakacaka vata mera vulica na yavu ni vakabauta e sema ki na naba o ya. Ni ra sa vakarau tu na ilawalawa yadua, mera qai cavuta kivei ira na vo ni gone ka taura e dua tale na pepa. Tomana tiko ke vo na gauna.
iKava ni Macawa: Au sa rawa ni vakarautaki au oqo meu daukaulotu.
Me kilai na vunau (raici ni iyaya e veiwekani tiko ki na cakacaka ni kaulotu): Vakarautaka e dua na taga lailai se beqi era tiko kina na iyaya era dau vakayagataka na daukaulotu tudei, me vakataka na ivava ni Siga Tabu, e dua na neketai, kei na ivolanikalou. Sureta e vica na gone mera tara mai na iyaya oqo mai na beqi ka vakaraitaka kivei ira na gone. Tarogi ira na gone na vuna e sega ni yaco kina e dua me sa laki daukaulotu ni sa tu vua na iyaya kece oqo. Wilika na Vunau kei na Veiyalayalati 84:62, ka sureti ira na gone mera vakarogoca e dua tale na ka e gadrevi me tiko vei ira na daukaulotu yadua (ivakadinadina). Vakadinadinataka na bibi ni tiko ni ivakadinadina yadua.
Tuvanaka na sala eso mo vagolei ira mai me ra vakarorogo ena itekivu ni itaviqaravi. Me vakataka, era na taleitaka na gone na itaviqaravi oqo ni ra vakilakila na cava era na tara mai na beqi.
Vakauqeta me kilai vakavinaka (sara iyaloyalo kei na saumi taro): Vukei ira na gone mera kila vakavinaka na veigacagaca bibi ni dua na ivakadinadina. Vakaraitaka na iyaloyalo eso e tukuna tiko na veigacagaca oqori (me vakataka, ni sa daulomani keda na Tamada Vakalomalagi, ni o Jisu Karisito sa noda iVakabula, ni sa parofita o Josefa Simici, ni Lotu i Jisu Karisito ni Yalododonu Edaidai sa Lotu dina ni Turaga, ka sa liutaki keda tiko e dua na parofita bula). Taroga eso na ka baleta na iyaloyalo yadua, me vakataka: Na cava se o cei oqo? Na cava o kila baleta na ka oqo? Mo na vaqaqacotaka vakacava na nomu ivakadinadina baleta na ka oqo? Kerei ira na gone mera tukuna mai na yacadra na tamata era na laki wasea kina na nodra ivakadinadina. Vakadinadinataka ni gauna era wasea kina na gone na veika era kila tu vei ira na tamata, ena tubu na nodra ivakadinadina ka ra sa vakarautaki ira mera laki kaulotu.