Digital Lamang
15 ka Paagi sa Pag-ugmad og Hingpit nga Kalipay Kon Kamo Mobati og Kaguol
Mibati nga nag-inusara? Ang Langitnong Amahan naghatag nato og daghang paagi aron mobati sa Iyang kahayag ug gugma nga modala kanato latas sa lisod nga mga panahon.
Mga katuigan na ang milabay, usa ka higala naghisgot nga sa higayon nga lisod ang iyang adlaw (o semana) ug magkinahanglan siya og dugang pa nga kahayag sa iyang kinabuhi, mangita siya og usa ka sugo nga angayng sundon. Siyempre naningkamot siya nga mosunod kanunay sa mga sugo tungod sa iyang gugma sa Dios. Bag-o lang usab niyang nasayran nga mobati siya og dugang pa nga kahayag—dihadiha dayon—pinaagi sa tuyo nga pagpangita og tawo nga serbisyohan o pinaagi sa pagbuhat pa sa family history o pagbasa pa sa mga kasulatan o pinaagi sa pagpahayag pa og pasalamat alang sa mga panalangin nga gihatag sa Langitnong Amahan. Ang mga pulong sa akong higala nagpabilin nako, ug nagpahinumdom kini nako nga “kon kita makadawat og bisan unsa nga panalangin gikan sa Dios, kini tungod sa pagsunod niana nga balaod diin diha kini gipasikad” (Doktrina ug mga Pakigsaad 130:21). Gidala nako kanang sama nga hunahuna sa higayon nga magkinahanglan ko og dugang nga paglaom, kahupayan, kalinaw, o hingpit nga kalipay.
Kon gusto kita nga makadawat og dugang nga kalipay1 sa atong kinabuhi kon kita mobati og kaguol (o bisan kanus-a!), mahimo natong lihokon ang mga pagdapit sa Ginoo uban nianang gisaad nga panalangin. Ania ang 15 ka ehemplo niadto nga mga pagdapit nga gihatag pinaagi sa Iyang Apostoles nga nagdala og dugang kalipay sa akong kinabuhi nga makadala usab og dugang nga kalipay sa imong kinabuhi!2
1. Motutok sa mga Koneksyon nga Anaa Kaninyo
Kita kasagaran mobati nga nag-inusara tungod sa kakulang sa piho nga koneksyon nga atong gitinguha. Apan hinumdomi nga sa kanunay adunay usa ka tawo nga mapangayoan og tabang. Tingali ang pamilya kini, mga higala, mga kauban sa trabaho, tigpangalagad nga mga igsoong lalaki ug mga igsoong babaye o ubang mga lider sa Simbahan. Maghunahuna ug mokonektar sa mga tawo nga gihatag sa Ginoo sa inyong kinabuhi aron mobayaw ug mopanalangin kaninyo.
Sama sa gitudlo ni Presidente Dallin H. Oaks: “Hatagi og bili ug palamboa ang panagsuod sa inyong mga pamilya. … Ug hatagi og bili ang inyong panaghigalaay ug ang mga oportunidad sa pagkat-on ug pagserbisyo, kay kana nga mga paningkamot mahimong mosangpot usab ngadto sa hingpit nga kalipay nga mahangtoron.”3 Ug sama sa gidapit kanato ni Elder Quentin L. Cook sa Korum sa Napulog Duha ka Apostoles: “Ako moawhag kaninyo nga dili motutok sa mga koneksyon nga wala kaninyo—apan motutok sa mga koneksyon sa pamilya nga anaa kaninyo. Kon kamo mobuhat sa ingon, kamo mapanalanginan og dugang nga kasuod ug hingpit nga kalipay uban sa inyong mga minahal.”4
2. Motabang ug Moserbisyo
Ang pagtutok sa uban makatabang nato nga mabuntog ang mga pagbati sa kaguol. Tingali lisod ang pagtabang karong panahona, o tingali naghunahuna kita kon ang mga tawo nagkinahanglan ba sa atong tabang. Apan mahimo kita nga mag-ampo sa Langitnong Amahan aron masayod kon kinsa ang nanginahanglan sa atong tabang, ug Siya mogiya nato niadtong atong panalanginan (ug diin seguradong makapanalangin usab nato isip balos), tungod kay sa kanunay adunay usa ka tawo nga nanginahanglan sa atong tabang.
