Mga Referral sa Prisohan

Ni Jeffrey N. Redd, Presidente, Mexico Aguascalientes Mission, 2019–2022

Sulod sa prisohan, si Sister Llanos wala gayod makalimot sa iyang katuyoan isip representante ni Jesukristo, nagtudlo sa iyang mga kauban sa selda mahitungod sa ilang balaanong pagkatawo ug unsaon sa pag-ampo.

Imahe

sister nga misyonaryo kauban ang presidente sa misyon ug iyang asawa

Mga litrato pinaagi ni Amelia Lyon

Si Sister Aketzaly Llanos usa ka kapanig-ingnan nga misyonaryo nga adunay lig-on nga pagpamatuod. Siya orihinal nga nadestino sa Costa Rica San José East Mission, apan siya nagserbisyo kauban sa akong asawa, si Janeen, ug nako sa Mexico Aguascalientes Mission og usa ka tuig sa wala pa niya madawat ang iyang visa sa Costa Rica.

Nianang Abril 2022 kami mikaway og panamilit samtang si Sister Llanos misakay og eroplano padulong sa Mexico City, diin siya mosakay og sumpay nga biyahe ngadto sa Costa Rica. Wala pa mag-24 oras human kami nanamilit, hinoon, ang mga pulis sa Mexico City nanawag kanamo.

“Among giaresto si Aketzaly Llanos sa airport tungod sa paghupot og usa ka military-grade nga bala,” miingon sila. “Kini usa ka pederal nga krimen, ug siya pasakaan og kaso.”

Dihadiha dayon, akong gikontak ang area legal office sa Simbahan, ug mikuha sila og usa ka abogado aron mabuhian si Sister Llanos. Kini nga abogado dili miyembro sa Simbahan. Siya mipasalig nga motabang namo apan mipahayag og pagkadili segurado. Iyang gipasabot nga bisan ang paghupot lang og bala sa sundalo sa usa ka dili sundalo usa ka seryoso nga krimen, bisan unsa pa man ang katuyoan sa tawo.

Sa wala madugay, si Sister Llanos miingon namo nga iyang napunitan ang bala diha sa dalan sa iyang kataposan nga area. Siya naghunahuna nga kini usa ka handomanan. Ang bala, parehas sa mga handomanan nga mga key chain nga gibaligya gawas sa karaan nga minahan sa pilak sa usa sa iyang mga area kaniadto. Ang mga imbestigador sa gobyerno, hinuon, gitratar siya nga sama sa terorista. Sulod sa pipila ka adlaw, si Sister Llanos gibalhin gikan sa prisohan sa tugpahanan ngadto sa usa ka prisohan nga higpit kaayo ang seguridad kon diin ang labing bangis nga mga babayeng kriminal gibutang.

Mga Pag-ampo uban ang Hugot nga Pagtuo

Mga pag-ampo alang sa sayo nga pagpagawas ni Sister Llanos gisugdan dihadiha dayon. Si Janeen ug ako midapit sa 115 ka misyonaryo nga nagserbisyo sa among misyon nga gamiton ang hugot nga pagtuo nga kami makakita og milagro, kon kini kabubut-on sa Ginoo. Akong gikontak ang mga presidente sa misyon sa Siyudad sa Mexico, sa Costa Rica San José East Mission, ug sa Mexico Missionary Training Center, ug sila midapit sa ilang mga misyonaryo nga moapil namo sa pag-ampo.

Sulod sa mga koral sa prisohan, si Sister Aketzaly Llanos wala gayod malimot sa iyang katuyoan isip usa ka representante ni Jesukristo.

Sulod sa mga koral sa prisohan, si Sister Llanos wala gayod malimot sa iyang katuyoan isip usa ka representante ni Jesukristo. Iyang gitudloan ang iyang siyam ka kauban sa selda nga mag-ampo pinaagi sa paghalad ug mga pag-ampo sa buntag ug gabii isip grupo sa matag adlaw. Iya usab silang gitudloan mahitungod sa ilang balaanon nga pagkatawo.

Usa sa iyang mga kauban sa selda mipahayag, “Ako usa ka daotan gayod kaayo nga tawo tungod sa akong gibuhat aron masulod dinhi, ug gikasilagan ko sa Dios.” Si Sister Llanos mitutok kaniya sa mata ug miingon, “Dili. Ikaw dili usa ka daotan nga tawo. Ikaw usa ka tawo nga nakahimo og usa ka butang nga daotan. Apan ikaw anak sa Dios, ug Siya nahigugma kanimo!”

Laing kauban sa selda misugilon sa iyang damgo pipila ka semana sa wala pa maaresto si Sister Llanos. Ang kauban sa selda nagdamgo nga usa ka quetzal [langgam sa kalasangan] ang milupad sulod sa prisohan aron motabang kaniya. Sa wala pa mopasakop sa Simbahan si Sister Llanos, siya adunay litrato sa usa ka langgam nga quetzal nga gipatik sa iyang likod. Sa dihang ang kauban sa selda nakakita sa tattoo, nakahibalo siya nga kinahanglan niyang maminaw sa misyonaryo nga mensahe ni Sister Llanos.

