« ញៀនមើលរឿងភាគ ៖ របៀបដែលខ្ញុំទុកឲ្យព្រះឈ្នះ » លីអាហូណា ខែ មីនា ឆ្នាំ ២០២៤ ។
ញៀនមើលរឿងភាគ ៖ របៀបដែលខ្ញុំទុកឲ្យព្រះឈ្នះ
ពេលខ្ញុំលះបង់ចោលការមើលរឿងភាគនេះ ខ្ញុំមានអារម្មណ៍ថា ឥទ្ធិពលនៃព្រះវិញ្ញាណបរិសុទ្ធបានកើនឡើងក្នុងជីវិតខ្ញុំយ៉ាងខ្លាំង ។
ការជ្រើសរើសព្រះយេស៊ូវគ្រីស្ទនាំមកនូវអំណាចដ៏អស្ចារ្យ « ហើយយើងនឹងត្រូវការព្រះចេស្តារបស់ទ្រង់សម្រាប់ថ្ងៃខាងមុខកាន់តែខ្លាំង » ។១ ពិភពលោករបស់យើងកំពុងមានចលាចលយ៉ាងខ្លាំង ។ សត្រូវហាក់ដូចជាមានឥទ្ធិពលកាន់តែខ្លាំងទៅលើបុត្រាបុត្រីជាច្រើនរបស់ព្រះ ។ ភាពមិនបរិសុទ្ធត្រូវបានលើកតម្កើង ហើយការល្បួងរំខានយើង ហើយយកយើងចេញពីរឿងនោះដែលនឹងនាំយើងឲ្យខិតទៅជិតព្រះអម្ចាស់ ។
ដើម្បីយកឈ្នះលើរឿងនេះ យើងត្រូវតែជ្រើសរើសព្រះយេស៊ូវគ្រីស្ទយ៉ាងសកម្មក្នុងជីវិតរបស់យើង ហើយលះបង់ចោលអ្វីដែលធ្វើឲ្យព្រះវិញ្ញាណអាក់អន់ចិត្ត ។ មរ៉ូណៃ បានទូន្មានយើងថា « ចូរមានប្រាជ្ញា នៅក្នុងថ្ងៃទាំងឡាយនៃការសាកល្បងរបស់អ្នកចុះ ចូរគ្រលាស់ចេញពីខ្លួននូវអំពើពុំស្អាតស្អំទាំងអស់ » ( មរមន ៩:២៨ ) ហើយបានអញ្ជើញយើងឲ្យ « ចូរមករកព្រះគ្រីស្ទ ហើយឲ្យបានល្អឥតខ្ចោះនៅក្នុងទ្រង់ ហើយចូរលះបង់ចោលនូវអស់ទាំងអំពើដ៏ឥតបរិសុទ្ធចុះ … ហើយស្រឡាញ់ព្រះឲ្យអស់ពីសមត្ថភាព អស់ពីគំនិត និងអស់ពីកម្លាំងរបស់អ្នក » ( មរ៉ូណៃ ១០:៣២ ) ។
តើយើងអាចលះបង់ចោលអ្វីៗក្នុងលោកនេះ ហើយចូលមករកព្រះគ្រីស្ទដោយចេតនាកាន់តែខ្លាំងដោយរបៀបណា ? យើងម្នាក់ៗស្ថិតនៅកម្រិតផ្សេងគ្នានៅក្នុងដំណើរការនេះ ។ យើងទាំងអស់គ្នាអាចព្រលែងចោលអ្វីដែលកំពុងរារាំងយើងពីអារម្មណ៍នៃឥទ្ធិពលនៃព្រះវិញ្ញាណបរិសុទ្ធកាន់តែពេញលេញបាន ។ យើងត្រូវការអំណាចនៃដង្វាយធួនរបស់ព្រះអង្គសង្រ្គោះដើម្បីធ្វើវា ហើយវាចាប់ផ្តើមដោយការប្រើសិទ្ធិជ្រើសរើសរបស់យើងដើម្បីជ្រើសរើសយកទ្រង់ ។
បំណងប្រាថ្នាដើម្បីចូលចុះនឹងគេ