Si Presidente M. Russell Ballard, Akting nga Presidente sa Korum sa Napulog Duha ka Apostoles, mipahinumdom nato:
“Nagpuyo kita sa kalibotan nga walay kasiguroan, komplikado, ug makalibog. Ang mga panginahanglan sa matag adlaw nga kinabuhi makapaluya nato. Ako nagtuo nga adunay usa ka yano apan tiunay nga baroganan nga makatabang nato nga makalingkawas niining makatanggong nga mga kutay sa mga hagit aron makakaplag og kalinaw sa hunahuna ug kalipay: pagserbisyo sa usag usa.
“Adunay daghang gagmay ug yano nga mga paagi ug mga kahimtang diin makahimo kita sa pagserbisyo ug paghigugma sa uban diha sa panimalay, sa simbahan, ug sa atong mga komunidad.
“Ang dagkong mga butang mapahinabo pinaagi sa yano ug gagmay nga mga buhat sa kamabination ug pagserbisyo. Matigom kini ngadto sa usa ka kinabuhi nga puno sa gugma alang sa Langitnong Amahan, debosyon sa buhat ni Ginoong Jesukristo, ug pagbati sa kalinaw ug kalipay sa matag higayon nga kita motabang sa usag usa.”5
3. Mopamatuod sa Langitnong Amahan ug ni Jesukristo
Sa personal man, sa social media, o bisan diha sa mga journal o sa Mga Handomanan sa FamilySearch alang sa umaabot nga mga henerasyon, kita makapamatuod sa Langitnong Amahan ug ni Jesukristo. Ang pagbuhat sa ingon makatabang nato nga mobati sama sa giingon ni Elder David A. Bednar sa Korum sa Napulog Duha ka Apostoles: “Usa sa labing dako nga mga kalipay sa akong kinabuhi mao ang pagpamatuod sa atong Manunubos ug pagdapit sa uban sa pagsunod Kaniya. Ako modapit sa tanan sa pagkat-on kang Jesukristo ug sa pagduol ngadto Kaniya.”6
Si Alma mipakigbahin usab og susama nga kasinatian sa dihang siya mirekord, “Tingali ako mahimo unta nga himan diha sa mga kamot sa Dios aron sa pagdala sa pipila ka mga kalag ngadto sa paghinulsol; ug kini mao ang akong hingpit nga kalipay” (Alma 29:9).
4. Mokanta og Himno
Sama sa gitudlo sa Unang Kapangulohan:
“Ang mga himno makahatag og dakong kaayohan kanato isip mga indibidwal. Ang mga himno makapabayaw sa atong mga espiritu, makahatag kanato og kaisog, ug modasig kanato ngadto sa matarong nga lihok. Mopuno kini sa atong mga kalag og langitnong mga hunahuna ug magdala nato og diwa sa kalinaw. …
“… Kita mosag-ulo ug mamalandong niini, mosaysay ug mokanta niini, ug moambit sa espirituhanong kaayohan niini.”7
Nasayod usab kita sa maanindot nga saad diha sa Doktrina ug mga Pakigsaad 25:12: “Kay ang akong kalag mahimuot sa awit sa kasingkasing; oo, ang awit sa mga matarong mao ang usa ka pag-ampo ngari kanako, ug pagatubagon uban sa usa ka panalangin diha sa ilang mga ulo.”
Makita ninyo ang nagkalainlaing musika aron sa pagbayaw kaninyo diha sa “Musika” nga seksiyon sa Gospel Library nga app.
