June
Au sa Digitaka na Dodonu ena Noqu Bulataka na iVakavuvuli ni Kosipeli
“Au na lako ka kitaka na ka sa vakarota na Turaga, ka niu kila ni sa dau vakarautaka na Turaga na sala me ra rawata kina na luve ni tamata na ka kece sa vakarota vei ira ko Koya” (1 Nifai 3:7).
Sere: “Nephi’s Courage”
(CS, 120–21)
Kuria ki na veivakasama oqo na nomu o sa vakarautaka. Ena veimacawa, mo tuvanaka na sala me (1) kilai na vunau, (2) vukei ira na gone mera kila vakavinaka, ka (3) vukei ira mera bulataka ena nodra bula. Tarogi iko, “Na cava me ra cakava na gone me ra vuli kina, kei na sala cava meu vukei ira kina me ra vakila na Yalotabu?”
iMatai ni Macawa: Au sa masu vua na Tamada Vakalomalagi meu vakaukauwataki meu cakava na veika sa dodonu.
Vakauqeta me kilai vakavinaka (veivosakitaki ni masu): Vakaraitaka vei ira na gone e dua na talevoni se dua tale na sala ni veitaratara. Me veivosakitaki na ivakarau ni kena vakayagataki. Tarogi ira na gone na sala cava meda na veivosaki rawa kina kei na Tamada Vakalomalagi. Vakamacalataka me vaka ga ni da qiria e dua na naba meda vosa vua e dua ena talevoni, sa rawa meda masu meda veivosaki rawa kina kei na Tamada Vakalomalagi; sa rawa meda kerea Vua meda vakaukauwataki meda cakava na veika sa dodonu. Solia ki na kalasi yadua na veimataqali ivakarau ni masu (me kena ivakaraitaki, masu ni tamata yadua, masu vakamatavuvale, masulaki ni kakana, se masu vakalasi). Kerei ira na kalasi yadua mera vakaraitaka na nodra iyaloyalo kivei ira na vo ni gone ka tukuna vei ira na mataqali ivakarau cava ni masu sa vakaraitaki tiko ena kena gauna, ena vanua cava, kei na vuna e cavuti kina na mataqali masu vakaoqo.
Vakauqeta mera vakayacora (vakayacori na qito): Vakalamutaka e dua na qara lailai ena mua ruarua ni rua na tini lala, ka semati rau vata ena dua na wa. Vakadreta vakaukauwa, mera qai vosa vakayadudua na gone vua e dua tale mera cavuta e dua na ka era rawa ni masulaka vua na Tamada Vakalomalagi ni ra saga tiko mera cakava na veika sa dodonu (me kena ivakaraitaki, mera tukuna na ka dina, mera dau vakarokoroko, se daucaka vinaka). Me dua tale na gone e vakarorogo mai na ikarua ni tini. Wasea (se kerea e dua na gone me wasea) na gauna a vakaukauwataki iko kina na Tamada Vakalomalagi mo cakava na veika sa dodonu. Vakadinadinataka ni sa dau rogoca ka sauma na noda masu na Tamada Vakalomalagi ka na vakaukauwataki keda meda cakava na veika sa dodonu.
iKarua ni Macawa: Ena gauna au sauma kina na noqu ikatini, e vakalougatataki au na Tamada Vakalomalagi.
Me kilai na vunau ka vakauqeta me kilai vakavinaka (raici ni ivakaraitaki): Vakamacalataka ni ikatini sai koya na kena soli e dua na ikatini ni ilavo o rawata, vua na Turaga ki na Nona Lotu. Vakaraitaka vei ira na gone e tini na koini. Tarogi ira se vica mada na koini me vakayagataki me isolisoli ni ikatini. Vakaraitaka na waqanivola kei na rasiti ni isolisoli, ka vakamacalataka ni da sauma na noda ikatini eda na vakalewena na rasiti ni isolisoli, biuta ena kena waqanivola vata kei na noda ikatini, ka laki solia vei bisopi se dua vei rau na nona daunivakasala.
