“Mapasalamaton nga ‘Makapaminaw Kaniya,’” Liahona, Sept. 2023.
Mapasalamaton nga “Makapaminaw Kaniya”
Naglisod ko sa pagpaminaw diha sa simbahan, apan kini nga istorya gikan sa Bag-ong Tugon nakatabang nako nga makita ang akong sitwasyon sa lahi nga paagi.
Ako adunay grabe nga pagkawala sa pandungog sa taas nga bahin sa akong kinabuhi ug makasabot og mga 20 porsiyento lamang sa unsay gisulti diha sa pulpito atol sa kasagaran sa mga miting sa Simbahan. Usahay, ang akong pagkabungol nakapabati nako nga nag-inusara ug nahibulag, sama kon ang kongregasyon mokatawa sa kataw-anan nga gisulti sa mamumulong apan ako wala mokatawa uban nila tungod kay wala ko makadungog niini. Ug dili kay ako lang ang naingon ani. Ang mas tigulang nga mga miyembro misulti nako nga naglisod usab sila sa pandungog.
Usahay, human makigbisog sa pagsabot sa hinay og tingog nga mamumulong sa miting sa sakramento o kon ang magtutudlo sa Sunday School mopahayag nga dili na kinahanglan mogamit og mikropono tungod makadungog man ang tanan, naghunahuna ko kon nganong moadto pa ko sa simbahan nga gamay ra man kaayo ang akong madungog. Dili ba mas maayo pa nga ang akong panahon gamiton na lang nako sa panimalay sa pagbasa og Dali, Sunod Kanako nga mga leksiyon o sa pagtuon sa mga kasulatan?
Bisan pa, gusto nako nga magmasulundon ug nagpadayon sa pagtambong uban sa akong pamilya aron sa pagbag-o sa akong mga pakigsaad sa bunyag ug paghinumdom sa Manluluwas pinaagi sa pag-ambit sa sakramento. Kanunay gayod nga panalangin ang pagbati sa Espiritu, ug kanunay ko nga mibati nga nadasig niadtong mga butang nga akong mahimong madungog.
Usa ka Dominggo ang high councilor nga namulong diha sa miting sa sakramento aduna niadtong klaro, tibuok nga tingog nga nakapahimong mas sayon sa pagpaminaw. Iyang gihisgotan ang istorya sa Bag-ong Tugon mahitungod sa babaye nga nag-antos sa pagsige og dugo sulod sa 12 ka tuig ug adunay hugot nga pagtuo nga siya mamaayo kon siya makakab-ot ug makahikap sa kupo ni Jesus samtang Siya miagi (tan-awa sa Lucas 8:43–48).
Ang mamumulong dayon mitanyag og makapahinuklog nga panabot nga nakatandog kaayo nako, mipasabot nga tungod sa iyang kahimtang, kini nga babaye gikonsiderar unta nga hugaw ug may posibilidad nga dili unta tugotan nga mosimba. Sulod sa 12 ka tuig!
Ang sangpotanan niini nakapahikurat kaayo nako. Bisan og masakiton, kini nga babaye tingali dili gayod ingon ana ang kaluya nga siya dili makasimba, bisan panagsa lang. Apan tungod sa sosyal nga mga lagda sa panahon, siya wala tugoti nga mosimba. Unsa ka makalilisang nga pagsulay sa usa ka tawo nga adunay hugot nga pagtuo!
Samtang akong gihinuktokan ang kasub-anan nga tingali iyang gibati sa dihang gidid-an sa pagsimba sa Dios uban sa isig ka tumutuo tungod sa iyang pisikal nga kahimtang—usa ka butang nga siya walay kontrol—ang Espiritu mibukas sa akong mga mata kon sa unsang paagi nga ang iyang sitwasyon parehas sa akoa. Ako nahatagan og panabot nga bisan og dili ko hingpit nga makaapil, bisan pa man ako adunay kahigayonan nga makatambong sa simbahan ug makapaminaw kon unsay makaya nako. Kini nga babaye wala niana nga pagpili. Mibati ko og kaulaw sa mga higayon nga sa makadiyot akong gikonsiderar nga magpuyo sa panimalay.
Dihadiha, ang Dios mitabang nako nga makasabot pinaagi sa akong gibati, mipahibalo nako nga Siya dili gusto nga mobati ko nga sad-an. Gusto Niya nga mobati ko nga mapasalamaton—mapasalamaton alang sa pribiliheyo nga makatambong sa simbahan ug mapalig-on pinaagi sa pagpakigkuyog sa matinud-anon nga mga disipulo ni Kristo. Bisan kon dili nako madungog ang tanan, ako makasabot sa pipila ka butang—ug ang matag usa mipanalangin sa akong kinabuhi. Aduna usab mga talagsaong higayon nga ang Espiritu motabang nako nga makasabot niadtong mga butang nga dili nako madungog.
Mibati ko og kamapasalamaton alang sa kagawasan nga mosimba sa Dios ug matagamtam ang mga panalangin nga makaadto sa Iyang panimalay. Ang Espiritu mipamatuod kanako nga mas maayo gayod alang nako nga anaa sa mga miting sa Simbahan, moambit sa sakramento, ug magkat-on kon unsa ang makaya nako kay sa dili na lang gayod motambong.
Nianang adlawa ang akong kinaiya nausab. Imbes nga mobati og kasubo tungod sa akong mga kakulangan, ang kalinaw mipuno sa akong kasingkasing, ug ako mihukom nga motutok sa mga panalangin sa pagtambong sa simbahan. Ako mihukom nga mohimo og kinasingkasing nga paningkamot nga magmapasalamaton sa unsay akong makaya sa pagpaminaw imbes nga masagmuyo sa unsay dili nako kaya.
Si Elder Dieter F. Uchtdorf sa Korum sa Napulog Duha ka Apostoles miingon: “Ang kamapasalamaton panahon sa kasakit wala magpasabot nga nahimuot kita sa atong kahimtang. Nagpasabot kini nga pinaagi sa hugot nga pagtuo naglantaw kita lapas sa atong mga hagit karon.”1 Ang babaye nga mikab-ot aron mohikap sa kupo ni Jesus usa ka nindot nga pahinumdom alang kanako nga magbaton og igo nga pagtuo sa Ginoo aron makakita sa akong mga abilidad ug mga panalangin ug igo nga pagsalig sa Dios aron mahibalo nga Siya mopanalangin nako nga magmalamposon bisan pa man sa akong pisikal nga mga kakulangan.
Ang kinabuhi giubanan sa tanang klase sa pagsulay nga makapabug-at nato sa espiritwal, emosyonal, o pisikal nga paagi, apan bisan sa mga higayon sa kalisod, kita gidasig nga magmapasalamaton alang sa mga panalangin nga atong natagamtam. Ang Ginoo miingon:
“Akong mga higala, ayaw kahadlok, himoa nga mahupay ang inyong mga kasingkasing; oo, maglipay hangtod sa hangtod, ug sa matag butang maghatag og mga pagpasalamat. …
“… Ug ang tanan nga mga butang diin kamo gipaantos molihok alang sa inyong kaayohan, ug ngadto sa himaya sa akong ngalan” (Doktrina ug mga Pakigsaad 98:1, 3).
Ang tagsulat nagpuyo sa Utah, USA.