Pagpangalagad nga adunay Pailob

Makapalambo kita sa abilidad nga mahimong mas mapailobon, sa kinabuhi ug sa pagserbisyo sa uban.

Imahe

tulo ka babaye nga nagkuyog og lakaw

Sa 2 Mga Taga-Corinto 12:7–8, si Pablo nagsulti bahin sa pag-ampo og katulo alang sa usa ka “tunok sa unod” nga matangtang. Apan ang iyang pag-ampo wala matubag sa paagi nga ang hagit nawala dayon. Hinuon, ang Ginoo misulti kaniya, “Igo kanimo ang akong grasya.” Si Pablo nagpakita og pailob ug hugot nga pagtuo sa paagi nga siya mitubag: “Busa gikalipay ko pag-ayo ang pagpasigarbo sa akong mga kahuyang aron maangkon ko ang gahom ni Kristo” (bersikulo 9).

Ang Ginoo mitudlo usab ni Moroni nga pinaagi sa grasya ni Jesukristo, kita makakat-on ug motubo sa kalig-on: “kon ang mga tawo moduol ngari kanako, Ako mopakita ngadto kanila sa ilang kahuyang. Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan; kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila” (Ether 12:27).

Pagpangalagad nga adunay Pailob

Sama ni Pablo, kadaghanan kanato nag-ampo alang sa kahupayan sa daghang higayon sa atong mga kinabuhi—usahay labaw pa sa tulo ka higayon. Usahay kini ang husto nga higayon alang niana nga panalangin nga ihatag, ug sa ubang higayon kita, sama ni Pablo, gitudloan ug gipalig-on. Atol niini nga mga higayon, kita makakat-on og pailob ug makakat-on sa paghulat sa tukmang panahon sa Ginoo.

Kita nagkinahanglan sa Kristohanon nga kinaiya sa pailob samtang kita mangalagad usab. Mahimong mangalagad kita ngadto sa mga tawo kinsa adunay nagkadaiya nga mga hagit ug mga ang-ang sa pagsabot sa ebanghelyo, ug kini nagkinahanglan og pailob ug gugma sa pagpangalagad ngadto sa mga tawo kinsa dili tingali madawaton.

Imahe

babaye nga naghangad

Litrato pinaagi sa Getty Images

Pagpalambo og Pailob

Samtang kita makaila sa Manluluwas, kita mas masayod kon unsay Iyang buhaton sa pagpangalagad kon Siya ang anaa sa atong sitwasyon. Unsaon nga kita makapalambo sa Kristohanon nga kinaiya sa pailob?

Ilha nga ang mortal nga kinabuhi puno sa mga sitwasyon nga mosulay sa atong pailob ug nga normal lang nga usahay mobati nga masagmuyo sa pipila ka higayon. Hinumdomi nga uban sa pagbansay ug hugot nga pagtuo sa Ginoo, kita makapalambo sa atong reaksiyon ngadto sa makapaugtas nga mga sitwasyon. Magmapailobon sa inyong mga paningkamot nga mahimong mas mapailobon!
Pangayo og tabang sa Dios kon gibati ninyo nga ang inyong kaugalingon nanglimbasog nga mahimong mapailobon. Ang usa ka lawom nga pagginhawa ug ang usa ka pag-ampo makatabang sa pagdala og kakalma ug kalinaw.
Ang pagpaminaw sa espirituhanon nga makapabayaw nga musika nga magdala og malinawon nga buot makatabang kaninyo nga mosugakod sa mga pagbati sa pagkadili mapailobon.
Dawata ang tukma nga panahon sa Ginoo sa inyong kinabuhi. Ang atong kabubut-on ug mga tinguha kinahanglang mopahiangay ngadto sa Iyang gihan-ay nga panahon.
Ang pagbaton og pailob usa ka panghunahuna. Hinumdomi nga ang pagbati nga nataranta o ang pagkaanaa sa kanunayng kahimtang sa pagdali talagsa ra kaayo nga makapalambo sa atong mga kinabuhi.

Mga Ideya alang sa Pagpangalagad nga adunay Pailob

Usahay ang atong buluhaton sa pagpangalagad mao ang pagtabang sa uban nga makabaton og pailob latas sa mga pagsulay. Ania ang pipila ka paagi nga kita makatabang:

Ipakita sa tawo o pamilya nga kita nahigugma ug nagpakabana kanila bisan pa man sa bisan unsang hagit nga ilang giatubang, bisan kon sila naghunahuna, alang sa bisan unsang rason, nga sila dili angayang higugmaon.
Ipakigbahin ang mga kasinatian ngadto kanila sa dihang kamo nagkinahanglan nga makat-on sa pagpailob ug nga kamo nakasabot kon unsa kini kalisod. Tabangi sila nga mobati nga wala sila mag-inusara kon sila mobati nga dili mapailobon o nasagmuyo.
Pag-ampo alang kanila nga makabaton og pailob latas sa lisod nga mga pagsulay ug pahibaloa sila nga ang Langitnong Amahan maminaw sa ilang mga pag-ampo aron sila makabati niana nga kusog.
Mamahimong andam nga maminaw kon sila nagkinahanglan og usa ka tawo nga ikaistorya. Ang pagbaton og masinabtanon nga higala mao ang usa sa labing maayo nga mga paagi sa paglahutay og lisod nga pagsulay o sitwasyon.