Okosita

Au sa Digitaka Meu Vakasinaita na Noqu Bula ena Veika sa Dau Sureta Mai na Yalotabu

“A ka kecega e vinaka, na ka e totoka, se rogorogo vinaka, se daudokai se vakaturaga, keimami sa gadreva na veika oqori” (Yavu ni Vakabauta 1:13).

Sere: “I’m Trying to Be like Jesus”

(CS, 78–79)

Kuria ki na veivakasama oqo na nomu o sa vakarautaka. Ena veimacawa, mo tuvanaka na sala me (1) kilai na vunau, (2) vukei ira na gone mera kila vakavinaka, ka (3) vukei ira mera bulataka ena nodra bula. Tarogi iko, “Na cava me ra cakava na gone me ra vuli kina, kei na sala cava meu vukei ira kina me ra vakila na Yalotabu?”

iMatai ni Macawa: Ena vukea meu digitaka na dodonu na noqu vakaitokani vinaka.

Vakauqeta me kilai vakavinaka ka mera vakayacora (vakarorogo ki na italanoa): Tukuna na italanoa oqo: “E rua na cauravou rau a kunea e dua na pea ivava makawa e gaunisala. Rau a raica sara tu yani e dua na tamata ni cakacaka tiko ena nona iteitei. E dua vei rau a kaya sara me rau vunia na ivava ka raica toka mai na cava ena cakava na tagane o ya.” Kerei ira na gone mera wasea mai na cava mera na tukuna vei cauravou o ya. Mo qai tomana tale na vo ni italanoa: “A kaya sara na kena ikarua me kakua ni rau vunitaka na ivava, me rau biuta ga kina e yadua na koini siliva, rau sa mani cakava oqo. Vakalailai ga sa lesu mai na tagane o ya. Ni sa raica na koini, sa dua na ka na nona vakavinavinaka ka sa tekiduru ka cabora e dua na masu ni vakavinavinaka. A cavuti watina, ni a tauvimate tiko, kei iratou na luvena, sa sega na ka me ratou kania, ka sa kerea vua na Turaga me vakalougatataka na tamata a vukei koya. Rau sa vakila na cauravou oqo na vakacegu ni lomadrau ka rau sa vakavinavinaka ni rau a digia na dodonu” (raica na Gordon B. Hinckley, ena Conference Report, Apr. 1993, 71; se Ensign, May 1993, 54). Sureta eso na gone mera wasea na gauna era a vukei mai vei ira na nodra itokani mera digitaka na dodonu.

teacher and children

iTalanoa: Na italanoa era dau vakarorogo matua mai kina na gone ka vukea na nodra semata ki na vunau. Mo kila vakavinaka na italanoa eso me matata ka veivakauqeti kina ni ko wasea.

iKarua ni Macawa: Au na wilika, vakarorogo, ka raica ga na veika sa vinaka vua na Tamada Vakalomalagi.

Me kilai na vunau (raici e dua na lesoni ivakaraitaki): Vakaraitaka vei ira na gone e dua na beseni sinai tu kina na vuata kei na dua na beseni e tu kina na qele. Tarogi ira na gone o cei vei rau oqo e vinaka meda kania kei na vuna meda kania kina. Vakamacalataka ni gadreva tu na Tamada Vakalomalagi meda vakasinaita na noda vakasama ena veika sa vinaka ka sega ni veika e veivakacacani. Sureti ira mera kaya, “Au na wilika, vakarorogo, ka raica ga na veika sa vinaka vua na Tamada Vakalomalagi,” ni ra matanataka tiko e ligadra ni ra sa wiliwili tiko, vakarorogo, ka raica.

bowls of dirt and fruit

Vakauqeta me kilai vakavinaka (veivosakitaki ni vunau): Tukuna vei ira na gone kevaka meda digitaka na veika sa sega ni vinaka vua na Tamada Vakalomalagi eda na rawa ni vakayalia e dua na ka bibi sara. Kerei ira mera vakarogoca na ka bibi cava o ya ni ko wilika tiko na imatai ni parakaravu ena “Veivakamarautaki kei na Veitukutuku Volai” mai na Me iSakisaki ni iTabagone (raica talega na “My Gospel Standards”). Tarogi ira na gone kera sa rogoca na veika ena yali mai vei keda ni da digidigi cala (na Yalotabu). Wasei ira na gone ki na tolu na ilawalawa ka mera qai dui sikova yani na siteseni e tolu oqo: “Wilika,” “Vakarorogo,” kei na “Raica.” Sureti ira na gone ena siteseni yadua mera wilika, vakarorogo, se raica e dua na ka e vinaka vua na Tamada Vakalomalagi. Me veivosakitaki na veika era vakila ni ra wilika, vakarogoca, ka raica na veika sa vinaka vua na Tamada Vakalomalagi.

Siteseni: Kevaka era lewe levu na nomu Lalai, sa rawa mera veitosoyaki na iliuliu ki na veisiteseni mera kakua kina ni veitokiyaki na gone.

iKatolu kei na iKava ni Macawa: Au na cakava ena Siga ni Vakacecegu na veicakacaka ka na vukea meu tiko volekata ga na Tamada Vakalomalagi.