ពេលខ្ញុំរៀននៅវិទ្យាល័យ ខ្ញុំនៅក្នុងក្រុមលើកទឹកចិត្ត ។ ជារៀងរាល់ថ្ងៃនៅក្នុងពេលហាត់សម ក្មេងស្រីនៅក្នុងក្រុមលើកទឹកចិត្តរបស់ខ្ញុំទាំងនោះបាននិយាយអំពីអ្វីដែលបានកើតឡើងនៅក្នុងរឿងភាគលេងតាមទូរទស្សន៍នៅពេលថ្ងៃ ។ ខ្ញុំមិនដែលបានមើលវាទេ ហើយបានដឹងថា វាគឺជារឿងមួយដែលមានសីលធម៌មិនល្អទេ ។ ទោះជាយ៉ាងណាក៏ដោយ ខ្ញុំមានអារម្មណ៍ដូចជាដាច់ដោយឡែកពីគេរៀងរាល់ថ្ងៃ នៅពេលដែលក្មេងស្រីទាំងនោះបាននិយាយយ៉ាងរំភើបអំពីរឿងភាគនោះ ។ ព្រះវិញ្ញាណបានខ្សឹបប្រាប់ខ្ញុំកុំឲ្យមើលវា តែខ្ញុំពិតជាចង់មានគេរាប់បញ្ចូលក្នុងការសន្ទនារបស់ពួកគេដែរ ដូច្នេះខ្ញុំបានចាប់ផ្ដើមមើល ។
វាដូចជាមិនសូវអាក្រក់ទេចំពោះខ្ញុំ ។ ខ្ញុំបានដោះសារថា វានឹងមិនប៉ះពាល់ដល់ខ្ញុំទេ ។ ខ្ញុំដឹងថា ខ្ញុំនឹងមិនធ្វើរឿងអាក្រក់ដែលខ្ញុំបានឃើញតួអង្គនោះធ្វើទេ ។ ខ្ញុំបានញៀន ហើយបានមើលកម្មវិធីនេះជារៀងរាល់ថ្ងៃ ។ ពេលខ្ញុំទៅសាកលវិទ្យាល័យព្រិកហាំ យ៉ង់ ខ្ញុំបានរៀបចំកាលវិភាគថ្នាក់របស់ខ្ញុំ ធ្វើម៉េចដើម្បីខ្ញុំអាចមើលវាជារៀងរាល់ថ្ងៃបាន ។ ខ្ញុំមិនដែលខកខានមួយភាគនោះទេ ។
ខ្ញុំបានរៀបការ ហើយមានកូនដំបូងរបស់ខ្ញុំ ។ ខ្ញុំបានដាក់គាត់ឲ្យដេកជារៀងរាល់ថ្ងៃ ក្នុងអំឡុងពេលកម្មវិធីនោះដើម្បីខ្ញុំអាចមើលវាបាន ។
ជាច្រើនឆ្នាំកន្លងផុតទៅ ព្រះវិញ្ញាណបានខ្សឹបប្រាប់ខ្ញុំជាច្រើនដងថា ខ្ញុំគួរតែឈប់មើលកម្មវិធីនោះ ។ តែខ្ញុំមិនព្រមធ្វើតាម ។ ខ្ញុំបានជក់មើលយ៉ាងខ្លាំងជាមួយតួអង្គ និងជីវិតរបស់ពួកគេ ។ វាជាវិធីរបស់ខ្ញុំដើម្បីបន្ធូរអារម្មណ៍ ដូច្នេះខ្ញុំបានបន្តមើលទៀត ។ ខ្ញុំជឿជាក់ថា វាមិនធ្វើឲ្យខ្ញុំខូចខាតអ្វីនោះទេ ។
ការអញ្ជើញ
ដប់ប្រាំបួនឆ្នាំក្រោយពីវិទ្យាល័យ ខ្ញុំនៅតែមើលកម្មវិធីនេះជារៀងរាល់ថ្ងៃ ។ នៅក្នុងសន្និសីទទូទៅ ស៊ីស្ទើរ សឺរី អិល ឌូវ ដែលកាលនោះជាទីប្រឹក្សាទីពីរនៅក្នុងគណៈប្រធានសមាគមសង្គ្រោះទូទៅ បាននិយាយអំពីការដើរចេញពីពិភពលោក និងរឿងនានាដែលមិនបរិសុទ្ធ ។ បន្ទាប់មក គាត់បាននិយាយថា « ខ្ញុំសូមអញ្ជើញយើងម្នាក់ៗឲ្យកំណត់យ៉ាងហោចណាស់រឿងមួយដែលយើងអាចធ្វើបាន ដើម្បីដើរចេញពីពិភពលោកនេះ ហើយចូលទៅជិតព្រះគ្រីស្ទ » ។២
