Julai
Au sa Digitaka tiko na Dodonu Ena Noqu Bulataka na iVakavuvuli ni Kosipeli
“Ia me datou yalodina ka kitaka na ka sa vakarota na Turaga” (1 Nifai 3:16).
Sere: “The Wise Man and the Foolish Man”
(CS, 281) se dua tale na sere mo digia mai na Children’s Songbook
Kuria ki na veivakasama oqo na nomu o sa vakarautaka. Ena veimacawa, mo tuvanaka na sala me (1) kilai na vunau, (2) vukei ira na gone mera kila vakavinaka, ka (3) vukei ira mera bulataka ena nodra bula. Tarogi iko, “Na cava me ra cakava na gone me ra vuli kina, kei na sala cava meu vukei ira kina me ra vakila na Yalotabu?”
iMatai ni Macawa: Ena vakaqaqacotaki na noqu ivakadinadina niu lolo ka masumasu.
Me kilai na vunau (raici tiko e dua na lesoni ivakaraitaki): Vakarautaka e rua na tikini pepa ni vosa: Lolo kei na Masumasu. Sureta e rua na gone me rau tucake vata tu, ka me rau yadua na tikini pepa ni vosa. Me qai takoso ena kedrau maliwa e dua tale na gone. Kerei rau na gone o ya me rau sa veitauri liga vakaukauwa, ka kerei koya tale na gone o ya me takosova na kedrau maliwa. Vakamatatataka ni ra na kaukauwa cake na gone ni ra sa semati vata. Vakamacalataka ni na kaukauwa cake sara na lolo kei na masumasu ni da vakayagataki rau vata. Vola ena papanivolavola ka mera cavuta vata na gone “Niu lolo ka masumasu ena vaqaqacotaki na noqu ivakadinadina.”
Sa vakarautaki tu na tikinipepa ni vosa ena sharingtime.lds.org
Vakauqeta me kilai vakavinaka (ena vakarorogo ki na ivolanikalou ka vakaitavi ena lesoni ivakaraitaki): Kerei ira na gone mera vakarogoca na veika e ratou a cakava na luvei Mosaia me ratou kaukauwa kina ena kosipeli ni ko wilika na Alama 17:2–3. Sureti ira na gone mera vakaukauwataka na yagodra ena gauna era rogoca kina e dua na ka e ratou a vukei kina na luvei Mosaia me ratou kaukauwa.
Mo liutaka na kena veivosakitaki na lolo ena nomu taroga vakaoqo “Na cava na lolo?” “Na cava na vuna meda lolo kina?” “Ena gauna cava meda lolo kina?” kei “Na cava na vuna meda masumasu kina ni da lolo tiko?” (raica na Joseph B. Wirthlin, “The Law of the Fast,” Ensign, May 2001, 73–75). O ira yadua na gone era soli vakasama ki na veivosaki oqo me qai taura e dua na mua ni wa. Mo taura o iko na muana kadua. Ni sa oti na veivosaki, kerei ira na gone era taura tu na wa mera gole mai ki na loma ni rumu ka talia vata na nodra wa, me dua kina na dali kaukauwa. Vakamacalataka ni wa kece era sema mai ki na dali ena vakaukauwataka cake na dali. Vukei ira na gone mera kila vakavinaka ni vakasama oqo, sa tautauvata ki na gauna yadua eda lolo ka masumasu kina ena vaqaqacotaki cake na noda ivakadinadina.
Na ivakaraitaki me matanataki ena vukei ira na gone mera kila vakavinaka na veivakasama e cavuti vakavosa.
iKarua ni Macawa: Na yalovinaka o ya meda cakava ka cavuta na veika vinaka vei ira na tamata.
Me kilai na vunau (cavuqaqataki e dua na ivolanikalou): Vola ena papanivolavola “Ia [mo] dou veilomani vakai kemudou” (Efeso 4:32) ka vola na naba 1 ki na 6 ena botoni vosa yadua. Lesi ira na gone yadua ki na naba 1 ki na 6. Me tekivu vei ira era sa lesi ki na naba 1 mera tucake ka kaya “Ia” mera qai dabe sara vakatotolo. Mera qai tucake o ira na naba 2 ka kaya “mo” ka dabe sara vakatotolo. Me qai vakayacori ki na vo ni vosa. Me vakayacori vakavica vata. Ni oti mera qai cavuta vata kece na malanivosa o ya.