Me kilai na vunau (cavuqaqataki ni ivolanikalou): Tukuna vei ira na gone ni ko na solia vei ira eso na ivakatakilakila me kilai kina e dua na itukutuku bibi. Vola na imatai ni matanivola ni vosa yadua ena Lako Yani 20:8 ena papanivolavola (M N N S N V M V). Vakamacalataka ni matanivola oqo era sa imatai tiko ni matanivola ni vosa yadua ena itukutuku o ya. Solia na ikarua ni ivakatakilakila ena nomu vakaraitaka e dua na iyaloyalo kei Mosese kei na Vunau e Tini. Ka sureti ira na gone mera raica mada na Lako Yani 20:8 ka mera wilika vata. E dodonu mera raica na gone na isema e tiko ena vosa ena papanivolavola kei na ivolanikalou. Vukei ira na gone mera cavuqaqataka na ivolanikalou ni ra dusia tiko na matanivola e tiko ena papanivolavola ni ra cavuta tiko vakavica na ivolanikalou o ya.

children around teacher with basket

Me veiganiti na itaviqaravi ki na iwiliwili ni Lalai ni ra na vakaitavitaki kina e vuqa na gone. Ena itaviqaravi oqo, ke sa lewe levu na nomu Lalai, me na vica toka na nomu basikete ka mera veiwaseitaka na gone ena loma ni nodra ilawalawa lalai.

Vakauqeta me kilai vakavinaka (veivosaki kei na rokarokataki): Wasei ira na gone ki na va na ilawalawa. Mera wilika na ilawalawa yadua oqo e dua na parakaravu mai na wase “Vakarokorokotaki ni Siga Tabu” ena Me iSakisaki ni iTabagone. Kerei ira mera veivosakitaka na parakaravu ena nodra ilawalawa ka mera qai wasea vei ira na vo ni gone na veika era sa vulica rawa kina. Mera yadua na gone na tikini pepa, ka sureti ira mera droinitaka kina na veika vinaka me vakayacori ena Siga ni Vakacecegu. Kerea e vica na gone mera wasea na nodra droini vei ira na vo ni Lalai. Vakauqeti ira mera wasea na veika era sa vulica rawa vei iratou mai vale.

children drawing

Droini: Ni ra dau droinitaka na gone na veika era sa vulica rawa ena dau vaqaqacotaka mera kila vakavinaka cake kina na vunau. Ena kena gadrevi me vaqaqacotaki cake na nodra kila, mo vakayaloqaqataki ira mera wasea na nodra droini ki na nodra matavuvale.

Vakauqeta me kilai vakavinaka (vakayacori ni itaviqaravi ni ivolanikalou): Ni bera na Lalai, vakarautaka e dua na basikete sinai ena tikinipepa me vakatakarakarataka na mana me vakayagataki ena itaviqaravi oqo. Vola ena papanivolavola na veika oqo:

• Na kakana cava a vakarautaka na Turaga vei ira na Isireli ena lekutu?

• E vica beka na kena levu mera tomika ena dua na siga?

• Na cava beka mera cakava ena ikaono ni siga?

• Na duidui cava e tiko ena Siga ni Vakacecegu?

Mera vakarogoca na gone na isau ni taro ni ko talanoataki ira na Isireli ni ra tomi mana tiko (raica na Lako Yani 16:11–31). Kerei ira mera tucake ni ra sa rogoca e dua na isau ni taro. Me qai tokaruataka tale e dua na gone na tiki ni italanoa e sauma mai na taro o ya. Ka tomani tale na vo ni italanoa. Ni sa oti, tukuna vei ira na gone na vuna a sega ni vinakata kina na Turaga mera tomi mana ena Siga ni Vakacecegu. Mera bobo na gone me vaka ni ra sa moce. Kaburaka sara vakatotolo na “mana” e loma ni rumu. Kerei ira na gone mera rai ka tomika na kedra iwasewase ni mana (dua se rua na tikina). Kerei ira na gone mera biuta lesu na mana ki na basikete. Ni ra sa vakayacora na gone yadua, kerei koya me wasea e dua na sala dodonu me vakatabuya kina na Siga ni Vakacecegu.

Veivuke vei iliuliu ni sere

Mera vukei na gone mera vulica “I’m Trying to Be like Jesus” (CS, 78–79), sa rawa mo vakayacora oqo:

• Lagata na sere o ya vei ira na gone. Sureti ira mera wilika e ligadra na levu ni gauna o lagata kina na vosa saga se saga tiko. Lagata tale na sere, ka kerei ira na gone mera vakasausau me rogorogo vata kei na nomu lagasere.

• Biuta wavoki ena rumu ni Lalai vakavo ga na kena lalaga e liu eso na iyaloyalo e volai tu kina na vosa bibi mai na malanivosa yadua ni sere (me vakataka na mo vakataka, vakamuria, loloma, vakayacora ka cavuta, temaki, kei na vakarorogo). Kerei ira na gone mera vakarorogo ni ko sa tekivu lagasere. Sureti ira mera dusia e dua na iyaloyalo era nanuma ni sala vata kei na vosa o lagata. Kerea e dua na gone me laki biuta ki na lalaga e liu. Mera laga kece sara na vo ni sere o ya. Tomana tiko na nomu lagasere ka vakayacora tale na itaviqaravi oqo ena iyaloyalo yadua. Mera qai lagata vakavica na gone na sere taucoko. Cavuta vakalekaleka na nomu ivakadinadina baleta na bibi ni noda saga meda vakataki Jisu.

  simple pictures

  Sa vakarautaki tu na iyaloyalo ena sharingtime.lds.org