Digital Lamang: Mga Young Adult
Ang Akong 3 ka P sa Pagpakigbahin sa Ebanghelyo
Ang tagsulat nagpuyo sa Brazil.
Kuhaa ang kalisod sa pagpakigbahin sa ebanghelyo pinaagi sa pagsabot sa inyong tahas ug sa inyong tinubdan sa kalamposan.
Mikabat na og 10 ka tuig sukad ako nabunyagan nga usa ka miyembro sa Ang Simbahan ni Jesukristo sa mga Santos sa Ulahing mga Adlaw. Sa miaging dekada, ako adunay oportunidad sa pagpakigbahin sa gipahiuli nga ebanghelyo sa daghang tawo—kadaghanan pinaagi sa pagpanghatag og kopya sa Basahon ni Mormon. Ang akong tumong matag tuig mao ang paghatag og 20 ka kopya. Sa ubang tuig, sama sa 2020, napanalanginan ko nga milapas sa akong tumong.
Miimbitar ako kanunay sa akong mga higala sa simbahan nga moapil nako sa pagpakigbahin sa ebanghelyo. Apan hapit matag higayon nga ako moimbitar og usa ka tawo sa pagpakigbahin og kopya sa basahon ni Mormon ngadto sa ilang mga higala ug pamilya, mohatag sila niini nga tubag kanako: “Unsa kon ang tawo dili modawat sa mensahe?”
Human makadungog kanunay niining sama nga kabalaka, nakaingon ko nga usahay ang mga miyembro sa Simbahan dili segurado sa ilang tahas sa pagpakigbahin sa ebanghelyo. Apan ang mga pagbati sa walay kasiguroan sayon nga masulbad kon mahinumdom kita sa unsay akong gusto nga tawgon nga ang akong “3 ka P” sa pagpakigbahin sa ebanghelyo.
1. Pagpakigbahin (Compartilhar sa Portuguese)
Ang akong unang “P” nagpasabot sa atong katuyoan, nga sa yano mao ang pagpakigbahin. Ang atong tahas sa pagpakigbahin sa hingpit nga kalipay nga atong bation tungod sa gipahiuli nga ebanghelyo! Daghang tawo nasanapan sa hingpit nga kalipay sama nato nga makat-on mahitungod sa mga kamatuoran nga gipahiuli diha sa Simbahan ni Jesukristo. Mahimo natong ipakigbahin ang hingpit nga kalipay nga gihatag sa ebanghelyo kanato pinaagi sa kaswal nga panagsultihanay ug bisan sa atong inadlaw nga mga ehemplo isip mga disipulo ni Kristo.
Si Presidente M. Russell Ballard, Akting Presidente sa Korum sa Napulog Duha ka Apostoles, mipahinumdom, “Usa sa labing makahuluganon nga ebidensya sa atong pagkakabig ug sa unsay atong gibati mahitungod sa ebanghelyo sa atong kaugalingong kinabuhi mao ang atong pagkaandam sa pagpakigbahin niini ngadto sa uban.”1 Ang tinuod nga pagkakabig modasig nato sa pagpakigbahin. Makapangayo kita og tabang kanunay sa Langitnong Amahan sa pagtabang nato nga makabaton og kaisog ug pagkaandam sa pagpakigbahin sa ebanghelyo niadtong naglibot kanato. Ug samtang magtinguha kita sa Espiritu nga mouban kanato, kita magiyahan sa sakto nga direksyon.
2. Pag-imbitar (Convidar sa Portuguese)
Ang akong ikaduha nga “P” mao ang mahitungod sa pag-imbitar sa mga tawo. Kon kita adunay importante nga kalihokan—usa ka salo-salo sa adlaw nga natawhan, usa ka kasal, usa ka gradwasyon—moimbitar kita sa mga tawo nga motambong tungod kay gusto kita nga malingaw niini kauban sila. Dili kita makapugos sa uban nga motambong (naglaom kita nga sila motambong!), apan kon sila dili, managhigala gihapon kita. Ug adunay lain pang mga kalihokan sa umaabot nga atong ipakigbahin. Ang pag-imbitar sa mga tawo nga makat-on sa ebanghelyo dili kaayo lahi.
