Ang Gahom sa Kadasig sa Espirituhanong Paglambo

Ni Presidente Russell M. Nelson

Presidente sa Ang Simbahan ni Jesukristo sa mga Santos sa Ulahing mga Adlaw

Ganahan kong mosugyot og lima ka piho nga buhat nga atong mahimo aron matabangan kita nga mapadayon ang positibo nga espirituhanong paglambo.

Minahal kong mga kaigsoonan, gipangga ko kamo. Akong gihandom kini nga oportunidad nga makapamulong kaninyo karon. Ako nag-ampo sa matag adlaw nga mapanalipadan kamo sa mabangis nga mga pag-atake sa kaaway ug makabaton og kalig-on nga magpadayon bisan sa unsang mga hagit nga inyong atubangon.

Ang uban nga mga pagsulay pribado kaayong mga palas-anon nga walay laing makakita. Ang uban gipasundayag sa entablado sa kalibotan. Ang armado nga kasungian sa sidlakang Uropa usa niini. Nakaadto na ko sa Ukraine ug sa Russia sa daghang higayon. Gihigugma ko kana nga mga yuta, katawhan, ug ilang mga pinulongan. Ako mibakho ug nag-ampo alang sa tanan nga naapektohan niini nga gubat. Isip usa ka simbahan naghimo kita sa tanan nga atong mahimo sa pagtabang niadtong mga nag-antos ug nanglimbasog aron makalahotay. Kami nagdapit sa tanan nga magpadayon sa pagpuasa ug pag-ampo alang sa tanan nga katawhan nga nasakitan niini nga kalamidad. Ang bisan unsa nga gubat usa ka makalilisang nga paglapas sa tanan nga gitudlo ug gibarogan sa Ginoo nga si Jesukristo.

Walay usa kanato ang makakontrolar sa mga nasod o sa mga buhat sa uban o bisan sa mga sakop sa atong kaugalingon nga mga pamilya. Apan kita makakontrolar sa atong mga kaugalingon. Ang akong panawagan karon, minahal kong mga kaigsoonan, mao ang pagtapos sa mga kasungian nga nagdilaab sa inyong mga kasingkasing, sa inyong panimalay, ug sa inyong kinabuhi. Ilubong ang bisan unsang mga tinguha nga makapasakit sa uban—bisan kon kana nga mga buhat mao ang kasuko, hait nga pulong, o kapungot ngadto sa uban kinsa mipasakit kaninyo. Ang Manluluwas, misugo kanato sa pagtunol sa pikas nga aping,¹ sa paghigugma sa atong mga kaaway, ug pag-ampo alang niadtong nagpasipala kanato.²

Lisod gayod kaayo ang pagbaliwala sa kapungot nga ingon og makiangayon unta kaayo. Maingon og imposible ang pagpasaylo niadtong kansang makadaot nga mga buhat nakapasakit sa mga inosente. Ug sa gihapon, ang Manluluwas mipahimatngon kanato nga “mopasaylo sa tanan nga mga tawo.”³

Kita mga sumusunod sa Prinsepe sa Kalinaw. Karon labaw pa kay kaniadto, nagkinahanglan kita sa kalinaw nga Siya lamang ang makahatag. Unsaon nato sa pagdahom nga moabot ang kalinaw sa kalibotan kon sa tinagsatagsa wala kita magtinguha og personal nga kalinaw ug paghiusa? Mga kaigsoonan, nasayod ko nga ang akong mga gisugyot dili sayon. Apan ang mga sumusunod ni Jesukristo angay nga mopakita sa ehemplo ngadto sa tibuok kalibotan aron sundon. Ako mohangyo kaninyo nga kutob sa inyong mahimo hunonga ang personal nga mga kasungian nga sa kasamtangan nagdilaab sa inyong kinabuhi.

Akong ipasabot og maayo kini nga tawag sa pagbuhat pinaagi sa paghisgot og usa ka konsepto diin ako napahinumdoman bag-o lang samtang nagtan-aw og dula sa basketball.

Niana nga dula, ang first half usa ka bawot-bawot nga sangka, banos-banos og labaw. Dayon, atol sa kataposang lima ka segundo sa first half, usa ka guard sa usa ka kuponan [team] mihimo og maanindot nga tulo ka puntos nga shot. Sa usa na lang ka segundong nahibilin, ang iyang kauban sa team nakailog sa gipasa nga bola ug nadugangan ang puntos dayon bagting sa buzzer! Mao nga ang kuponan nangadto sa locker room nga may upat ka puntos nga labaw ug mibati og dako nga pagbati sa kalamboan ug kadasig. Ilang napadayon kana nga kadasig sa paglambo hangtod sa second half ug nakadaog sa dula.

