Digital Lamang: Mga Young Adult
Unsa Kaha Kon Ang Tanan Nakong Gibuhat Dinasig sa Gugma alang sa Dios?
Naghimo ko og yanong tumong: “Pagbuhat og usa ka butang matag adlaw sa paghigugma sa Dios, sa paghigugma sa uban, ug sa paghigugma sa akong kaugalingon.”
Usahay, ang pagkamaayong tawo ingon og dako nga buluhaton.
Nagtuo ko sa una nga ang Pagka-Kristohanon usa ka bug-at nga lista sa mga butang nga kinahanglan nga akong buhaton. Sa dihang naningkamot ko sa paghimo og mga tumong, maluya ako nga maghunahuna kon unsa ako ka layo kay sa asa na unta ako karon. Gibati nako nga napakyas sa daghan kaayo nga paagi nga wala ako masayod asa magsugod—sama kon ang imong kwarto nagkayamukat nga ikaw dili makahibalo unsa ang imong limpyohan pag-una.
Atol sa panahon nga mibati ko og dugang nga kakulang, usa ka kasulatan ang nagsige og sulod sa akong hunahuna:
“Si Jesus mitubag, Higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna. Kini mao ang dako ug unang sugo. Ang ikaduha sama sa una. Higugmaa ang imong isigkatawo sama sa imong kaugalingon” (Mateo 22:37–39).
Nakaamgo ko nga nakatutok ko sa “pagsunod” sa ebanghelyo kaysa mahimong sama sa Manluluwas. Sa wala damhang paagi, tungod sa daghan kaayo nga makabalda, ang gugma nawala samtang nagpadayon. Apan dili ba ang gugma ang punto? Atol sa Iyang pangalagad, si Jesukristo mitudlo sa katawhan sa mas taas ug mas balaan nga balaod sa paghigugma sa Dios sa ilang tibuok kasingkasing ug sa paghigugma sa uban sama sa ilang paghigugma sa ilang kaugalingon. Kon ako mawad-an og paglaom, mahinumdom ko sa mga pulong ni Jesus ug maghunahuna, “Basta maghimo lang ko og mga pagpili tungod sa gugma alang sa Dios ug sa uban, ako anaa sa eksakto nga dalan.”
Usa ka Yanong Tumong
Nakahukom ko sa paghimo og yanong tumong: “Buhata ang usa ka butang magtag adlaw sa paghigugma sa Dios, sa uban, ug sa akong kaugalingon.”
Gisulat nako kini sa unang pahina sa bag-o nga journal. Dili gayod ako maayong maghimo og journal, apan nagtuo ko nga importante ang pagrekord unsay akong gibuhat.
Ang unang adlaw mao ang Dominggo sa pagpuasa. Sa wala pa ko matulog, gisulat nako unsa ang akong nahimo sa pagkab-ot sa akong tumong.
Gisulat nako nga nagpakita ko og gugma alang sa Dios pinaagi sa pag-adto sa simbahan ug magpabilin sulod sa duha ka oras, bisan og wala ako ganahi niini. Gipaambit nako ang akong pagpamatuod sa panagtigom alang sa sakramento. Ug kon mobasa ko sa mga kasulatan, gisulat nako ang akong mga hunahuna alang sa usa ka makahuluganon ug nakatutok nga pagtuon.
Gisulat nako nga ako nahigugma sa uban pinaagi sa pag-apil sa tawag sa pamilya uban sa akong mga ginikanan bisan og gikapoy ko. Nagpuasa ko alang sa usa ka higala nga akong nailhan nga nakigbisog ug nagpadala kaniya og makapadasig nga mensahe. Migahin ko og panahon alang sa akong igsoong lalaki.
Gihigugma nako ang akong kaugalingon pinaagi sa pagtagpilaw ug pagtugot sa akong kaugalingon nga makarelaks. Ug natulog ko og sayo kaysa kasagaran aron ako mas makapahulay alang sa trabaho sa sunod adlaw.
Walay usa niining mga butanga nga dako, apan kon tan-awon nako unsay akong gisulat, mibati ko og kalinaw. Ang akong adlaw napuno sa gugma, ug mao kana ang gusto sa Langitnong Amahan alang kanako.
Sa tibuok semana gihinumdoman nako ang akong tumong ug gisulat giunsa nako sa pagpakita og gugma. Miadto ko sa templo. Naminaw ko sa mga tawo nga mipahungaw sa ilang mga problema. Misulti ko og mabinationg mga butang ngadto sa uban. Mihimo ko og mga butang nga nakapalipay nako. Giatiman nako pag-ayo ang akong kaugalingon. Gihatagan nako og kahigayonan ang mga tawo sa akong kinabuhi. Migahin ko og panahon sa pagpamalandong ug pagkonektar sa Dios.
