Digital Lamang
Pagkahimong “usa ka Maayong Tigdawat” sa Serbisyo
Naanad ko nga mao ang moserbisyo sa uban. Apan sa dihang ang doktor nakadiskobre og mga tumor sa akong dughan, nakaplagan nako ang kabililhon nga serbisyohan.
Panahon sa kolehiyo, nakaserbisyo ko makaduha isip usa ka presidente sa Relief Society ug naghupot og ubang mga calling sa akong nagkalainlaing mga ward nga nakapahimo nako sa pagtabang kanunay sa uban. Nag-major ko sa psychology ug migahin og daghan sa akong panahon sa pagtabang niadtong nakigbisog sa lain-laing mga sakit sa utok ug mga kakulangan usab.
Naanad nga moserbisyo, dili serbisyohan.
Dayon usa ka gabii nakamatikod ko og bugon nga sama sa gidak-on og diyolen sa akong dughan. Gibaliwala nako kini sulod sa pipila ka semana hangtod nga usa ka gabii sa dihang ang akong kauban sa kwarto nga si Rachel, nga mao usab ang akong kompanyon sa misyon, mipauli. Naglingkod siya sa iyang higdaanan atbang nako, ug nakahinumdom ko nga ang iyang lola namatay tungod sa kanser sa totoy.
Sukad nga nabantayan ang bugon, wala ra nako hunahunaa nga adunay dili maayo; walay usa sa akong pamilya nga adunay mga isyu sa kahimsog, ang kanser pa kaha. Bisan og gusto nako nga ipatan-aw ang bugon, wala koy ideya kon asa magsugod sa mga ospital ug sa mga doktor. Apan niining gabhiona, gibati nako nga kinahanglan kong mosulti ni Rachel.
Gigakos dayon ko niya ug miduyog sa paghilak kanako. Dayon gitabangan ko niya sa pagpangita og doktor nga motan-aw sa bugon alang kanako. Apan wala siya mohunong diha—siya miuban gani nako sa akong appointment aron nga ako dili mag-inusara. Gituman niya ang iyang mga pakigsaad pinaagi sa pagsunod sa tambag sa Mosiah 18:9 nga “magbangotan uban niadto nga magbangotan; oo, ug sa paghupay niadto nga nagkinahanglan sa kahupayan.”
Tungod sa sunod-sunod nga mga pagbisita sa doktor, akong nahibaloan nga ang bugon nga akong gibati mao ang usa sa upat ka tumor sa akong dughan. Ug kini mao ang labing gamay. Kini mao ang usa sa labing makapakugang nga mga kasinatian sa akong kinabuhi, ug mas lisod pa tungod kay naningkamot ko sa pagbalanse sa eskwelahan ug sa mga calling sa Simbahan.
Ang Dios Naggiya sa mga Tawo sa Pagpanalangin Kanato
Bisan og akong nahibaloan nga ang mga tumor mamaayo ra, naghunahuna ko og maayo mahitungod niana nga kasinatian ug unsa ka dako nga panalangin ang gihatag sa akong higala. Giablihan niya ang akong mga mata sa kaimportante sa pagtugot sa uban sa pagserbisyo kanako.
Si Elder Dieter F. Uchtdorf sa Korum sa Napulog Duha ka Apostoles mitudlo:
“Nasasayod kitang tanan nga ‘labaw nga bulahan ang paghatag kay sa pagdawat’[Mga Buhat 20:35], apan ako naghunahuna kon usahay atong gibaliwala o gani gitamay ang kaimportante sa pagkamaayong tigdawat. …
“…Usahay ang mga tawo moabot sa punto nga dili gani sila modawat og gasa o, tungod niana, bisan sa usa ka pagdayeg nga walay pagpakaulaw o mga pagbati nga nakautang. Sayop nilang gihunahuna nga ang bugtong madawat nga paagi sa pagtubag sa pagdawat og gasa mao ang paghatag balik og butang nga mas dako pa ang bili.”1
Atol sa akong mga calling sa Simbahan ug sa akong mga pagtuon sa psychology, mitubo ako pag-ayo tungod kay ang ubang tawo mitugot nako nga moserbisyo kanila. Kon aduna pa sa mga tawo nga gihangyo nga akong alagaran nagdumili niana nga oportunidad ngari kanako, kadto nga mga kasinatian dili unta makapahimo nako nga mahimong mas sama sa akong Manluluwas pinaagi sa pagserbisyo sa Iyang ngalan.