ពេលគាត់បានផ្តល់ការអញ្ជើញនោះ ខ្ញុំមានអារម្មណ៍យ៉ាងខ្លាំងពីព្រះវិញ្ញាណ ហើយខ្ញុំបានឮពាក្យទាំងនោះនៅក្នុងគំនិតរបស់ខ្ញុំថា « អ្នកត្រូវតែឈប់មើលកម្មវិធីនោះ ឥឡូវនេះ ! » វាមានឥទ្ធិពលខ្លាំងណាស់ វាហាក់ដូចជាដាល់ចំមុខខ្ញុំអ៊ីចឹង ។ ខ្ញុំបានដឹងភ្លាមៗពេលនោះថា ខ្ញុំមិនអាចមិនអើពើនឹងការបំផុសគំនិតនេះតទៅទៀតបានទេ ។ ខ្ញុំមានអារម្មណ៍ជាបន្ទាន់ក្នុងការឈប់មើលកម្មវិធីនេះទៀត ។ ខ្ញុំបានដឹងថា គ្មានតួអង្គណាម្នាក់ធ្វើអ្វីដែលមានគុណធម៌ ឬមានកិត្តិយសទេ ។ ខ្ញុំបានអញ្ជើញសម្រាមឲ្យចូលមកក្នុងជីវិតខ្ញុំជារៀងរាល់ថ្ងៃ ។ ខ្ញុំប្តេជ្ញាចិត្តចំពោះព្រះអម្ចាស់នៅពេលនោះ និងនៅទីនោះភ្លាមថា ខ្ញុំនឹងមិនមើលវាជាដាច់ខាត ។
វាមិនងាយស្រួលទេ ! ទម្លាប់ និងការញៀនដប់ប្រាំបួនឆ្នាំគឺពិបាកបំបែកខ្លាំងណាស់ ។ ថ្ងៃចន្ទបានមកដល់ ហើយវាគឺជាពេលមើលកម្មវិធីនោះចាប់ផ្តើម ។ ខ្ញុំបានដើរទៅឧបករណ៍បញ្ជាទូរទស្សន៍ ។ ខ្ញុំចង់បើកទូរទស្សន៍ខ្លាំងមែនទែន ។ ខ្ញុំចងចាំពីការតាំងចិត្តរបស់ខ្ញុំចំពោះព្រះអម្ចាស់ថា ខ្ញុំនឹងមិនមើលវាតទៅទៀតជាដាច់ខាត ។ ខ្ញុំបានដើរចេញ ។
បន្ទាប់មក ខ្ញុំបានគិតអំពីតួអង្គដែលខ្ញុំចូលចិត្ត ហើយឆ្ងល់ថា តើមានអ្វីកើតឡើងចំពោះនាង ហើយបានដើរត្រឡប់ទៅរកឧបករណ៍បញ្ជាទូរទស្សន៍វិញ ។ ខ្ញុំបានដឹងថា ខ្ញុំត្រូវការជំនួយពីព្រះ ដូច្នេះខ្ញុំបានលុតជង្គង់ចុះ ហើយអធិស្ឋានសូមកម្លាំងដើម្បីកុំឲ្យចង់មើលវាទៀត ។ ខ្ញុំបានគិតពីការសន្យារបស់ខ្ញុំចំពោះព្រះវរបិតាសួគ៌ ហើយខ្ញុំបានដើរចេញពីបន្ទប់នោះ ។ ខ្ញុំបានជ្រើសរើសធ្វើតាមការបំផុសគំនិតដែលខ្ញុំបានទទួលមកពីព្រះវិញ្ញាណបរិសុទ្ធ ហើយគោរពការតាំងចិត្តរបស់ខ្ញុំ ។
ស្ថានភាពនោះបានកើតឡើងម្តងហើយម្តងទៀតជារៀងរាល់ថ្ងៃនៅក្នុងសប្តាហ៍នោះ និងនៅសប្តាហ៍ក្រោយផងដែរ ។ ជារៀងរាល់ថ្ងៃ ខ្ញុំបានលុតជង្គង់ចុះ ហើយអធិស្ឋាន និងបានអង្វរសុំឲ្យមានកម្លាំងដើម្បីកុំមើល ហើយជារៀងរាល់ថ្ងៃ ខ្ញុំបានជ្រើសរើសយកព្រះយេស៊ូវគ្រីស្ទ ហើយបានដើរចេញពីកម្មវិធីទូរទស្សន៍មួយដែលអសីលធម៌ ។ ខ្ញុំបានទទួលកម្លាំងដើម្បីយកឈ្នះពីអំណាចដែលព្រះអង្គសង្គ្រោះផ្ដល់ឲ្យតាមរយៈដង្វាយធួនរបស់ទ្រង់ ។
ក្រោយពីបានធ្វើបែបនេះមួយរយៈមក អព្ភូតហេតុមួយបានកើតឡើង ។ ខ្ញុំបានបាត់បង់ចំណង់ទាំងស្រុងក្នុងការមើលកម្មវិធីនោះ បន្ទាប់ពីបានមើលកម្មវិធីនេះជារៀងរាល់ថ្ងៃអស់រយៈពេល ១៩ ឆ្នាំ ។ វាពិតជាអស្ចារ្យណាស់ ! ខ្ញុំក៏បានបាត់បង់ចំណង់មើលកម្មវិធីដែលគួរឲ្យសង្ស័យទាំងអស់ដែលខ្ញុំធ្លាប់បានមើលផងដែរ ដូច្នេះខ្ញុំបានឈប់ទាំងស្រុង ។
