« គោលការណ៍ណែនាំ ៣ យ៉ាងសម្រាប់ប្រើប្រាស់បច្ចេកវិទ្យា និងប្រព័ន្ធផ្សព្វផ្សាយ » លីអាហូណា ខែ មីនា ឆ្នាំ ២០២៤ ។
គោលការណ៍ណែនាំ ៣ យ៉ាងសម្រាប់ប្រើប្រាស់បច្ចេកវិទ្យា និងប្រព័ន្ធផ្សព្វផ្សាយ
ពេលបច្ចេកវិទ្យានៅតែបន្តវិវត្ត វិធីសាស្ត្រទាំងនេះចំពោះប្រព័ន្ធផ្សព្វផ្សាយនឹងជួយយើងឲ្យឈានទៅមុខដោយប្រាជ្ញា ។
បច្ចេកវិទ្យាកំពុងផ្លាស់ប្តូរឥតឈប់ឈរ ។ ហើយរាល់ការរីកចម្រើននៃបច្ចេកវិទ្យាបាននាំមកនូវវិធីថ្មីដើម្បីប្រើប្រាស់ប្រព័ន្ធផ្សព្វផ្សាយ ។ ម៉ាស៊ីនបោះពុម្ពបានផ្លាស់ប្ដូរយ៉ាងខ្លាំងពីអ្នកដែលអាចឲ្យចូលប្រើពាក្យដែលបានសរសេរ ។ វិទ្យុ និងទូរទស្សន៍បានផ្លាស់ប្តូរយ៉ាងខ្លាំងពីរបៀបដែលយើងទាក់ទងដំណឹង ព័ត៌មាន និងការកម្សាន្ត ។ អ៊ីនធឺណិតបានផ្លាស់ប្ដូរចំនួនមាតិកាដែលយើងអាចចូលដំណើរការបាន និងនរណាអាចបង្កើតវាបាន ។ ប្រព័ន្ធផ្សព្វផ្សាយសង្គមបានផ្លាស់ប្ដូរសមត្ថភាពរបស់យើងក្នុងការស្វែងរក ការប្រាស្រ័យទាក់ទងជាមួយ និងការភ្ជាប់ជាមួយមនុស្សទាំងឡាយ ។ ពេលបញ្ញាសិប្បនិម្មិតលេចឡើង យើងកំពុងប្រឈមមុខនឹងសំណួរថ្មីៗជាច្រើន ។
បច្ចេកវិទ្យាថ្មីមិនដែលល្អ ឬអាក្រក់ទាំងអស់នោះទេ ។ ផ្ទុយទៅវិញ ជាញឹកញាប់វាដូចជាកែវពង្រីកដែលអាចពង្រីកឱកាសថ្មី និងការព្រួយបារម្ភថ្មី ។ ពេលយើងខិតខំធ្វើដូចជាព្រះគ្រីស្ទកាន់តែច្រើន នោះការឆ្លើយតបរបស់យើងចំពោះបច្ចេកវិទ្យាថ្មី និងប្រព័ន្ធផ្សព្វផ្សាយ ដែលវាអាចនាំមកចូលក្នុងជីវិតរបស់យើងគឺជាអ្វីដែលសំខាន់ ។
វិធីសាស្ត្រដែលមានមូលដ្ឋានលើគោលការណ៍
ពិតណាស់ គ្មានបញ្ជីច្បាប់ដើម្បីណែនាំរាល់ការសម្រេចចិត្តដែលយើងធ្វើអំពីបច្ចេកវិទ្យា និងប្រព័ន្ធផ្សព្វផ្សាយនោះទេ ។ ផ្ទុយទៅវិញ យើងអាចរៀនគោលការណ៍ដើម្បីជួយណែនាំយើង នៅពេលយើងធ្វើការជ្រើសរើស ។ អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់បានបង្រៀន ៖ « គោលការណ៍គឺអស់កល្ប និងជាសកល ។ ច្បាប់ ឬការអនុវត្តជាក់លាក់នៃគោលការណ៍ទាំងនោះអនុវត្តបានល្អនៅកន្លែងមួយចំនួន ប៉ុន្តែមិនអនុវត្តនៅកន្លែងផ្សេងទៀតទេ ។ អ្វីដែលរួបរួមយើងគឺព្រះយេស៊ូវគ្រីស្ទ និងសេចក្ដីពិតដ៏អស់កល្បជានិច្ចដែលទ្រង់បានបង្រៀន ទោះបីជាកម្មវិធីជាក់លាក់មួយចំនួនមានភាពខុសគ្នាគ្រប់ពេលវេលា និងទូទាំងវប្បធម៌ក៏ដោយ » ។១
ការធ្វើតាមគោលការណ៍ដោយផ្អែកលើសេចក្ដីពិតនៃដំណឹងល្អនឹងជួយយើងឲ្យនៅលើផ្លូវនៃសេចក្ដីសញ្ញា ។ ព្រះវិញ្ញាណនឹងណែនាំយើង នៅពេលយើងព្យាយាមធ្វើការជ្រើសរើសដោយផ្អែកលើគោលការណ៍ទាំងនោះ ។ ដូច្នេះ តើគោលការណ៍អ្វីខ្លះដែលអាចជួយណែនាំជម្រើសរបស់យើងអំពីបច្ចេកវិទ្យា និងប្រព័ន្ធផ្សព្វផ្សាយ ?
