Janueri
Na Galala sa iSolisoli Meda Digidigi Vakaikeda
“A ra sa sereki na tamata kecega … mera digitaka na galala kei na bula tawamudu, e na vuku i Koya na Dauveisorovaki ni tamata kecega” (2 Nifai 2:27).
Sere: “As a Child of God”
(tabana e 28 ena ituvatuva oqo)
Kuria ki na veivakasama oqo na nomu o sa vakarautaka. Ena veimacawa, tuvanaka na sala me (1) kilai na vunau, (2) vukei ira na gone mera kila vakavinaka, ka (3) vukei ira mera bulataka ena nodra bula. Tarogi iko, “Na cava me ra cakava na gone me ra vuli kina, kei na sala cava meu vukei ira kina me ra vakila na Yalotabu?”
iMatai kei na iKarua ni Macawa: Na galala sa isolisoli meda digidigi vakaikeda.
Me kilai na vunau (me qitotaki na kilakila-mada): Tukuna vei ira na gone ni o sa vakasamataka tiko e dua na vosa, ka solia vei ira na ivakatakilakila me vukea na nodra kila rawa na vosa. Kerei ira mera laveliga kera kila na isau ni taro. E rawa me ivakatakilakila na veika oqo: A noda tu na isolisoli oqo ni bera ni da gole mai ki vuravura. E isolisoli mai vua na Tamada Vakalomalagi. E tiki bibi ni ituvatuva nei Tamada Vakalomalagi baleti keda. E gadreva tu o Setani me kauta tani mai vei keda. Eda vakayagataka ni da dau digidigi. Oqo e dua na isolisoli meda digidigi ga kina vakaikeda. E tekivu ena matanivola G. Ni ra sa kila rawa na gone na isau ni taro, mera cavuta vata sara, “Na Galala sai isolisoli meda digidigi vakaikeda.”
Vakauqeta me kilai vakavinaka (me raici ka veivosakitaki na lesoni ivakaraitaki): Vakaraitaka vei ira na gone e dua na kau ka volai toka na vosa digidigi ena dua na muana kei na vosa isau ena muana ka dua. Vakamacalataka ni isau sai koya na ka dina ena yaco mai baleta na digidigi eda sa vakayacora; me vaka beka, keda sa digitaka meda dau vulica na qirita na iyaya ni ivakatagi, eda na kenadau sara, keda digia meda tara na yameyame, eda na kama. Taura cake na kau ka vakaraitaka vei ira na gone ni gauna kece o tomika kina na kau, sa tu vei iko na digidigi kei na isau ni digidigi o ya. Kerea e dua na gone e qase cake toka me wilika na 2 Nifai 2:27. Sureti ira na vo ni gone mera vakarorogo ki na isau ni digidigi dodonu (bula sereki kei na bula tawamudu) kei na isau ni kena vakayacori e dua na digidigi cala (bula vesuki kei na rarawa). Droinitaka e dua na daeqaramu ena papanivolavola me vaka e vakaraitaki toka oqo.
Vukei ira na gone mera kila vakavinaka ni gauna eda digidigi vinaka kina, ena muataki keda meda sereki ka marau, ia ena gauna eda digidigi cala kina, ena veimuataki ki na vesuki ka sega na marau.
Sureta e rua na gone me rau gole mai ki liu, ka me rau taura yadua na muani kau o ya. Tarogi koya na gone e taura tiko na muana “digidigi” me tukuna mai e dua na ivakaraitaki ni digidigi vinaka (me vakataka, na vosa vinaka vei ira tale eso). Kerea vei ikarua ni gone me wasea mai na isau ni digidigi o ya (me vakataka, na veitokani e tudei). Vakayacora vei ira tale eso na gone.
Vaqaqacotaka na nodra vuli na gone ena kena tokaruataki tiko. Maroroya tiko na kau ni “digidigi kei na kena isau.” Ena tiko na veigauna eso ni veiwasei mena vakayagataki tale kina ena loma ni yabaki.
Vakauqeta me kilai vakavinaka (vulici ni italanoa ena ivolanikalou): Ena loma ni imatai ni rua na macawa ni vula, vakavulica eso na italanoa mai na ivolanikalou e vakaraitaka ni digitaki na ka dodonu e dau veimuataki ki na sereki kei na marau ka dau veimuataki ki na vesuki kei na rarawa na digidigi ca. Sa rawa mo vakayagataka na italanoa ni iVakabula kei Setani mai na ivolanikalou (raica na Mosese 4:1–4); Nifai kei Leimani kei Lemueli (raica na 1 Nifai 2–4, 7, 18); Setareki, Mesaki, kei Apetiniko (raica na Taniela 3); se Alama kei Tui o Noa (raica na Mosaia 17–19). Ni oti na nomu vakavulica na italanoa, sureta e rua na gone me rau taura yadua na mua ni kau “digidigi kei na kena isau.” Kerea e dua vei rau me vakamacalataka na digidigi era vakayacora o ira era tukuni tiko ena italanoa kei ikarua ni gone me vakamacalataka na isau ni nodra digidigi o ya.