Ang mga tawo nga atong imbitaron nga mobasa sa Basahon ni Mormon, sa pagtambong sa simbahan, o sa pagdawat sa ebanghelyo ni Jesukristo sa bisan unsa nga paagi adunay kabubut-on sa paghukom kon modawat ba o dili sa atong pag-imbitar. Apan ang atong kalamposan dili masukod sa ilang reaksiyon; masukod kini pinaagi sa atong pagkaandam sa pag-imbitar.
Sa manwal nga Isangyaw ang akong Ebanghelyo, mabasa nato nga ang katuyoan sa full-time nga mga misyonaryo mao ang “pag imbitar sa uban sa pagduol kang Kristo.”2 Samtang kita mopakigbahin sa ebanghelyo, mas makatabang nga motutok sa unsay atong mahimo sa pag-imbitar imbis kon sa unsay reaksiyon sa mga tawo sa atong pag-imbitar.
3. Pagkombinser (Convencer sa Portuguese)
Ang akong ikatulo nga “P” sa pagpakigbahin sa ebanghelyo mao ang pagkombinser. Ug dili sama sa unang duha ka P, kining ikatulo dili atong responsibilidad. Ang pagkombinser responsibilidad sa Espiritu Santo (tan-awa sa Juan 15:26; 2 Nephi 32:5; Moroni 10:5; Doktrina ug mga Pakigsaad 42:17; Moises 1:24). Pinaagi lamang sa impluwensya sa Espiritu Santo nga ang mga tawo nga atong gipakigbahinan sa ebanghelyo tinud-anay nga makombinser sa kamatuoran—basta dawaton lang nila ang kamatuoran sa ilang mga kasingkasing (tan-awa sa Jacob 3:2).
Samtang kita maningkamot sa kanunay nga pagpakig-uban sa Espiritu Santo sa atong mga kinabuhi, Siya magauban nato kon kita mopakigbahin sa ebanghelyo ngadto sa atong mga higala ug pamilya ug mopamatuod sa kamatuoran sa atong mensahe.
Usa ka Pribilehiyo ang Pagpakigbahin sa Ebanghelyo
Adunay daghang paagi nga kita makapakigbahin sa ebanghelyo ngadto sa kalibotan sa atong palibot, ug bisan og kini makahadlok, dili kinahanglan nga mabalaka kita kon ang Langitnong Amahan anaa sa atong kiliran.
Si Elder Dieter F. Uchtdorf sa Korum sa Napulog Duha ka Apostoles misumada unsay gikabalak-an sa kadaghanan kanato:
“Unsa kaha kon akong buhaton kining tanan ug ang mga tawo bati og reaksiyon? Unsa kaha kon sila manghinaway sa Simbahan? Unsa kaha kon i-unfriend ko nila?
“Oo, mahimong mahitabo kana,” miingon siya. “Sukad pa sa karaang panahon, ang mga disipulo ni Jesukristo sa kasagaran gilutos [tan-awa sa Juan 15:18].
“Hinumdomi, ang Ginoo molihok sa misteryoso nga mga paagi. Tingali pinaagi sa inyong Kristohanong tubag sa pagsalikway ang usa ka gahi nga kasingkasing mahumok. …
Ang Langitnong Amahan nakaila kaninyo. Ang Ginoo nahigugma kaninyo. Panalanginan kamo sa Dios. Kini nga buhat gi-orden Niya. Mahimo ninyo kini. Kitang tanan makahimo niini kon magtinabangay.”3
Makapangayo kita kanunay og tabang gikan sa Langitnong Amahan sa atong mga paningkamot sa pagpundok sa Israel. Ug tungod sa Manluluwas, kita makapadayon kanunay sa paglaom nga usa ka adlaw ang atong mga pag-imbitar madawat.