១. ខ្ញុំអាចប្រើសិទ្ធិជ្រើសរើសខាងសីលធម៌របស់ខ្ញុំ ដើម្បីធ្វើការជ្រើសរើសក្នុងការគ្រប់គ្រងបច្ចេកវិទ្យា ។ វាមិនគ្រប់គ្រងលើខ្ញុំទេ ។
ពេលខ្លះវាអាចមានអារម្មណ៍ថា បច្ចេកវិទ្យាកំពុងតែយកឈ្នះលើជីវិតរបស់បងប្អូន ។ វាសំខាន់ក្នុងការចងចាំថា បងប្អូនអាចធ្វើការជ្រើសរើសដើម្បីគ្រប់គ្រងបច្ចេកវិទ្យាបាន ។ វាមិនគ្រប់គ្រងលើបងប្អូនទេ ។ បងប្អូនអាចមានចេតនាក្នុងការជ្រើសរើសប្រើប្រាស់បច្ចេកវិទ្យា និងប្រព័ន្ធផ្សព្វផ្សាយដើម្បីសម្រេចបាននូវសេចក្តីល្អ និងស្វែងរករបស់ផងទាំងនេះ « គុណធម៌ គួរស្រឡាញ់ ឬឈ្មោះល្អ ឬក៏គួរឲ្យសរសើរ » ( មាត្រានៃសេចក្ដីជំនឿ ១:១៣ ) ។
ព្រះអម្ចាស់មានបន្ទូលថា « ដ្បិតយើងជាព្រះអម្ចាស់ មានកិច្ចការដ៏ធំសម្រាប់ឲ្យអ្នកប្រតិបត្តិ » ( គោលលទ្ធិ និងសេចក្តីសញ្ញា ១១២:៦ ) ។ សូមពិចារណាពីរបៀបដែលបងប្អូនអាចប្រើបច្ចេកវិទ្យា ដើម្បីសម្រេចបាននូវកិច្ចការដ៏អស្ចារ្យនោះ ហើយនៅតែ « ឧស្សាហ៍ចូលរួមក្នុងប្រយោជន៍ល្អ » ( គោលលទ្ធិ និងសេចក្តីសញ្ញា ៥៨:២៧ ) ។ បងប្អូនប្រហែលជាត្រូវប្រើបច្ចេកវិទ្យាក្នុងការងាររបស់បងប្អូន ។ បងប្អូនអាចប្រើវាដើម្បីស្វែងរកទម្រង់កម្សាន្តដ៏មានប្រយោជន៍ ។ វាអាចជួយបងប្អូនឲ្យភ្ជាប់ជាមួយអ្នកដទៃ ។ ហើយវាអាចជួយបងប្អូនឲ្យរៀន រីកចម្រើន និងសម្រេចកិច្ចការរបស់ព្រះអម្ចាស់បាន ។ ទោះជាយ៉ាងណាក៏ដោយ ការប្រើប្រាស់ផ្សេងទៀតអាចរំខាន មិនសមរម្យ ឬបង្កគ្រោះថ្នាក់បានផងដែរ ។ ជាជាងអនុញ្ញាតឲ្យបច្ចេកវិទ្យាគ្រប់គ្រងលើបងប្អូន សូមប្រើប្រាជ្ញា និងការណែនាំនៃព្រះវិញ្ញាណដើម្បីធ្វើឲ្យបងប្អូនមានជម្រើសជាអ្នកគ្រប់គ្រងវាវិញ ។
២. នៅពេលខ្ញុំប្រើសិទ្ធិជ្រើសរើសខាងសីលធម៌របស់ខ្ញុំដើម្បីរៀបចំផែនការនៅខាងមុខ ខ្ញុំមានអារម្មណ៍កាន់តែប្រសើរ និងធ្វើការជ្រើសរើសកាន់តែប្រសើរឡើង ។