Vakauqeta me vakayacori (rogo italanoa): Vakabira e dua na iyaloyalo i Jisu Karisito ena papanivolavola. Droinitaka e dua na ikabakaba me gole yani ki na iyaloyalo. Droinitaka e dua na tamata ena dua na pepa, ka vakabira ena botoni kabakaba e ra. Tukuna e dua na italanoa me baleta na nona digidigi e dua na gone lailai ena rawa ni cakava ena dua na siga. Ena digidigi yadua oqori, kerei ira na gone mera tukuna mai ke sa digidigi vinaka se digidigi ca ena nodra tucake ni digidigi vinaka ka dabe sobu ke digidigi ca. Me kena ivakaraitaki: “A dreta laivi o Jane e dua na iyaya ni vakatatalo mai vei ganena lailai, ka tekivu tagi sara o ganena. Ena gauna sa taroga mai kina o tinai Jane na vuna e tagi tiko kina o ganena, a kaya sara o Jane ni sega ni kila.” Me baleta na digidigi vinaka yadudua, tosoya cake na tamata droinitaki ki na ikabakaba e tarava kivei Jisu. Tomana tiko na italanoa oqo ena digidigi tale eso me yacova ni sa yaco na tamata droinitaki vua na iVakabula. Me veivosakitaki ni digidigi vinaka ena kauta mai na bula marau ka vukei keda meda toro voleka yani vua na Turaga.
iKatolu ni Macawa: Au a digitaka meu muria na ituvatuva ni Kalou, mai na bula taumada.
Vakauqeta me kilai vakavinaka (lagalagasere): Me veivosakitaki vakalekaleka na veivakasama oqo, ka me lagati na kedra sere vata kei ira na gone: Niu se bera ni gole mai ki vuravura au a bula tu mai lomalagi (“I Lived in Heaven” [CS, 4]). Au a digitaka meu gole mai ki vuravura meu mai vakayago (“Au Luve ni Kalou” [NVL, 185]; “E Solia Vei Au Na Turaga, E Dua Na Vale Tabu” [NVL, 62]). Au na papitaiso ka ciqoma na isolisoli ni Yalo Tabu (“When I Am Baptized” [CS, 103]; “The Holy Ghost” [CS, 105]). Au na rawa ni vakavakarau meu gole ki valetabu (“I Love to See the Temple” [CS, 95]; “Families Can Be Together Forever” [SL, 184]). Au na tucaketale (“He Sent His Son” [CS, 34–35]).
iKava ni Macawa: A bulia o Jisu Karisito na vuravura oqo me vanua ni noqu vulica meu digitaka kina na dodonu.
Me kilai na vunau (me raici ka veivosakitaki e dua na lesoni ivakaraitaki): Vakaraitaka vei ira na gone e dua na koniteina era sinai tu kina na kala e duidui roka. Vakaraitaka vei ira e dua tale na koniteina era tu ga kina na kala era roka vata tu. Taroga vei ira na gone: “Kevaka beka mo na rokataka e dua na droini, o cei vei rau na koniteina oqo o gadreva mo na vakayagataka? Cava na vuna? Vakamacalataka ni sa dua tiko na veivakalougatataki levu na veika meda digidigi kina. Vakadinadinataka ni Rau lomani keda na Tamada Vakalomalagi kei Jisu Karisito ka Rau vinakata meda dau digidigi dodonu.
Ena itaviqaravi oqo, sa rawa mo digia mo vakaraitaka na vakasama, ni digidigi sa dua na veivakalougatataki ena nomu vakayagataka na kala, penikau roka, eso na vuata, se dua tale na ka era kila vakavinaka tu na gone.
Vakauqeta me kilai vakavinaka (rokarokataki): Mera rokataka na gone e dua na ilavelave ni iyaloyalo e tiko ena tabana 35 ni ivolavakarau ni isususu, Dou Raici Ira na Nomudou Lalai, se sureti ira mera droinitaka na iyaloyalo vata vakaoqori ena kena ivakamacala vata ga. Me veivosakitaki o cei e bulia na veika e droinitaki tu kei na vuna era a buli kina. Vakavulica vei ira na gone ni sa namaka tiko vei keda na Tamada Vakalomalagi meda taqomaka na vuravura oqo sa bulia vei keda na Luvena. Kerei ira na gone mera wasea mai eso na sala e rawa mera digitaka mera taqomaka kina na vuravura oqo kei na veika bula era sa tiko kina. Sureti ira na gone mera kauta ki nodra vale na nodra droini mera laki cakava kina o nodra itubutubu e dua na ivola.