Ang kadasig sa paglambo gamhanan kaayo nga konsepto. Kitang tanan nakasinati niini sa usa ka matang o sa lain—sama pananglit, sa usa ka sakyanan nga mokalit lang og bulhot o sa panagsumpaki nga kalit lang mosangpot sa panaglalis.

Mao nga mangutana ko,”Unsa ang makadagkot og espirituhanong paglambo? Kita nakakita og mga sanglitanan sa positibo ug sa negatibo nga kadasig sa paglambo. Kita nakaila og mga sumusunod ni Jesukristo kinsa nakabig ug milambo sa ilang hugot nga pagtuo. Apan may nailhan sab kita nga kaniadto mapasaligon nga mga tumutuo kinsa nangawala. Ang makadasig nga paglambo motabyog sa bisan asa nga bahin.

Wala kita sukad magkinahanglan og positibo nga espirituhanong paglambo labaw kay sa karon, aron mabatokan ang gipaspason diin ang daotan ug ang nagkangitngit nga mga timailhan sa mga panahon nagkagrabe. Ang positibo nga espirituhanong paglambo maghimo nga makapadayon kita sa unahan taliwala sa kahadlok ug kawalay kasiguroan nga namugna sa mga pandemya, mga tsunami, pagbuto sa mga bulkan, ug armado nga mga kabangis. Ang espirituhanong paglambo makatabang nato nga makasugakod sa walay puas, nga daotang pag-atake sa kaaway ug pagsanta sa iyang mga paningkamot sa pagguba sa atong personal nga espirituhanong pundasyon.

Daghan nga hiyas makadagkot og positibo nga espirituhanong paglambo. Kamasulundon, gugma, pagpaubos, serbisyo, ug pasalamat⁴ maoy pipila lamang.

Karon, ganahan kong mosugyot og lima ka piho nga buhat nga mahimo natong himoon aron matabangan kita nga mapadayon ang positibo nga espirituhanong paglambo.

Una: Subaya ang dalan sa pakigsaad ug magpabilin diha.

Dili pa lang dugay, ako dunay tin-aw kaayo nga damgo diin nakahimamat ko og dakong pundok sa katawhan. Ila kong gipangutana og daghang pangutana, ang kasagaran kaayo mao ang mahitungod sa dalan sa pakigsaad ug nganong importante kaayo kini.

Sa akong damgo, ako mipasabot nga kita mosulod sa dalan sa pakigsaad pinaagi sa pagpabunyag ug paghimo sa atong una nga pakigsaad ngadto sa Dios.⁵ Matag higayon nga kita moambit sa sakramento, kita mosaad pag-usab sa pagdala sa ngalan sa Manluluwas ngari kanato, mohinumdom Kaniya, ug maghupot sa Iyang mga sugo.⁶ Agig balos, mopaniguro ang Dios kanato nga kita sa kanunay makabaton sa Espiritu sa Ginoo uban kanato.

Sa kadugayan mohimo kita og dugang nga mga pakigsaad sa templo, diin kita makadawat og mas dagko nga mga saad. Ang mga ordinansa ug mga pakigsaad maghatag nato og akses sa diosnon nga gahom. Ang dalan sa pakigsaad mao lamang ang dalan padulong sa kahimayaan ug kinabuhing dayon.

Sa akong damgo, usa ka babaye dayon nangutana sa unsang paagi ang usa ka tawo nga nakasupak sa ilang mga pakigsaad makabalik niana nga dalan. Ang akong tubag sa iyang pangutana mogiya sa akong ikaduha nga sugyot:

Diskobreha ang kalipay sa inadlaw nga paghinulsol.

Unsa ka importante ang paghinulsol? Si Alma mitudlo nga kita kinahanglan nga “walay lain nga isangyaw gawas sa paghinulsol ug hugot nga pagtuo sa Ginoo.”⁷ Ang paghinulsol gikinahanglan sa tanang tawo nga adunay tulobagon kinsa nagtinguha og mahangtoron nga himaya.⁸ Walay mga eksepsiyon. Sa usa ka pagpadayag ngadto ni Propeta Joseph Smith, ang Ginoo mipanton sa mga lider sa Simbahan tungod sa wala pagtudlo sa ebanghelyo ngadto sa ilang mga anak.⁹ Ang paghinulsol mao ang yawe sa kalamboan. Ang lunsay nga hugot nga pagtuo maghimo nga makapadayon kita sa dalan sa pakigsaad.