ប្រហែលជាបងប្អូនមានបទពិសោធន៍មួយ ពេលបងប្អូនធ្វើការជ្រើសរើសទាក់ទងនឹងបច្ចេកវិទ្យាដែលមិនមានអារម្មណ៍ត្រឹមត្រូវ ។ វាប្រហែលជាពាក់ព័ន្ធនឹងប្រព័ន្ធផ្សព្វផ្សាយដែលបងប្អូនបានប្រើ ឬចំណាយពេលលើសកម្មភាពជាក់លាក់មួយ ។ ជំនួសឲ្យការផ្តោតអារម្មណ៍ទៅលើកំហុសដែលបងប្អូនបានធ្វើ វាល្អជាងក្នុងការផ្តោតអារម្មណ៍ទៅលើការបន្តរីកលូតលាស់ ។ ប្រសិនបើបងប្អូនរៀបគម្រោងទុកមុន នោះបងប្អូននឹងធ្វើការជ្រើសរើសកាន់តែប្រសើរជាងពេលបងប្អូននឹងជ្រើសរើសភ្លាមៗ ជាងដែលប្រសិនបើបងប្អូនធ្វើការសម្រេចចិត្តទាំងអស់នៅពេលនោះភ្លាមៗ ។ បងប្អូនអាចបង្កើតគោលការណ៍ណែនាំផ្ទាល់ខ្លួនដែលស្របតាមបទដ្ឋាននៃដំណឹងល្អ ដើម្បីជួយបងប្អូនឲ្យធ្វើការជ្រើសរើសល្អ ។
ប្រសិនបើបងប្អូនឃើញថាខ្លួនឯងប្រើប្រាស់ខុស ឬប្រើប្រាស់ប្រព័ន្ធផ្សព្វផ្សាយហួសហេតុ នោះសូមមានភាពក្លាហានដើម្បីព្យាយាមផ្លាស់ប្ដូរ ។ ឧទាហរណ៍ ប្រសិនបើទម្រង់ជាក់លាក់នៃប្រព័ន្ធផ្សព្វផ្សាយមិនបំផុសគំនិត ឬមិននាំមកនូវអារម្មណ៍ល្អទេ សូមកែតម្រូវទម្លាប់របស់បងប្អូន ។ ប្រសិនបើបងប្អូនកំពុងប្រើបច្ចេកវិទ្យាដើម្បីប្រើប្រព័ន្ធផ្សព្វផ្សាយ ឬចូលរួមក្នុងអាកប្បកិរិយាដែលបងប្អូនដឹងថាមិនត្រឹមត្រូវ សូមមានភាពក្លាហានក្នុងការផ្លាស់ប្តូរ—និងត្រូវមានភាពអត់ធ្មត់ជាមួយខ្លួនឯង នៅពេលដែលបងប្អូនព្យាយាមធ្វើការផ្លាស់ប្តូរទាំងនោះ ។ សូមគិតពីអ្វីដែលមានប្រយោជន៍មួយចំនួនដែលបងប្អូនអាចធ្វើបានដើម្បីផ្លាស់ប្ដូរ ។ ឧទាហរណ៍ ប្រសិនបើបងប្អូនមានការលំបាកក្នុងការធ្វើការសម្រេចចិត្តល្អនៅពេលវេលាជាក់លាក់មួយ នោះបងប្អូនអាចរៀបចំផែនការពេលវេលាដែលបងប្អូននឹងប្រើបច្ចេកវិទ្យា និងពេលវេលាដែលបងប្អូននឹងមិនប្រើបច្ចេកវិទ្យា ។
ដូចគ្នានេះដែរ ប្រសិនបើបងប្អូនកំពុងប្រើបច្ចេកវិទ្យាដើម្បីពង្រឹងខ្លួនឯង ភ្ជាប់ជាមួយអ្នកដទៃ ហើយសម្រេចកិច្ចការរបស់ព្រះអម្ចាស់ ហើយបងប្អូនមានអារម្មណ៍ពីព្រះវិញ្ញាណ នោះសូមបន្តធ្វើកិច្ចការទាំងនោះ ។ ពេលបងប្អូនពិតជាស្មោះត្រង់នឹងខ្លួនឯងអំពីជម្រើសរបស់បងប្អូន សេចក្តីជំនឿរបស់បងប្អូនទៅលើព្រះអម្ចាស់អាចជួយបងប្អូនឲ្យប្រើសិទ្ធិជ្រើសរើសរបស់បងប្អូនតាមរបៀបដែលនាំឲ្យបងប្អូនមានអារម្មណ៍កាន់តែល្អឡើង និងបន្តធ្វើការជ្រើសរើសកាន់តែប្រសើរឡើង ។
