Feperueri
Ni Da Digitaka na Dodonu, Eda na Vakalougatataki
“Ia kevaka ko ni sa muria na nona vunau, e na vakalougatataki kemuni ka vakasaututaki kemuni” (Mosaia 2:22).
Sere: “Digitaka na Dodonu”
(Serenilotu, naba 142)
Kuria ki na veivakasama oqo na nomu o sa vakarautaka. Ena veimacawa, mo tuvanaka na sala me (1) kilai na vunau, (2) vukei ira na gone mera kila vakavinaka, ka (3) vukei ira mera bulataka ena nodra bula. Tarogi iko, “Na cava me ra cakava na gone me ra vuli kina, kei na sala meu vukei ira kina me ra vakila na Yalotabu?”
iMatai ni Macawa : A vakalougatataki o Noa ni a digitaka na dodonu.
Me kilai na vunau (vakayacori e dua na qito veidonui): Droinitaka ena papanivolavola e dua na waqa. Vakarautaka eso na iyaloyalo ni manumanu era tautauvata. Solia vei ira na gone mera yadua na iyaloyalo oqo. Kerei ira na gone mera tucake ka tagi me vakataki ira na manumanu ena nodra iyaloyalo ka qai vakarogoca na domo vata ga ni manumanu o ya ena vakayacora mai e dua tale na gone. Ni rau sa veikilai domo e rua na gone e tautauvata na kedrau iyaloyalo, me rau qai tucake vata me yacova ni ra sa veisasa vinaka na vo ni manumanu taucoko. Kerei ira na gone mera lako vata mai vakayarurua ka biuti ira na nodra manumanu ena waqa e droinitaki tu. Tarogi ira na gone, “O cei na parofita a kerea vua na Turaga me laki kauti ira mai na manumanu ki na waqa?” Mo vakaraitaka ni a rairai dua toka na cakacaka dredre mera laki kau mai e vuqa na manumanu ki na waqa, ia a digia ga o Noa me talairawarawa ki na ivakaro ni Turaga.
Vakauqeta me kilai vakavinaka (wiliki ni ivolanikalou): Vakaraitaka vei ira na gone na iyaloyalo kei Noa ni a vunau tiko, ka wilika na Mosese 8:20. Tarogi ira na gone na vuna era a sega kina ni vakarorogo na tamata vei Noa. Wasea rua na vava ni volavola, ka vola na taro oqo ena dua na yasana, kei na kena ivolanikalou veitarataravi ena dua tale na yasana: Na cava ena vakayacora na Turaga me vakarusai ira kina na tamata ivalavala ca? (Nai Vakatekivu 6:17). Na cava a tukuna vei Noa me vakayacora me vakabula kina na nona matavuvale? (Nai Vakatekivu 6:18). Na cava a vakayacora o Noa me digia kina na dodonu? (Nai Vakatekivu 7:5). Kerei ira na gone mera wilika na ivolanikalou ka raica kina na isau ni taro yadua. Vakaraitaka vei ira na gone e dua na iyaloyalo kei Noa ni tara tiko na waqa. Vakamacalataka ni so na gauna e dau dredre toka na digia na dodonu. Taroga, “A vakalougatataki vakacava o Noa ni a digitaka na dodonu?” Vakauqeti ira na gone mera wasea se sala cava era na vakalougatataki kina ke ra digitaka na dodonu.
iKarua ni Macawa: E ratou a vakalougatataki na tisaipeli i Jisu ni ratou a digitaka na dodonu.
Vakauqeta me kilai vakavinaka (me wiliki na ivolanikalou, rokarokataki, kei na vakayagataki ni papeti (matakau liga): Wilika vei ira na gone na itukutuku oqo ena nodra a digitaka na dodonu na tisaipeli i Jisu: Luke 10:38–42 (Meri); Maciu 4:18–20 (Pita kei Adriu); Cakacaka 9:1–9, 17–20 (Paula). Me veivosakitaki eso na veivakalougatataki era a ciqoma o ira na tamata oqo ni ra a digitaka na dodonu. Droinitaka eso na tamata mera yadua na gone (se vakayagataka na tamata mai na ivolanikalou era tiko ena “Funstuf,” Friend, Jan. 2006, 35; kei na “Funstuf,” Friend, Feb. 2006, 31). Mera qai rokataka na gone na droini oqo, kotivi ira laivi, ka cakavi ira mera papeti kabi se papeti taga pepa. Sureti ira na gone mera vakayagataka na nodra papeti mera tukuna tale kina e dua vei ira na italanoa oqori. Me vakataka: “Na yacaqu o Paula. Au a dau vakacacani ira na tamata era muri Jisu. Au a raici Jisu ena raivotu. A kerei au o Jisu meu kakua tale ni vakacacani Koya. Au a digitaka meu muri Jisu kau a daukaulotu sara ena noqu bula taucoko.”