Palihog ayaw kahadlok o ilangay ang paghinulsol. Si Satanas mahimuot sa inyong kaalaotan. Putla kini. Isalikway ang iyang impluwensiya sa inyong kinabuhi! Sugdi karon ang pagsinati sa kalipay sa pagsalikway sa kinaiyanhon nga pagkatawo.¹⁰ Ang Manluluwas nahigugma kanato kanunay apan labaw pa kon kita maghinulsol. Siya misaad nga bisan og “ang mga bukid mobiya ug ang mga bungtod mopahawa … ang akong pagkamabination dili mobiya gikan kaninyo.”¹¹

Kon mibati kamo nga natipas sa dalan sa pakigsaad nga layo na kaayo o dugay na ug walay paagi nga makabalik, klaro nga kana dili tinuod.¹² Palihog kontaka ang inyong bishop o presidente sa branch. Siya ang tinugyanan sa Ginoo ug motabang ninyo nga masinati ang kalipay ug kahupay sa paghinulsol.

Karon, usa ka pahimangno: Ang pagbalik ngadto sa dalan sa pakigsaad wala magpasabot nga sayon ang kinabuhi. Kini nga dalan malisod ug usahay daw taas kaayo nga tungason.¹³ Kini nga pagtungas, hinoon, gidesinyo aron masulayan ug matudloan kita, aron mahashasan ang atong mga kinaiya, ug matabangan kita nga mahimong mga santos. Kini ang bugtong nga dalan padulong sa kahimayaan. Usa ka propeta ¹⁴ mihulagway sa “bulahan ug malipayon nga kahimtang niadto nga naghupot sa mga sugo sa Dios. Kay tan-awa, sila bulahan sa tanan nga mga butang, sa temporal ug sa espirituhanon; ug kon sila magpabilin nga matinud-anon hangtod sa kataposan sila pagadawaton ngadto sa langit … [ug] mopuyo uban sa Dios diha sa usa ka kahimtang nga walay kataposan ang kalipay.”¹⁵

Ang pagsubay sa dalan sa pakigsaad, dinuyogan og inadlaw nga paghinulsol, makahatag og positibo nga espirituhanong paglambo.

Akong ikatulo nga sugyot: Magkat-on mahitungod sa Dios ug sa unsang paagi Siya naglihok.

Usa sa labing dagko nga hagit karon mao ang pag-ila tali sa mga kamatuoran sa Dios ug sa mga panglingla ni Satanas. Mao nga ang Ginoo mipahimangno kanato sa “pag-ampo kanunay, … aron [kita] makabuntog ni Satanas, ug … makalingkawas sa mga kamot sa mga sulugoon ni Satanas nga nagpatunhay sa iyang buhat.”¹⁶

Si Moises mihatag og sanglitanan sa pagkat-on unsaon sa pag-ila tali sa Dios ug ni Satanas. Dihang si Satanas miabot sa pagtintal ni Moises, nakabantay siya sa panglingla tungod kay siya bag-o lang dunay nawong sa nawong nga pakig-interaksiyon sa Dios. Si Moises nakamatikod dayon kon kinsa si Satanas ug mimando kaniya sa pagpahawa.¹⁷ Sa dihang mipadayon si Satanas, si Moises nahibalo unsaon sa pagtawag sa Dios alang sa dugang nga tabang. Si Moises nakadawat og diosnon nga kalig-on ug mibadlong pag-usab, sa usa nga daotan, nga nag-ingon, “Pahawa gikan kanako, Satanas, kay kining usa nga Dios lamang ako mosimba.”¹⁸

Kita kinahanglan mosunod niana nga sanglitanan. Isalikway ang impluwensiya ni Satanas palayo sa inyong kinabuhi! Palihog ayaw pagsunod kaniya ngadto sa iyang “bung-aw sa pagkauyamot ug walay kataposan nga pagkaalaot.”¹⁹

Uban sa makalilisang nga gikusgon, ang usa ka pagpamatuod nga dili maalimahan matag adlaw “sa maayong pulong sa Dios”²⁰ mahagsa. Sa ingon, ang pangontra sa plano ni Satanas klaro: nga kita nagkinahanglan og inadlaw nga mga kasinatian sa pagsimba sa Ginoo ug pagtuon sa Iyang ebanghelyo. Mohangyo ko kaninyo nga ipatigbabaw ang Dios sa inyong kinabuhi. Hatagi Siya og patas nga bahin sa inyong panahon. Kon inyo kining buhaton, panid-i kon unsay mahitabo sa inyong positibo nga esprituhanong paglambo.