Vakauqeta mera vakayacora (qito ka vakarorogo ivakadinadina): Vakaraitaka na veiyaloyalo kei na iyaya eso e vakatakarakarataka tiko na veivakalougatataki e kauta mai na saumi ikatini, me vakataka na valetabu, valenisoqoni, na ivola ni serenilotu, na Volanisere ni Lalai, na ivolavakarau ni Lalai, kei na ivolanikalou. Tukuna vei ira na gone, ni vuku ga ni ilavo ni ikatini sa rawa ki na Lotu me vakarautaka rawa na veika kece oqo. Ubia na iyaloyalo kei na iyaya oqori. Kauta laivi e dua se rua. Cereka laivi na iubi ka mera vakilakila mai na gone na cava sa yali. Me vakayacori vakavica vata. Vakamacalataka ni so tale na veivakalougatataki e yaco mai ena vuku ni saumi ikatini ka sega tu ni laurai (raica na 3 Nifai 24:10). Me dua se rua na uabula me tukuna na veivakalougatataki rau sa ciqoma ni rau sauma na ikatini.
iKatolu ni Macawa: Au sa talairawarawa ki na Vosa ni Vuku ena noqu kania ka gunuva ga na veika vinaka ka sega na ka ca.
Vakauqeta me kilai vakavinaka (wili ivolanikalou ka vakayacora tiko e dua na qito): Mo ni wilika vata na 1 Korinica 3:16–17. Sureti ira na gone mera wasea na ibalebale ni ivolanikalou oqo kivei ira. Vakamacalataka ni gadreva na Tamada Vakalomalagi meda taqomaka vinaka na yagoda. Biuta ena dua na koniteina na iyaloyalo eso ni veimataqali kakana, gunu, kei na so tale era vinaka se ca ki na yagoda (me vakataka na vuata, draunikau, madrai, alakaolo, kei na tavako). Kauta mai e dua na ilavelave ni tabana 43 ena ivolavakarau ni isususu, ka kotikotiva me iba. Mera tomika mai na gone yadua e dua na iyaloyalo mai na koniteina. Kevaka e vinaka vei keda na ka e tiko ena iyaloyalo o ya, me dua na gone me qai vakabira e dua na tiki ni iba ena papanivolavola. Kevaka e ka ca, vagalalataka e dua na tiki ni iba. Me vakayacori tiko me yacova ni sa taucoko na iba (e dodonu me levu cake tiko na veika vinaka era tiko ena koniteina mai na ka ca). Kerea vua e dua na uabula se gone me wasea eso na veivakalougatataki sa ciqoma o koya ena nona talairawarawa tiko ki na Vosa ni Vuku (raica na V&V 89:18–21).
Sa vakarautaki tu na ivolavakarau ni iSususu ena sharingtime.lds.org
iKava ni Macawa: Niu dau vakaisulu rakorako, au sa rokova tiko na yagoqu ni sa isolisoli ni Kalou.
Me kilai na vunau (raici tiko ni dua na iyaloyalo ka wili ivolanikalou): Vola oqo ena papanivolavola: “Na sa .” Vakaraitaka e dua na iyaloyalo ni valetabu. Taroga, “Na cava na vuna era sa vakasakiti kina na valetabu?” Mera raica na gone na 1 Korinica 6:19. Kerei ira mera raica na veika e tukuna tiko baleta na yagodra ni ra wilika e cake vata kei iko. Tarogi ira na gone na vosa cava ena vakataucokotaka na yatuvosa e tiko ena papanivolavola (yagoqu, valetabu). Sureti ira na gone mera tucake ka cavuta vata na yatuvosa.
Vakauqeta me kilai vakavinaka ka mera vakayacora (lagasere tiko kei na veivosaki): Tukuna vei ira na gone ni yagoda sa valetabu ni sa dau tiko talega kina na Yalo Tabu. Lagata na imatai ni qaqani “E Solia Vei Au Na Turaga, E Dua Na Vale Tabu” (NVL, 62). Sureti ira na gone mera wasea na ivakarau ni isulusulu e vinakata vei keda na Tamada Vakalomalagi kei na vuna. Vakamacalataka ni ra sa dau vakasala na parofita ni Kalou vei ira na Luvena mera dau isulusulu rakorako. Sureti ira na gone mera vakarogoca na tiki ni yagodra cava me dau taqomaki ni ko wilika na wase “iSulusulu kei na iRairai” ena Me iSakisaki ni iTabagone. Kerei ira na gone mera vakananuma mada e dua na sala era na vakaisulu rakorako kina. Pasitaka e dua na iyaya malumalumu vua e dua na gone ka sureti koya me wasea mai na nona nanuma. Kerei koya me pasitaka sara na iyaya malumalumu o ya vua e dua tale na gone, me qai wasea mai na gone o ya na nona nanuma. Mera cakava kece na gone.