5. Mosalig sa Dios ug Nga Siya Nasayod Unsay Inyong Gibati
Ang mga panahon sa atong pag-inusara tingali dili molabay dihadiha dayon, apan ang Langitnong Amahan ug si Jesukristo sa kanunay magauban kanato. Ug uban Kanila, kita dili gayod mobati nga nag-inusara. Kon kita mosalig nga Sila nakaila nato ug nasayod unsay atong gibati, ang atong mga espiritu mahimong mabayaw. Sama sa gipakigbahin ni Presidente Henry B. Eyring, Ikaduhang Magtatambag sa Unang Kapangulohan:
“Ang kangitngit nga moabot kon kita mosinati og kalisdanan makapabati nato nga sinalikway ug nag-inusara. Hinuon, sa dihang si Jesukristo miula alang nato didto sa Tanaman sa Getsemani, Siya wala lamang mohimo niini alang sa atong mga sala. Siya usab mibati sa kasakit ug kaguol nga atong bation kon motumaw ang mga pagsulay. Bisan unsa pa tingali ka walay seguro sa dalan sa unahan, sa kanunay adunay Tawo nga nakalakaw sa samang dalan ug makagiya kanato subay niini.
“Kay nasayod niini, ako mosaad nga kita mahimong mobati og hingpit nga kalipay ug positibo atol sa atong mga pagsulay—dili lang tungod kay kita nagpaabot sa mga panahon nga mahimong mas maayo o mas sayon, apan tungod kay kita misalig Kaniya. Kita adunay igong pagsalig Kaniya nga kita mag-ampo ug mangayo og tabang. Kita misalig nga Siya hingpit nga nakasabot unsay atong gibati atol niini nga mga panahon. Makahatag kini nato og kompiyansa nga sa umaabot, mamaayo ra ang tanan.”8
Si Elder Bednar usab adunay susama nga saad: “Ang Manluluwas hingpit nga nakasabot sa atong pag-antos. Tungod kay Iyang gipas-an ang atong mga kasagmuyo, mga kahuyang, ug kasakit, Siya makasuporta ug makalig-on kanato. Siya molig-on sa atong mga hunahuna ug mga espiritu. Siya molig-on kanato sa pisikal ug sa matag paagi nga gikinahanglan aron mabuhat ang mga butang nga angay natong buhaton. Kon kita modangop Kaniya, kita dili mag-inusara.”9
6. Magtinguha og Kausaban ug Kalamboan
Usahay kita mapanalanginan sa pagbuntog sa atong kaguol pinaagi sa pag-apil diha sa bag-ong pagkat-on ug mga kalihokan. Naglakip kini sa unsay gitawag ni Presidente Russell M. Nelson nga “ang kalipay sa inadlaw nga paghinulsol”10 ug usa sa tibuok kinabuhi nga pagkat-on og bag-ong mga kahanas.
Sama sa gitudlo ni Presidente Nelson: “Dawaton nato ang hingpit ug bililhon nga gasa sa Dios. Atong itugyan ang atong mga kabalaka ug mga sala sa tiilan sa Manluluwas ug makasinati sa hingpit nga kalipay nga moabot gikan sa paghinulsol ug pag-usab.”11
Si Elder Cook mipakigbahin usab sa mga kaayohan sa paglambo sa laing mga paagi:
“Ang Manluluwas, sa pagbayad sa silot sa atong mga sala, wala mokuha gikan kanato sa personal nga responsibilidad kon giunsa nato sa pagpuyo ang atong kinabuhi. Ang kaimportante sa pagtrabaho, kakugi, paghago uban sa atong kusog, pagpalambo sa atong mga talento, ug pagsangkap alang sa mga pamilya kanunayng giproklamar diha sa mga kasulatan sukad sa sinugdanan.