Ika-4 nga sugyot: Tinguhaa og laomi ang mga milagro.

Si Moroni mipaniguro kanato nga “ang Dios wala mohunong sa pagka-Dios sa mga milagro.”²¹ Ang matag libro sa kasulatan nagpakita unsa kaandam ang Ginoo sa pagpataliwala sa kinabuhi niadtong mga motuo Kaniya.²² Iyang gibahin ang Pula nga Dagat alang kang Moises, mitabang ni Nephi nga mabawi ang mga palid nga tumbaga, ug mipahiuli sa Iyang Simbahan pinaagi ni Propeta Joseph Smith. Matag usa niini nga mga milagro migahin og panahon ug tingali dili gayod mao ang orihinal nga gihangyo niadtong mga tawo gikan sa Ginoo.

Sa samang paagi, ang Ginoo mopanalangin kaninyo og mga milagro nga inyong gikinahanglan kon kamo motuo Kaniya, “sa walay pagduhaduha.”²³ Buhata ang esprituhanong buhat sa pagtinguha og mga milagro. Sa mainampoong paagi pangayo og tabang sa Dios sa pagtabang ninyo nga makagamit niana nga matang sa hugot nga pagtuo. Ako mosaad nga kamo makasinati sa inyong kaugalingon nga si Jesukristo “[mo]hatag og gahom niadtong maluya; ug kaniya nga walay kabaskog magadugang siya og kusog.”²⁴ Pipila ka butang ang mopakusog sa inyong esprituhanong paglambo labaw kay sa pagkamatikod nga ang Ginoo nagtabang kaninyo sa pagbalhin og usa ka bungtod sa inyong kinabuhi.

Ika-5 nga sugyot: Taposa ang kasungian sa inyong personal nga kinabuhi.

Akong sublion ang panawagan sa pagtapos sa mga kasungian sa inyong kinabuhi. Magbansay sa pagpaubos, kaisog, ug kalig-on nga gikinahanglan sa pagpasaylo ug sa pagtinguha og kapasayloan. Ang Manluluwas misaad nga kon “[kita] mopasaylo sa mga tawo sa ilang mga kalapasan, ang [atong] Langitnong Amahan mopasaylo usab [kanato].”²⁵

Duha ka semana gikan karon magsaulog kita sa Pasko sa Pagkabanhaw. Sugod karon ug nianang higayona, dapiton ko kamo sa pagtinguha nga taposon ang usa ka personal nga kasungian nga nagpabug-at kaninyo. Aduna pa bay mas haom nga buhat sa pasalamat ngadto kang Jesukristo alang sa Iyang Pag-ula? Kon ang kapasayloan sa karon ingon og imposible, pangayo og gahom pinaagi sa makatubos nga dugo ni Jesukristo sa pagtabang kaninyo. Kon kini inyong buhaton, mosaad ko og personal nga kalinaw ug usa ka kusog nga espirituhanong paglambo.

Sa dihang ang Manluluwas mitubos sa tanang kaatawhan, Siya miabli og usa ka dalan diin kadtong mosunod Kaniya makagamit sa Iyang makaayo, makalig-on ug makatubos nga gahom. Kini nga espirituhanong mga kahigayonan maanaa sa tanan kinsa magtinguha sa pagpaminaw Kaniya ug pagsunod Kaniya.

Minahal kong mga kaigsoonan, uban sa tanan nga pangaliyupo gikan sa akong kasingkasing, awhagon ko kamo sa pagsubay sa dalan sa pakigsaad ug magpabilin didto. Sinatia ang hingpit nga kalipay sa paghinulsol matag adlaw. Magkat-on mahitungod sa Dios ug sa unsang paagi Siya naglihok. Tinguhaa ug laomi ang mga milagro. Paningkamoti ang pagtapos sa kasungian sa inyong kinabuhi.

Samtang inyong lihukon kini nga mga tinguha, ako mosaad kaninyo og katakos nga makapadayon sa dalan sa pakigsaad uban sa nagkadugang nga kadasig sa paglambo, bisan unsa ang mga babag nga inyong giatubang. Ug mosaad ko kaninyo og dugang nga kalig-on sa pagbatok sa tintasyon, dugang nga kalinaw sa hunahuna, ug kagawasan gikan sa kahadlok, ug dugang nga kahiusahan sa inyong mga pamilya.

Ang Dios buhi! Si Jesus mao ang Kristo! Siya buhi! Siya nahigugma kanato ug motabang kanato. Niini ako mopamatuod pinaagi sa sagrado nga ngalan sa atong Manunubos, si Jesukristo, amen.