Savali Faaleautaitai i le Eria
Amuia E Faatupuina le Filemu
I Lana Lauga i luga o le Mauga, sa tautino mai ai e le Faaola, “Amuia e faatupuina le filemu aua e ta’ua i latou o atalii o le Atua”. 1 O le faatupuina o le filemu o se uiga faaKeriso, lea tatou te moomia ona atia’e i o tatou olaga ina ia avea ai faapei o Ia. Ae o le a le uiga o le avea ma se e faatupuina le filemu? E tele auala, ae o le a tatou talanoaina na o le tolu.
Muamua, e mafai ona tatou faavaea le filemu i o tatou nuu e ala i le alolofa ia i latou e vagaia i tatou ma faia ma le agalelei i latou o e ono faatiga pe faaaoga i tatou. Na faaa’oa’o mai e Elisaia lenei mataupu faavae ina ua auina atu e le Tupu o Suria ana autau e pu’e faapagotā mai o ia. Sa latou siomia le aai i le po ma ina ua ala a’e le auauna talavou a Elisaia i le taeao, sa ia vaaia le mano o solofanua ma kariota. Na liliu atu ia Elisaia ma faapea atu, “Aue, le alii e! Pe faapefea se mea tatou te fai a’i? Ona tali mai lea o ia, Aua e te fefe aua e toatele ua ia te i tatou i e ua ia te i latou.” 2
Na ole atu Elisaia i le Alii e faapupula mata o lana auauna, ma sa vaaia e le taulealea ua faatumulia le mauga i solofanua ma kariota afi ua latou vagavagaia Elisaia. Ua malamalama nei o ia o loo ia Elisaia le mana e sili atu i lo autau a le Tupu o Suria, ae e faapefea ona ia faaaogaina lena mana?
Sa toe tatalo Elisaia ma ole atu i le Alii ina ia faatauasoina ona fili. I lenei tulaga ua leai se faamoemoe, sa ta’ita’i ai e Elisaia i latou i Samaria, ma si’oina ai i latou e autau a Isaraelu, ma ia ole atu i le Alii ina ia toe faapupula o latou mata. Ona faliu atu lea o le Tupu o Isaraelu ia Elisaia ma fesili, “A a’u fasia ea i latou?”
Ia, pe o le a faapefea ona tali atu Elisaia? O ona fili nei na o mai e ave faamalosi o ia ma faatama’ia. Mata o le a sa tatou tali pe a tatou iloa ua tatou i ai i se tulaga e toe taui atu ai pe faatama’ia ai se tasi sa faatausuai mai, faaaoga i tatou, pe faatauma’oia i tatou?
Sa tali atu lemu ma le lotomaualalo Elisaia, “Leai,” ma sa faatonuina le Tupu e “laulau atu i o latou luma ni mea e ‘ai ma ni vai, latou te aai ma feinu ai, i le latou o ai i lo latou alii.” E le gata i lea, sa ia saunia mea ‘ai e tele ma latou e ave i le Tupu o Suria. O loo faaiu le tala i upu faigofie nei ae mamana: “Ona le toe o mai ai lea o ‘au a Suria i le nuu o Isaraelu.” O le gaoioiga faigofie o le agalelei o Elisaia na faavaeina ai le filemu i le mavae ai o le tele o tausaga o taua.
I le Tusi o Faataoto, tatou te aoao ai faapea, “A fiafia Ieova i ala o le tagata ona faaatupuina lea e ia o le leleiga ma ia o e ita ia te ia” 3 . I na tatou avea moni ia o ni ē faatupuina le filemu e ala i le taulimaina o tagata uma ma le alofa ma le agalelei tusa lava pe o le a le ala latou te taulimaina ai i tatou.
Lona lua, o se isi auala e mafai ona avea i tatou ma e faatupuina le filemu o le sue pe faatupu le filemu mo i tatou lava e ala i le Togiola a Iesu Keriso. Na Ia fetalai atu i Ona soo, “Ou te tuuina atu ia te outou le [filemu] o lo’u filemu ou te avatu ai ia te outou ou te le avatu ia te outou faapei ona avatu e le lalolagi. ‘Aua le atuatuvale o outou loto, aua foi tou te matata’u.” 4
A o tatou o mai ia Keriso, salamo i a tatou agasala, tausi Ana poloaiga ma faia galuega o le amiotonu, o le a tatou maua lo tatou taui, “o le filemu lea i le lalolagi lenei ma le ola e faavavau i le lalolagi a sau.” 5 I lea tulaga e avea ai i tatou ma ē faatupuina le filemu a o tatou sailia moni o Ia o le Alii o le Filemu.
Lona tolu, e mafai ona tatou faatupuina le filemu a o tatou folafola atu le filemu i le lalolagi. Ina ua uma ona valoia e Apinati le faatafunaga o le nuu ma le oti o le Tupu o Noa pe afai latou te le salamo, sa fai atu e se tasi o faitaulaga pepelo se fesili mata’ina faapea: “O le a le uiga o upu ua tusia, ma ia sa aoao mai e o tatou tama, fai mai:
“E matua matagofie lava i luga o mauga vae o ia o lē na te aumai tala e lelei; o lē na te tala’i atu le filemu; o lē na te aumai tala e lelei o mea lelei; o lē e na te tala’i le olataga; o lē e fai atu ia Siona, Ua nofotupu lou Atua . . . ?” 6
Sa taumafai le faitaulaga e ta’uamiotonuina a latou faatinoga ma sa fesiligia Apinati i lona folafola atu o le faatafunaga, ae le o le tala’iina o le filemu e pei ona ia malamalama i ai. E lei malamalama o ia i le uiga moni o le talai atu o le filemu. Sa amata ona tali atu Apinati i lana fesili e ala i le a’oa’o atu o poloaiga e sefulu ma tulafono a Mose. Sa ia a’oa’o atu e uiga i le afio mai o le Mesia e togiola mo agasala a le lalolagi, le ala na avea ai o Ia ma Tama ma le Alo, e tu i le va o Ana fanau ma manaoga o le faamasinoga tonu.
Na aoao atu e Apinati e faapea o i latou o fanau a Keriso o perofeta paia uma o e na molimau atu i le afio mai o Keriso, ma i latou e ua’i atu i a latou upu. Na ia aoao atu e faapea o i latou uma o e na valoia nei mea o i latou ia “o e na latou talai atu le filemu, o e na latou aumai tala e lelei o mea lelei, o e na latou talai atu le olataga; ma fai atu ia Siona; Ua nofotupu lou Atua!
“Ma ua matagofie na’uā o latou vae i luga o mauga!
“Ma lenei foi, ua matagofie na’uā i luga o mauga vae o i latou o loo latou talai atu pea le filemu!
“O lenei foi, e matagofie na’uā i luga o mauga vae o i latou o e o le a latou talai atu le filemu i le lumanai, ioe, mai i le taimi nei e oo i le faavavau!” 7
O le vaitau o lenei Eseta, e mafai ona tatou saili moni ia avea ma e faatupuina le filemu e ala i le faatupuina o le filemu i o tatou nuu, sue le filemu mo i tatou lava e ala i le Togiola a Iesu Keriso, ma talai atu le filemu i le lalolagi a o tatou alolofa, faasoa atu, ma valaaulia tagata uma e O Mai ia Keriso.