“Ang akong hagit ninyo mao ang pagsusi sa inyong mga tumong ug pagtino hain niini ang magtugot kaninyo nga matuman ang mga obligasyon sa pamilya, magpabilin kaninyo sa inyong dalan sa pakigsaad, ug magtugot kaninyo nga makabaton sa kalipay nga gusto sa Ginoo alang kaninyo. Hinumdomi, ang pagbaton og tumong magtugot kaninyo nga makadaginot og panahon ug paningkamot pinaagi sa sayo nga pagplano ug dili mataligam-an ang importante nga mga panginahanglanon ug mga tagal sa panahon [deadline].”12
Bisan ang Manluluwas mipakita nato sa kaimportante sa padayon nga paglambo, kay Siya “mitubo sa lawas ug sa kinaadman ug gikahimut-an siya sa Dios ug sa mga tawo” (Lucas 2:52).
7. Motutok diha sa Inyong mga Pakigsaad
Bisan sa atong labing lisod nga mga panahon, kita makatutok sa mahangtorong mga panalangin nga anaa kanato, diin wala pa maangkon sa kadaghanan sa mga tawo sa kalibotan, pinaagi sa atong mga pakigsaad. Ikonsiderar ang mga panalangin ug gahom sa pagkapari nga atong makuha, lakip na ang pag-apil sa sakramento matag semana ug pag-akses sa gahom nga atong nadawat (o madawat) diha sa balay sa Ginoo. Si Elder Bednar nagtudlo bahin niining maanindot nga panalangin ug hingpit nga kalipay:
“Ang pagtuman ug paghigugma sa mga pasalig sa pakigsaad momugna og koneksyon ngadto sa Ginoo nga personal kaayo ug gamhanan sa espirituhanong paagi. Samtang atong tahoron ang mga kondisyon sa sagrado nga mga pakigsaad ug mga ordinansa, kita sa hinay-hinay ug sa ginagmay nga paagi mapaduol ngadto Kaniya ug makasinati sa pagkamahinungdanon sa Iyang pagkabalaan ug buhing kamatuoran sa atong mga kinabuhi.
“Ako mosaksi nga ang mga koneksyon ngadto sa nabanhaw ug buhi nga Anak sa Dios posible, tinuod ug mao ang labing taas nga tinubdan sa kasigurohan, kalinaw, hingpit nga kalipay, ug mao ang espirituwal nga kalig-on nga maghatag kanato og katakos aron ‘[dili] [ma]hadlok, sa kaaway.’”13
Si Elder Stevenson mitudlo og dugang: “Ang ‘perlas nga labing bililhon’ mao ang mga ordinansa, mga pakigsaad, mga saad, ug instruksiyon nga madawat [didto sa templo]. Mao kini ang kalipay ug kamaya nga gibati niadtong anaa sa duha ka habig sa tabil samtang modawat sila sa mga panalangin ug moduol ngadto ni Kristo.” Ako modapit ninyo nga “pamalandongan ang kalinaw nga moabot gikan sa pagsimba ug pagserbisyo sa templo.”14
8. Magtuon sa mga Pulong sa Manluluwas aron Mapaduol ngadto Kaniya
Si Presidente Eyring mipakigbahin:
“Samtang gitun-an nako ang mga pulong sa Manluluwas ug sa Iyang kinabuhi, makaila ako Kaniya ug mohigugma Kaniya sa unsay Iyang nabuhat alang sa matag usa kanato. …
“‘Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag kondili makabaton hinuon sa kinabuhing dayon’ (Juan 3:16).
“Ang gasa nga mao ang Anak sa Dios usa ka bililhon nga gasa. Siya mao ang gasa nga maghayag sa atong agianan ug magbayaw kanato. Siya mao ang gasa nga mopaluyo kanato latas sa lisod nga mga adlaw sa atong mortal nga panaw. Siya mao ang gasa nga nagtanyag og balaan nga gugma, malungtaron nga paglaom, ug tinuod nga kalipay.”15
Kon mas magkat-on kita bahin sa Manluluwas ug mopaduol ngadto Kaniya, mas bation nato ang Iyang tinuod nga kalipay. Si Lehi mipakigbahin kon sa unsang paagi nga kini nakapanalangin niya sa dihang, samtang nagbasa siya sa mga kasulatan, “siya napuno sa Espiritu sa Ginoo” (1 Nephi 1:12).