Si Sister Llanos nagtudlo kaniya mahitungod sa Pagpahiuli sa ebanghelyo ni Jesukristo ug mihatag niya sa kopya sa Basahon ni Mormon nga iyang gidala sa prisohan—ang samang kopya nga gihatag sa mga sister nga misyonaryo ngadto ni Sister Llanos lima ka tuig na ang milabay sa dihang siya nagsusi sa Simbahan.

Usa ka pasiunang husay sa kaso ang gi-eskedyul dayon sa Siyudad sa Mexico. Si Janeen ug ako miadto sa Mexico aron personal nga motestigo. Sa dihang nakigkita mi sa legal team gawas sa korte, ang abogado makita nga ginerbiyos, nagpaso-paso sa daplin nga agianan.

Ako siyang gidala sa daplin og giingnan: “Karon, mobati ka nga mas kalma ug mas malinawon kay sa imong gibati sukad sa sulod sa korte. Ako kang sultihan kon ngano. Sobra sa 500 ka misyonaryo ug ilang mga pamilya ang nag-ampo alang nimo ug sa imong kalamposan karong adlawa. Nag-ampo usab sila nga ang huwes adunay malumo nga kasingkasing nga iyang pagawason si Sister Llanos gikan sa prisohan.”

Ang mga mata sa abogado napuno sa mga luha, ug iyang gipadayag ang iyang pasalamat sa hugot nga pagtuo ug mga pag-ampo sa daghang tawo alang niya.

Pagka alas 10:00 sa buntag ang husay sa kaso gisugdan, apan gipahulat ko sa gawas hangtod nga moabot ang akong turno sa pagtestigo. Duha ka taas nga oras ang milabay. Dayon ang guwardiya sa lawak sa korte migawas ug miingon nga ang huwes wala na magkinahanglan nga maminaw sa akong pagtestigo—nakahimo na siya sa iyang desisyon.

Gikulbaan, misulod ko sa lawak sa korte, ug ang huwes misugod sa pag-istorya. Iyang giistorya ang kabahin sa balaod nga nalapas ni Sister Llanos ug mahitungod sa seryoso nga kaso nga iyang giatubang.

“Dili balehon kanang tanan,” siya mipadayon, “ako nagtuo sa ebidensiya nga gipresentar mahitungod sa maayong kinaiya ni Sister Llanos.” Dayon iyang gikutlo ang dili klaro nga bahin sa balaod nga nagtugot niya sa paghatag og kaluoy, ug iyang gipagawas si Sister Llanos dihadiha dayon.

Imahe

sister nga misyonaryo ug asawa sa presidente sa misyon

Si Sister Llanos kauban ni Sister Janeen Redd, kang kansang mga bukton nalup-og si Sister Llanos sa dihang gipagawas na siya gikan sa prisohan.

“Ang Dios diha sa Akong Kiliran”

Kini mao ang milagro nga among gipangita! Imbes nga sentensyahan og upat o sobra pa nga mga tuig sa prisohan, si Sister Llanos libre na nga mogawas. Human sa pagdungog sa kaso, ang iyang abogado miingon nga kanang adlawa ang usa sa labing dili malimtan nga mga adlaw sa iyang propesyonal nga trabaho.

“Gibati gayod nako ang Dios nga diha sa akong kiliran,” miingon siya. “Gusto kong makat-on pa og dugang bahin sa inyong mga gituohan.”

Ako siyang gidapit ngadto sa Mexico City Mexico Temple Visitors’ Center. “Makakita ka og uban pa nga mga misyonaryo didto nga sama ka buotan ni Sister Llanos,” ako siyang giingnan. “Imong makita ang kidlap sa ilang mga mata, ug mapangutana nimo ang imong kaugalingon og ngano.”

Dose ka oras human niana, si Sister Llanos gibuhian, nagsul-ob pa gihapon sa sinina sa prisohan. Nalup-og siya diha sa mga bukton ni Janeen. Sa dihang kaming tanan mihunong na sa paghilak igo nga makaistorya na, si Sister Llanos mituaw, “President, nakakuha ko og mga referral sa prisohan!”

Kining tibuok nga kasinatian nagpamatuod nga ang “Dios wala mohunong sa pagka-Dios sa mga milagro” (Mormon 9:15). Ako walay pagduhaduha nga ang hugot nga pagtuo ug mga pag-ampo sa daghang maayo nga mga tawo nakatabang sa usa ka abogado nga panalipdan ang iyang kaso ug mapahumok ang kasingkasing sa huwes.

Tungod kay si Sister Llanos giaresto, pipila ka babayeng piniriso ang nakadawat og paglaom pinaagi sa ebanghelyo ni Jesukristo, usa ka abogado ang nakapatubo og liso sa hugot nga pagtuo, ug napalig-on kami sa among kombiksiyon nga ang Dios mahimong mogamit kanato sa pagpalambo sa Iyang buhat bisan asa pa man kita.