Me
Au sa Digitaka na Dodonu Niu sa Papitaiso ka Vakadeitaki Meu Lewe ni Lotu
“Dou veivutuni, ka papitaisotaki koi kemudou yadua, ena yaca i Jisu Karisito, me bokoci kina na nomudou ivalavala ca, ka dou na rawata na Yalo Tabu me isolisoli” (Cakacaka 2:38).
Sere: “When I Am Baptized”
(CS, 103)
Kuria ki na veivakasama oqo na nomu o sa vakarautaka. Ena veimacawa, mo tuvanaka na sala me (1) kilai na vunau, (2) vukei ira na gone mera kila vakavinaka, ka (3) vukei ira mera bulataka ena nodra bula. Tarogi iko, “Na cava me ra cakava na gone me ra vuli kina, kei na sala cava meu vukei ira kina me ra vakila na Yalotabu?”
iMatai ni Macawa: Niu sa veivutuni, au sa rawa ni vosoti.
Vakauqeta me kilai vakavinaka (vakaitavi ena lesoni ivakaraitaki): Mera yadua na gone na vatu lalai. Kerei ira na gone mera biuta na vatu e nodra loma ni vava, ka kerei ira mera tucake ka kalawa yani. Tarogi ira na gone na cava era vakila ni tiko e loma ni nodra vava e dua na vatu. Taroga ni vakatauvatataki vakacava na ivalavala ca ki na vatu oqo. (E sega ni vinaka; e kauta mai na rarawa.) Mera qai kauta laivi na gone na vatu, ka tarogi ira se tautauvata vakacava na veivutuni kei na ciqoma na veivosoti ni Tamada Vakalomalagi kei na kena kau laivi na vatu mai na noda ivava. Vakamacalataka ni vuku ga i Jisu Karisito, sa rawa meda veivutuni ka vosoti na noda ivalavala ca. Cavuta na nomu ivakadinadina, ni veivutuni sa dua na veivakalougatataki totoka mai vua na Tamada Vakalomalagi ka na kauta mai vei keda na marau.
iKarua ni Macawa: Niu sa papitaiso ka vakadeitaki, au sa muria tiko na ivakaraitaki i Jisu.
Vakauqeta me kilai vakavinaka (vakayacori na qito ni nanuma lesu kei na wili ivolanikalou): Vakabira e dua na iyaloyalo kei Joni ni papitaisotaki Jisu tiko kei na nona papitaisotaki tiko e dua na gone. Mera qai raica na gone na iyaloyalo e rua oqo me 20 na sekodi. Me qai lati na iyaloyalo e rua oqo ka ra kerei na gone mera tukuna mai e vuqa na ka e rau tautauvata kina na iyaloyalo oqo. Sa rawa mo vola toka ena papanivolavola.
Kerei ira na gone mera wilika na Vunau kei na Veiyalayalati 20:72–74 me laurai kina o cei me na vakayacora na veipapitaisotaki kei na kena ivakarau me caka kina. Sureti ira na gone mera wasea na veika era sa raica. Vakamatatataka ni o koya e vakayacora na veipapitaisotaki e dodonu me tiko vua na lewa ni matabete ka dodonu me tabadromuci o koya me papitaiso, se me dromu e boto ni wai. Vakaraitaki rau tale na iyaloyalo. Vakamacalataka ni rau a papitaiso ena tabadromuci e wai o Jisu kei gonelailai, mai vua e dua sa tu vua na lewa ni matabete.
Vakauqeta mera vakayacora (rokarokataki kei na lagasere): Lavetaka na tabana 111 ena ivolavakarau ni isususu, Dou Raici Ira na Nomudou Lalai, mera rokataka na gone yadua. Lagata na “Baptism” (CS, 100–101), ka vakayaloqaqataki ira na gone mera papitaiso vakataki Jisu. Sureta e dua na gone se qai papitaiso oti ga me tukuna vei ira na gone na nona papitaiso.
Sa vakarautaki tu na ivolavakarau ni isususu ena sharingtime.lds.org
iKatolu ni Macawa: Sa rawa me vukei au na Yalo Tabu.