មនសិការរបស់ខ្ញុំបានច្បាស់ ហើយខ្ញុំទទួលស្គាល់អ្វីដែលជាអំពើអាក្រក់នោះ ។ ខ្ញុំពិតជាចង់ចៀសវាងពីភាពអាក្រក់ទាំងអស់ ( សូមមើល ថេស្សាឡូនិច ទី១ ៥:២២ ) ។ ខ្ញុំលែងមានចិត្តចង់មើលវាទៀតហើយ ។
ពរជ័យដ៏អស្ចារ្យបំផុត
ប៉ុន្តែអ្វីដែលអស្ចារ្យបំផុតដែលបានកើតឡើង គឺខ្ញុំមានអារម្មណ៍ថា ឥទ្ធិពលនៃព្រះវិញ្ញាណបរិសុទ្ធបានកើនឡើងក្នុងជីវិតរបស់ខ្ញុំ ហួសពីអ្វីដែលខ្ញុំធ្លាប់មានពីមុនមក ។ ការរីកចម្រើនខាងវិញ្ញាណរបស់ខ្ញុំបានបង្កើនល្បឿនយ៉ាងខ្លាំង ! អស់ជាច្រើនឆ្នាំមកហើយដែលខ្ញុំបានគិតថា ខ្ញុំរីករាយនឹងភាពជាដៃគូរបស់ព្រះវិញ្ញាណបរិសុទ្ធ ប៉ុន្តែខ្ញុំបានមានបទពិសោធន៍នោះតែមួយផ្នែកតូចប៉ុណ្ណោះ ។ ខ្ញុំបានដឹងថា ការមើលកម្មវិធីទាំងនោះរៀងរាល់ពេលបានប៉ះពាល់ដល់ខ្ញុំ ។ ខ្ញុំបានខកខានអស់ជាច្រើនឆ្នាំក្នុងការមានដៃគូដ៏រឹងមាំជាមួយព្រះ ។ ពេលខ្ញុំបានប្រើសិទ្ធិជ្រើសរើសរបស់ខ្ញុំដើម្បីបោះបង់ចោលអ្វីៗដែលមិនបរិសុទ្ធ អ្វីៗរបស់លោកិយ នោះព្រះវិញ្ញាណមានសេរីភាពក្នុងការមករកខ្ញុំកាន់តែខ្លាំង ហើយវាជាភាពខុសគ្នាដ៏អស្ចារ្យមួយដែលបានកើតឡើងក្នុងជីវិតរបស់ខ្ញុំ ដើម្បីពង្រឹង លួងលោម និងណែនាំដល់ខ្ញុំ ។
យើងមានទំនោរតោងជាប់យ៉ាងណែនចំពោះអ្វីដែលគ្មានតម្លៃ—គឺអ្វីដែលធ្វើឲ្យទ្វារបិទចំពោះពរជ័យដែលព្រះចង់នាំចូលមកក្នុងជីវិតរបស់យើង ។ ហេតុអ្វីយើងសុខចិត្តប្តូរឥទ្ធិពលនៃព្រះវិញ្ញាណដ៏មានអំណាច ដើម្បីភាពសប្បាយរីករាយ ឬប្រជាប្រិយភាព ? ប្រហែលជាការមើលកម្មវិធីទូរទស្សន៍មួយមិនមែនជារឿងធំ ឬអំពើបាបដ៏ធំនោះទេ ប៉ុន្តែវារារាំងខ្ញុំពីការមានព្រះវិញ្ញាណបរិសុទ្ធដោយបរិបូរក្នុងជីវិតរបស់ខ្ញុំ ហើយធ្វើឲ្យការរីកចម្រើនខាងវិញ្ញាណរបស់ខ្ញុំចុះថយ ។
ខ្ញុំមានអំណរគុណខ្លាំងណាស់ដែលព្រះអម្ចាស់មិនបានបោះបង់ចោលខ្ញុំ ប៉ុន្តែបានបន្តសុំខ្ញុំដោយអត់ធ្មត់ឲ្យបោះបង់ចោលអ្វីមួយដែលមិនបរិសុទ្ធ ដើម្បីទ្រង់អាចបំពេញជីវិតរបស់ខ្ញុំឲ្យពោរពេញហូហៀរដោយឥទ្ធិពលរបស់ទ្រង់ ។
អ្នកនិពន្ធរស់នៅរដ្ឋយូថាហ៍ស.រ.អា. ។