៣. ខ្ញុំអាចប្រើសិទ្ធិជ្រើសរើសខាងសីលធម៌របស់ខ្ញុំដើម្បីផ្អាក ហើយសម្រាក ។
បងប្អូនប្រហែលជាមានអារម្មណ៍ថា សំណួរអំពីបច្ចេកវិទ្យា និងប្រព័ន្ធផ្សព្វផ្សាយគឺមានឥតឈប់ឈរ ។ តើច្រើនប៉ុណ្ណាបានហៅថាច្រើនពេក ? តើខ្ញុំគួរបង្កើន ឬកាត់បន្ថយការប្រើប្រាស់ប្រព័ន្ធផ្សព្វផ្សាយ និងបច្ចេកវិទ្យាដែរឬទេ ? តើខ្ញុំប្រើពេលវេលារបស់ខ្ញុំដោយឈ្លាសវៃដែរឬទេ ? សូមព្យាយាមកុំឲ្យគំនិតបែបនេះមានលើបងប្អូន ។ សូមចាំថាវាមិនអីទេក្នុងការផ្អាក និងសម្រាកពីប្រព័ន្ធផ្សព្វផ្សាយ ។ ការសម្រាកអាចជាការជ្រើសរើសធ្វើសកម្មភាពផ្សេងក្រៅពីសម្លឹងមើលអេក្រង់រយៈពេលពីរបីម៉ោង ឬសូម្បីតែមិនប្រើបច្ចេកវិទ្យាជាក់លាក់មួយរយៈ ដូចជាប្រព័ន្ធផ្សព្វផ្សាយសង្គមជាដើម ។
បច្ចេកវិទ្យាផ្តល់នូវពរជ័យដ៏អស្ចារ្យដើម្បីជួយយើងឲ្យនៅតែមានទំនាក់ទំនងជាមួយអ្នកដទៃ ទោះជាយ៉ាងណាក៏ដោយ ដោយសារតែយើង អាច ភ្ជាប់នៅពេលណាក៏បាន នោះមិនមានន័យថាយើង ត្រូវ តែភ្ជាប់នៅពេលណាក៏បាននោះទេ ។ ព្រះអម្ចាស់ទ្រង់រំឭកយើងថា « ចូរបង្អង់សិន ឲ្យបានដឹងថា យើងជាព្រះ » ( គោលលទ្ធិ និងសេចក្តីសញ្ញា ១០១:១៦ ) ។ សូមប្រាកដថា បងប្អូនកំពុងចំណាយពេលដើម្បីភ្ជាប់ជាមួយនឹងទ្រង់ ។
ចូរមានប្រាជ្ញាឡើង
ដោយសារបច្ចេកវិទ្យានៅតែបន្តវិវត្ត យើងទាំងអស់គ្នានឹងប្រឈមមុខនឹងការសម្រេចចិត្តជាច្រើន ។ ជំនួសឲ្យការស្វែងរកច្បាប់ និងបញ្ជីជាក់លាក់នានាពីសាសនាចក្រ យើងអាចបែរទៅរកព្រះវរបិតាសួគ៌ ព្រះអង្គសង្រ្គោះ ព្រះគម្ពីរ និងប្រសាសន៍របស់ពួកព្យាការីសម័យទំនើបរកមើលគោលការណ៍ដើម្បីជួយណែនាំជម្រើសរបស់យើងបាន ។ ព្រះវិញ្ញាណនឹងជួយយើងឲ្យដឹងថា តើជម្រើសរបស់យើងត្រឹមត្រូវឬអត់ ។ ពាក្យរបស់យ៉ាកុបគឺអាចអនុវត្តបាននៅក្នុងសព្វថ្ងៃនេះ ដូចកាលពីមុននៅពេលលោកបានបង្រៀនពាក្យទាំងនោះជាលើកដំបូងដែរ ៖ « ចូរមានប្រាជ្ញាឡើង ចុះតើខ្ញុំអាចនិយាយអ្វីទៀត ? » ( យ៉ាកុប ៦:១២ ) ។