Nausab tungod sa Gugma sa Dios
Human sa pipila lamang ka adlaw, natingala ko sa kalainan. Sa pagpakita og Kristohanong gugma isip akong tumong, ang mga butang nga sa kasagaran gibati nga buluhaton nahimong mga pagpahayag sa gugma alang sa Dios, sa uban, ug sa akong kaugalingon. Nagsugod ko sa pagpangita og mga oportunidad sa pagpadayag og gugma, bisan sa pagkuha og baso sa tubig alang sa akong igsoong babaye, pag-andam sa akong higdaanan, o paghunong aron sa paglitok og pag-ampo alang sa pagpasalamat.
Gibati nako nga akong nakita ang kalibotan sa bag-o nga mga mata, ug samtang nangita ko og mga paagi sa paghigugma, nakamatikod usab ako sa gugma nga anaa sa kong palibot matag adlaw. Nagdugang ko og bag-ong seksiyon sa akong gisulat sa journaI: “Sa unsa nga paagi nga nakita nako ang gugma sa Dios karon.” Gisulat nako ang mabinationg mga butang nga gihimo sa mga tawo kanako ug sa mabination nga mga pulong nga ilang gitanyag. Gisulat nako ang nindot nga butang nga akong nakita nga gihimo sa mga tawo alang sa uban. Gisulat nako ang gagmay, malumo nga mga kaluoy gikan sa Dios nga akong namatikdan matag adlaw. Gisulat nako ang tanang paagi nga akong gibati ang kadasig, ang tanang butang nga nakahatag nako og paglaom.
Si Sister Susan H. Porter, Kinatibuk-ang Presidente sa Primary, mitudlo: “Kon kamo masayod ug makasabot unsa ka hingpit kamo nga gihigugma isip usa ka anak sa Dios, kini makausab sa tanan. Makausab kini unsay inyong gibati sa inyong kaugalingon kon kamo makahimo og mga sayop. Makausab kini unsay inyong bation kon mahitabo ang malisod nga mga butang. Makausab kini sa inyong pagsabot sa mga sugo sa Dios. Makausab kini sa inyong pagtan-aw sa uban ug sa inyong kapasidad sa paghimo og kalainan.”1
Samtang gipadayon nako ang akong tumong, nakadiskobre ko unsa ka tinuod kini. Mabati nako nga nausab ang akong tibuok kasingkasing, ug mas nakasabot ko sa gahom sa gugma sa Dios kaysa akong nasabtan kaniadto.
Human sa usa ka bulan, gisulat nako kini sa akong journal:
“Gibati nako nga malaumon imbis nga maglisod. Nakahibalo ko sa akong mga kahuyang, apan mobati ko niana kon ipadayon nako nga mohilig ang akong kasingkasing ngadto sa Dios, Ok ra ang mga butang, bisan kon wala pa gayod nako maayo ang huyang ug naguba nga bahin sa akong kaugalingon. Ang akong kasingkasing mao ang butang nga labing bililhon, ug ang usa ka kasingkasing nga nahigugma sa Dios ug sa uban ug naningkamot sa pagserbisyo ug pagbayaw mao ang usa ka maayong kasingkasing.”
Usa ka Mas Maayo nga Kasingkasing
Unta makasulti ko nga wala gayod ako makapalta og usa ka adlaw sa akong journal. Ang kamatuoran mao, nga ako usahay dili makahimo, gani sulod sa mga bulan usahay. Apan kon matag higayon nga magsugod ako pag-usab, mobati ko sa kalainan. Akong ablihan ang akong mga mata sa makausa aron makita ang gugma sa Manluluwas sa akong palibot—ug sa tanang paagi nga akong ikadugang ngadto niini.
Mas nakasabot ko sa kamatuoran nga ang “gugma nga putli dili mopakyas” (Moroni 7:46) tungod kay dihang ako mibati nga ako napakyas, ang gugma ni Jesukristo mao ang midasig nako pag-usab. Kon mobati ko sa gugma sa Manluluwas, gusto ko nga ipadan-ag kini balik ngadto sa kalibotan, ug ako nasayod nga kon ako maningkamot sa pagbuhat niini, Siya mopanalangin nako og mas maayo, mas lig-on nga kasingkasing—nga makahigugma sama sa Iyang paghigugma.