Maangkon usab nato kini nga saad kon kita mobasa sa Basahon ni Mormon, sama sa gitudlo ni Elder Ronald A. Rasband sa Korum sa Napulog Duha ka Apostoles: “Ako modapit ninyo sa pagbasa sa Basahon ni Mormon ug sa pagsunod sa mga pagtulon-an ni Jesukristo nga anaa niining balaan nga basahon. Samtang kamo mobuhat niini, kamo makakaplag og dugang nga hingpit nga kalipay ug kalinaw dinhi niini nga kinabuhi ug sa kinabuhi nga umaabot. Ako nasayod nga kini tinuod.”16
9. Madagayaong Modayeg sa Uban
Ang pagpakigbahin sa maayo nga mga pulong mahitungod sa uban makatabang usab nato nga mobati og mas maayo! Si Presidente Eyring mitudlo, “Ako makasaad kaninyo og usa ka pagbati sa kalinaw ug hingpit nga kalipay kon kamo [madagayaong] modayeg sa uban diha sa Kahayag ni Kristo.”17
10. Magpasalamat
Ang kinaiya sa pagpasalamat makapanindot sa adlaw! Sama sa gipakigbahin ni Elder Dieter F. Uchtdorf sa Korum sa Napulog Duha ka Apostoles:
“Bisan unsa pa ang atong kahimtang, bisan unsa pa ang atong mga hagit o pagsulay, adunay usa ka butang sa matag adlaw nga angayng hangpon. Adunay usa ka butang sa matag adlaw nga angayang pasalamatan ug makahatag og kalipay kon kita tinuorayng makakita ug makadayeg niini.
“Tingali kon kita motan-aw mas gamiton nato ang atong kasingkasing kaysa atong mga mata. Ganahan ko sa kinutlo: ‘Ang tawo mas klarong makakita gamit ang kasingkasing. Ang bisan unsang butang nga mahinungdanon dili makita sa mga mata’ [Antoine de Saint-Exupéry, The Little Prince, trans. Richard Howard (2000), 63].
“Kita gimandoan sa ‘paghatag og mga pasalamat sa tanang mga butang’ [Mosiah 26:39]. Dili ba mas maayo nga motan-aw pinaagi sa atong mga mata ug kasingkasing aron kita mahimong mapasalamaton, kaysa padak-on ang atong kasamtangang negatibong kondisyon?”18
11. Magkahiusa
Tingali ang inyong gibati nga kaguol naggikan sa pagbati nga ang inyong mga hunahuna ug mga ideya wala masabti sa uban. Kon mao, hinumdomi kini nga saad gikan ni Presidente Eyring:
“Atong nasayran gikan sa kasinatian nga ang hingpit nga kalipay moabot kon kita mapanalanginan og panaghiusa. Kita nangandoy, isip espiritu nga mga anak sa atong Langitnong Amahan alang nianang hingpit nga kalipay nga sa makausa anaa kanato uban Kaniya sa kinabuhi sa wala pa kini nga kinabuhi. Ang Iyang tinguha mao ang paghatag kanato nianang sagrado nga pangandoy nga magkahiusa gikan sa Iyang gugma alang kanato.
“Siya dili mahimong mohatag niini ngari kanato isip mga indibidwal. Ang hingpit nga kalipay sa panaghiusa nga gusto Niya ihatag kanato dili alang sa mga indibidwal lamang. Kita kinahanglan nga motinguha niini ug mopasarang alang niini kuyog sa uban. Mao nga dili ikatingala nga ang Dios miawhag kanato sa pagpundok aron Siya makapanalangin kanato. Iyang gusto nga kita magkapundok diha sa pamilya. Siya miestablisar og mga klase, mga ward, ug mga branch ug misugo kanato sa pagtigom kanunay. Diha niana nga mga panagpundok, nga gipahiangay sa Dios alang kanato, anaa ang atong dakong oportunidad. Makaampo kita ug motrabaho alang sa panaghiusa nga maghatag kanato og kalipay ug mopadako sa atong gahom sa pagserbisyo.