Ang akong kasinatian sa mga tumor nakatabang nako nga makita nga ang baliktad tinuod usab: sa paghikaw sa ubang tawo sa pagserbisyo kanako, wala nako sila tugoti nga motubo sa mga pamaagi nga akong naangkon sa dihang ang uban mitugot nako nga moserbisyo kanila. Nawala usab nako ang sagrado nga mga oportunidad nga mas mapaduol ngadto kanila ug ngadto ni Kristo. Sama sa gisulti ni Elder Uchtdorf: “Kon kita mga maayo ug mapasalamaton nga mga tigdawat, giablihan nato ang pultahan aron mapalawman ang atong relasyon uban sa tighatag sa gasa. Apan kon kita mapakyas sa pagpasalamat o gani isalikway ang gasa, wala lamang kita mopasakit niadtong mitanyag sa ilang kaugalingon ngari nato, apan sa pipila ka paagi naghimo usab kita og kadaot sa atong kaugalingon.”2
Ang Kinabuhi Dili usa ka Indibidwal nga Paningkamot
Dili tuyo sa Dios nga kita maglakaw sa dalan sa pakigsaad nga mag-inusara, sama nga dili tumong Niya nga ako makahibalo sa akong mga tumor sa akong kaugalingon lang. Usahay kita mao ang mohatag, apan gituyo usab sa Dios nga kita mao ang modawat sa gugma ug serbisyo. Ang Manluluwas Mismo mipakita sa ehemplo alang kanato niini (tan-awa sa, pananglitan, Marcos 14:3–9).
Dili nako mobalibad sa mga tawo kon gusto nila nga himoan ko og mga biskwit atol sa makakapoy nga eksaminasyon o kon sila motanyag nga palitan ko og paniudto kon ako adunay dili maayong adlaw. Dili na nako sultihan ang akong tigpangalagad nga mga igsoong babaye ug lalaki nga wala koy gikinahanglan gikan nila; ako motugot nila nga iapil sa ilang mga pag-ampo kon ako walay laing gikinahanglan nianang higayona.
Dili na nako balibaran ang mga tawo kon sila motanyag sa pagtabang. Ug agig balos, nakakat-on ko nga pinaagi sa pagtugot sa uban sa pagtabang nako, mas andam ko sa pagtugot ni Jesukristo sa pagtabang nako. Ug ang pagtugot pa Kaniya sa akong kinabuhi nakahatag nako og dakong kusog.
Sama sa gitudlo ni Elder Uchtdorf, “Ang matag gasa nga gitanyag kanato—ilabi na sa usa ka gasa nga gikan sa kasingkasing—usa ka oportunidad sa pagtukod o pagpalig-on sa talikala sa gugma.”3 Tinuod kana sa atong mga minahal (ug bisan niadtong dili kaayo nato kaila), ug tinuod kini sa Langitnong Amahan ug ni Jesukristo.
Napanalanginan ako pag-ayo tungod niini nga kausaban sa panglataw mahitungod sa pagtugot sa uban sa pagserbisyo kanako. Imbis nga mosalikway sa mga paningkamot sa uban sa pag-atiman nako, nakahimo ko sa pagdapit og bag-ong mga higala sa akong kinabuhi—lakip sa mas lawom nga relasyon sa akong Manluluwas—samtang akong gitugotan ang akong kaugalingon nga mahimong tigdawat sa serbisyo ug dili lang tighatag.