Vakauqeta me kilai vakavinaka (ena vakarorogo italanoa ka lagasere tiko): Tukuna vei ira na gone e dua na italanoa baleta na yalovinaka, me vakataka na “Standing Up for Caleb” (Friend, Mar. 2009, 4–5). Kerei ira mera dusi cake ena nodra iqaqalo levu ni ra rogoca e dua na cakacaka ni yalovinaka ena italanoa ka dusi sobu vakakina ni ra rogoca e dua na cakacaka ca. Me lagati na “Lomaqu Noqu I Gu” (CS, 63). Kerei ira na gone mera tucake ni ra lagata o cei meda na caka vinaka vei ira. Me lagati tale na sere, ka mera dusi ira ena nodra iqaqalo levu ni ra lagata, “Lomaqu noqu i gu.”
Na nodra vakayagataki na gone ena ivakaraitaki me matanataki, era sa vakaitavitaki tiko kina, ka na vukea talega mera na taleitaka mai na vo ni gone.
Vakauqeta mera vakayacora (wasei na sala eso ni caka vinaka): Vakaraitaki ira eso na tamata e umani ena nodra bula na gone (me vakataki tama, tina, ganena, tacina, tukana, itokani, se qasenivuli) ena dua na tikini pepa ni vosa, iyaloyalo, se dua na ivakaraitaki rawarawa ga (me vakataka e dua na neketai nei tama se ititoko nei tukadra). Solia na iyaya oqo ki na vica na gone, ka sureti ira mera gole mai liu. Mera qai tukuna yadua na gone na veika vinaka se rawa ni cakava vua na tamata e vakatakarakarataki tiko ena iyaya era taura tiko. Sa oti mera qai solia na nodra tikini pepa ni vosa, iyaloyalo, se ivakaraitaki ki na so tale na gone. Vakayacori tale ke balavu na gauna.
iKatolu ni Macawa: Na vakarokoroko sai koya na noda doka ka lomana vakalevu tiko na Kalou.
Me kilai na vunau (lagati e dua na sere): Vakarautaka eso na itaube wa ka me lili tiko kina e dua na uto pepa. Vola ki na uto yadua oqo e dua na vosa bibi se malanivosa mai na “Reverence Is Love” (CS, 31) me (kena ivakaraitaki, dabe vakanomodi, vakanananu, vakila, kei na so tale). Sureta eso na gone mera dara na itaube oqo. Me lagati na “Reverence Is Love,” ka kerei ira na gone era sa vakaitaube tiko mera gole mai ki liu ena vakarokoroko ena gauna sa lagati kina na vosa e tiko ena nodra uto. Sureti ira na gone vakaitaube mera tucake vakaituvatuva donu, ka me lagati tale na sere.
Sa vakarautaki tu na uto ena sharingtime.lds.org
Vakauqeta mera vakayacora (veivosakitaka na vakarokoroko): Vakarautaka eso na tikini pepa ni vosa se droinitaka eso na yaloka ni mata, liga, yava, daliga, kei na vakasama. Wasei ira vakailawalawa na gone, mera qai digitaka e dua se rua na nodra tikini pepa ni vosa se iyaloyalo. Mera qai wasea na ilawalawa yadua (ena vosa ka matanataka) eso na sala e rawa ni vakarokoroko kina na tiki ni yagodra oqo me ivakaraitaki ni ra sa doka ka lomana tiko na Kalou.
Sa vakarautaki tu na iyaloyalo ena sharingtime.lds.org
iKava ni Macawa: Na dina sai koya na noda tukuna na ka dina se cava ga na kena isau.
Vakauqeta me kilai vakavinaka (veivosakitaki na isau ni ivalavala): Vakarautaka eso na kisi dikevi (raica na VMLB, 207–08) ena nodra dau sotava na gone na digidigi mera na dina se lawaki kina. Me kena ivakaraitaki, “O a sabaki tacimu, ka tarogi iko o tinamu na vuna sa tagi kina o tacimu.” Taroga, “Na cava beka na isau ni noda dina?” Taroga sara, “Na cava beka sa qai isau ni noda dau lawaki?” Vukei ira na gone mera raica ni na rairai dredre toka me saumi mai vakatotolo na noda caka dina ia na kena isau ena veisiga ni mataka ena veimuataki ki na vakacegu kei na bula marau.
Vakauqeta mera vakayacora (bulia e dua na serekali): Sureta na kalasi yadua (ena veivukei ni nodra qasenivuli) mo bulia kina e dua na malanivosa se serekali ena vica ga na vosa baleta na dina. Me kena ivakaraitaki, “Ke sa dina ga au sa tukuna, au sa qai sega vakadua ni druka!” Sureti ira na kalasi mera wasea na nodra malanivosa vei ira na gone. Vakayaloqaqataki ira mera cavuta na malanivosa oqori ena gauna era temaki kina mera lawaki.