“Ngadto sa Tulo ka mga Nephite, ang Manluluwas misaad og hingpit nga kalipay diha sa panaghiusa uban Kaniya isip ilang kataposang ganti human sa ilang matinud-anon nga pagserbisyo. Siya miingon, ‘Kamo makaangkon og kapuno sa hingpit nga kalipay; ug kamo molingkod diha sa gingharian sa akong Amahan; oo, ang inyong hingpit nga kalipay mapuno, ingon nga ang Amahan naghatag kanako sa kahingpitan sa hingpit nga kalipay; ug kamo mahisama kanako, ug Ako sama sa Amahan; ug ang Amahan ug Ako usa ra’ [3 Nephi 28:10].”19
Padayon sa pagpangita og mga oportunidad sa pagtinambagay diha sa mga pamilya, mga ward, ug ubang mga yunit. Ug ikonsiderar ang mga baroganan nga mosangpot ngadto sa epektibo nga pagtinambagay diha sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 4.4.
12. Mag-ugmad
Mangita og butang nga ugmaron, bisan kon pahiyom man kini, buhat sa art, usa ka piraso nga muwebles, o limpyo nga luna. Ikonsiderar kini nga mga pulong gikan ni Elder Uchtdorf: “Unsa sa inyong pagtuo ang labing dakong posible nga kalipay? Alang nako, ang tubag niini nga pangutana mao, ang kalipay sa Dios. Kini magdala ngadto sa laing pangutana: Unsa ang kalipay sa atong Langitnong Amahan? … Ang paglalang ug pagkapuangod duha ka mga katuyoan nga naghatag sa hingpit nga kalipay sa atong Langitnong Amahan. … Ang paglalang maghatag og halawom nga katagbawan ug katumanan.”20
13. Modapit sa Espiritu Santo nganha sa Inyong Kinabuhi
Ang Espiritu Santo magdala og kalipay sa atong kinabuhi, busa ang bisan unsa nga butang nga atong buhaton nga modapit Kaniya sa atong adlaw makatabang nato nga bation kanang hingpit nga kalipay. Sama sa gitudlo sa mga kasulatan, “Apan ang Espiritu naghatag sa gugma, kalipay, kalinaw, pailob, kaluoy, kaayo, pagkamaminatud-on” (Mga Taga-Galacia 5:22). Ug diha sa Doktrina ug mga Pakigsaad 11:13, kita gisaaran sa atong Manluluwas, “Ako mohatag nganha kanimo sa akong Espiritu, nga mohatag og kahayag sa imong hunahuna, nga mopuno sa imong kalag uban sa hingpit nga kalipay.”
14. Magmasulondon
Ang hingpit nga kalipay “usa ka kahimtang sa dako nga kalipay nga moabot gikan sa matarong nga pagpuyo. Ang katuyoan sa mortal nga kinabuhi mao aron ang mga tawo makabaton og hingpit nga kalipay(2 Ne. 2:22–25). Ang hingpit nga kalipay moabot lamang pinaagi kang Jesukristo (Juan 15:[10–]11; D&P 93:33–34; 101:36).”21
Bisan kon ang pagkamasulondon wala mosaad nato og usa ka kalibotan nga walay mga hagit ug mga kalisdanan, makatabang kini kanato nga makabaton og kalig-on ug hingpit nga kalipay aron makapadayon latas niini. Sama sa gitudlo ni Elder Benjamín De Hoyos sa Seventy: “Ang kalipay usa ka kahimtang sa kalag. Kining malipayong kahimtang nagagikan isip resulta sa matarong nga pagpuyo.”22
Ug kita gidapit sa Mosiah 2:41 nga “maghunahuna sa bulahan ug sa malipayon nga kahimtang niadto nga naghupot sa mga sugo sa Dios. Kay tan-awa, sila bulahan sa tanan nga mga butang, sa temporal ug sa espirituhanon.”