Me kilai na vunau (raici ni lesoni ivakaraitaki): Me laki tucake tu e katuba e dua na gone. Vesuka na matana, me qai sasaga o koya me raica na nona idabedabe ka dabe ka sega ni dua e vukei koya. Me vakayacori tale, ia ena gauna oqo mo kerea e dua tale na gone me tuberi koya e vesu tiko na matana ni tara tiko na ligana ni toso tiko ki liu. Veivosakitaka vata kei ira na gone na cava na vuna a rawarawa kina vei gone o ya me raica na nona idabedabe ena ikarua ni gauna. Vakamacalataka ni sa rawa vua na Yalo Tabu me vukei keda ena nona dusimaka tiko na noda bula. Sureti ira na gone mera cavuta, “Sa rawa me vukei au na Yalo Tabu.”
Era na vakarorogo vagumatua ka vakayaloqaqataki me ra vuli na gone ni ra vakaitavi ena ivakaraitaki ni veika vakaiyaloyalo.
Vakauqeta me kilai vakavinaka (lagasere kei na qito veidonui): Vola na vosa veivuke ena papanivolavola. Me lagati “The Holy Ghost” (CS, 105), ka sureti ira na gone mera wilika na veika e tukuni tiko ena sere e dau vakayacora na Yalo Tabu me vukei keda kina.
Sa vakarautaki tu na ivakatakilakila ni CTR (DND) ena sharingtime.lds.org
Ena Lalai, vakarautaka e 10 na tiki ni pepa vata kei na dua na icocovi ni CTR (DND) e mua toka e liu. Ena daku ni pepa yadua, vola e dua vei ira na 5 na malanivosa oqo e vakamacalataka tiko na sala sa dau vukei keda kina na Yalo Tabu: sa dau vakacegui keda na Yalo Tabu, na Yalo Tabu e vakadinadinataki Jisu Karisito, e dau vakavulici keda na Yalo Tabu, sa dau tukuna vei keda na Yalo Tabu na veika meda na cakava se kakua ni cakava, ka sa dau vukei keda na Yalo Tabu meda caka vinaka (na malanivosa yadua mena volai tiko ena rua na pepa). Vakabira na pepa ena papanivolavola ena kena ituvatuva veitarataravi ka me mua toka na icocovi ni CTR (DND) vei ira na gone. Sureta e dua na gone me cega e dua vei ira na pepa. Mo ni cavuta vata na vosa e tiko e dakuna. Digitaka tale e dua na gone me laki cega e dua tale na pepa ka saga me dua na kena isa. Mo ni cavuta vata na vosa e tiko e dakuna. Kevaka sa veisa donu na pepa, kauti ira laivi mai na vava ni volavola. Kevaka e sega ni veisa donu, vukici ira lesu. Me vakayacori tiko me yacova ni ra sa veisa donu kece.
Vakauqeta mera vakayacora (veivosakitaki ivolanikalou): Wasei ira vakailawalawa na gone. Solia ki na ilawalawa yadua e dua vei ira na ivolanikalou oqo: Joni 14:26; Joni 15:26; 2 Nifai 32:5; V&V 11:12. Kerei ira na ilawalawa yadua mera wilika na nodra ivolanikalou ka veivosakitaka na kena ibalebale. Sureti ira na gone kei ira na kena qasenivuli mera wasea na ivakaraitaki ni nodra a vakila na veivakauqeti ni Yalo Tabu.
iKava ni Macawa: Ena gauna au vakayagataka kina na sakaramede au sa vakavoutaka kina na noqu veiyalayalati ni papitaiso.
Vakauqeta me kilai vakavinaka (veivosakitaki ni veiyalayalati kei na wiliki ni ivolanikalou): Vakamacalataka ni veiyalayalati sa dua na veiyalayalati vakalou basoga rua baleti keda kei na Tamada Vakalomalagi; ka da sa yalataka meda cakava na veika eso, ni gauna eda cakava kina, sa yalataka tu o Koya me na vakalougatataki keda. Vakavotuya vei ira na gone ni da sa veiyalayalati tiko kei na Tamada Vakalomalagi ena gauna eda papitaiso kina, ka vakamacalataka ni da sa vakavoutaka na veiyalayalati o ya ena gauna eda kania kina na sakaramede. Cakava eso na tikini pepa ni vosa era volai tu kina na malanivosa mai na masu ni sakaramede ni tukuna tiko na veika eda sa yalataka tu ni da kania na sakaramede kei na veika sa yalataka tu vei keda na Tamada Vakalomalagi (raica na Vunau kei na Veiyalayalati 20:77, 79). Solia na tikini pepa ni vosa ki na vica na gone, ka mera tucake tu ena kena veitarataravi dodonu ni ko wilika e cake na ivolanikalou.