Sa rawa mera vakayagataki ga na papeti me dramataki kina eso na tiki ni lesoni. Era sa iyaragi yaga ni kena vaqaqacotaki e dua na ulu ni vakasama ka ra vagolei mai kina na gone mera vakarorogo (raica na VMLB, 208).
Vakauqeta mera vakayacora (raicilesu ni italanoa mai na ivolanikalou): Sureti ira na gone mera vakayagataka na nodra papeti mera tukuna tale kina na italanoa mai na ivolanikalou vei ira na nodra matavuvale ena nodra itikotiko. Vakayaloqaqataki ira mera wasea vei ira na nodra lewe ni matavuvale na nodra a digia na dodonu o ira na tamata ena ivolanikalou kei na nodra a vakalougatataki kina. Tarogi ira na gone na sala mera na digia kina na dodonu ena loma ni macawa.
Era sa vakarautaki tu na papeti kabi ena sharingtime.lds.org
iKatolu ni Macawa: A vakalougatataki o Nifai ni a digitaka na dodonu.
Vakauqeta me kilai vakavinaka (vakaitavi ena drama): Mera dramataka na gone na veigauna eso a talairawarawa kina o Nifai vei tamana kei na Turaga (kena ivakaraitaki, raica na 1 Nifai 16:18–24, 30–32; 1 Nifai 17:8, 17–18, 48–53; 1 Nifai 18:9–21). Sa rawa mo vakayagataka eso na isulu ni drama kei na veivuke eso e rawarawa (me baleta na ivakamacala ni drama, raica na VMLB, 121–12). Mo ni wilika vata na veika e kaya o Nifai ena 1 Nifai 17:3.
Na cakacaka ni ivakaraitaki ena rawa me vakatorocaketaka na vuli. Me rawarawa toka ga na ivakaraitaki. Era na raica vakatabakidua kina na gone na itukutuku ni lesoni ka sega ena ivakaraitaki.
Vakauqeta mera vakayacora (lagati e dua na sere): Vakaraitaka na kau ni “digidigi kei na kena isau” mai na vula o Janueri, ka sureti ira na gone mera wasea na veika era nanuma tiko baleta na digidigi kei na kena isau. Tukuna vei ira ni vuqa sara na veivakalougatataki eda ciqoma sa isau tiko ni digidigi vinaka eda a vakayacora. Sureti ira na gone mera vakasamataka mada eso na sala mera na vakataki Nifai kina ka digidigi vinaka. Mera qai lagata na gone na sere “Nephi’s Courage” (CS, 120–21) ka veisoliyaka yani na kau ni “digidigi kei na kena isau” ni ra lagasere tiko. Me tarovi na lagasere ena gauna eso e lagati tiko kina. Sureti koya na gone sa mai taura tu na kau me wasea mai e dua na digidigi vinaka e rawa ni cakava. Me qai solia yani na kau na gone o ya vua e dua tale na gone, ka sureti koya me wasea e dua na veivakalougatataki e dau yaco mai ni vakayacora e dua na digidigi vinaka. Vakayacori tale ke balavu na gauna.
iKava ni Macawa: Era sa vakalougatataki tiko na lewe ni Lotu edaidai ni ra digitaka na dodonu.
Vakauqeta me kilai vakavinaka (wasei ni italanoa): Sureta mai eso na nodra itubutubu se tukadra budra na gone ni nomudou Lalai mera mai wasea na nodra a digia kina na dodonu vakakina o ira na nodra qase e liu. E rawa ni oka kina na italanoa ni nodra a digitaka kina mera lewena na Lotu. Ni bera e dua me talanoa, kerei ira na gone mera vakarogoca na sala eso era a digia kina na dodonu na lewe ni Lotu oqo kei na nodra a vakalougatataki ni ra a cakava vakakina. Ni sa oti na italanoa, kerei ira na gone me tukuna na sala era a vakalougatataki kina na lewenilotu ena nodra a digitaka kina na dodonu. Sa rawa mo kerei ira na gone mera droinitaka eso na iyaloyalo ni italanoa era sa mai rogoca ka wasea yani na nodra droini o ya vei ira na lewe ni Lalai ka vakakina ena nodra itikotiko.