15. Mag-ampo
Ang Langitnong Amahan nahigugma gayod sa matag usa nato isip Iyang mga anak. Gusto niya nga atong bation ang hingpit nga kalipay sa pagkahimong Iyang minahal nga mga anak nga lalaki ug mga anak nga babaye. Anaa Siya sa kanunay alang nato, ug sa kanunay makadangop kita ngadto Kaniya. Sama sa gitudlo diha sa Doktrina ug mga Pakigsaad 136:29, “Kon ikaw magmasulub-on, tawga ang Ginoo nga inyong Dios uban sa pangamuyo, nga ang inyong mga kalag unta magmalipayon.”
Sama sa gipahinumdom ni Elder Rasband nato: “Ang Langitnong Amahan ug si Jesukristo nahigugma kanato sa hilabihan. Mga anak kita sa Dios. Ipaambit gayod nato kining mahinungdanong kamatuoran ngadto sa tanan nga atong nailhan. Wala gayod kita mag-inusara. Diha sa Langitnong Amahan ug ni Jesukristo, duna kitay padayon nga paghigalaay ug suporta.”23
Diha sa Tanang Butang: Mosunod kang Jesukristo
Labaw sa tanan, ang atong labing importante ug mahangtorong hingpit nga kalipay moabot pinaagi sa pagsunod sa ehemplo sa Manluluwas diha sa tanang butang! Sama sa gitudlo ni Presidente Ballard: “Nagpasalamat ko sa Dios ang atong Amahan sa pagpadala sa Iyang Anak, si Jesukristo, nganhi sa yuta. Ang Manluluwas mibuntog sa kamatayon ug sa sala. Kon kita mosunod Kaniya, kita makatagamtam sa walay kataposan nga kalipay.”24
Si Elder Cook mipakigbahin og susama nga pagpahayag: “Mamalandong ug magmaya kita sa tanang nabuhat sa Manluluwas alang kanato. Siya mihatag sa Iyang kinabuhi isip usa ka puli nga Pag-ula, sa pagbuntog sa kamatayon ug paghatag og katubsanan alang sa tanang katawhan. Ako mosaad nga ang pagsunod sa Iyang kahayag ug ehemplo magdala kanato og dugang nga kamaya, kalipay, ug kalinaw niining kinabuhi kay sa bisan unsang butang.”25
Ug sa kataposan, si Elder D. Todd Christofferson sa Korum sa Napulog Duha ka Apostoles sa maayo kaayong pagkasulti miingon nga “ang paglaom, kalinaw, ug hingpit nga kalipay nga naggikan sa pagsunod kang Jesukristo dili matukib. Kini nangahulogan sa tanan nga butang.”26
Sa pagkatinuod, sama sa giingon ni Presidente Nelson, “Si Jesukristo mao ang hingpit nga kalipay.”27 Ug siya mipadayon uban sa talagsaong saad nga “Ang mga santos mahimong magmalipayon sa bisan unsang kahimtang. Mahimo kitang mobati og kalipay bisan og bati ang atong adlaw, bati ang semana, o bisan bati ang tuig! Minahal nga mga kaigsoonan, ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi. Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang kalipay moabot gikan ug tungod Kaniya. Siya ang tinubdan sa tanang kalipay. Mobati kita niini sa panahon sa Pasko sa dihang manganta kita og, “Kalipay sa kalibotan, ang Ginoo miabot na’ [Kalipay sa Kalibotan, Mga Himno, nu. 120]. Ug ato kining mabati sa tibuok tuig.”28