Na’o Tusiga Faatekinolosi
Gasegase o le Faiai ma La‘u Molimau ia Iesu Keriso
E alala le tusitala i Washington, ISA.
Sa ou faamoemoe mo se vavega mai le Faaola. Sa ou iloaina ua uma ona ou mauaina ni vavega se lua.
Sa avea a’u ma se tagata e fiafia e tapolo mo le tele o tausaga. I ni nai tausaga ua mavae, sa avea le savalia o le malae tapolo ma luitau. Sa faaauau pea ona ou taalo tapolo, ae sa faamalosia a’u e sui i le tietie i se tamai taavale tapolo. A o faasolo ina faateteleina o’u luitau, sa tonu ia te a’u ua oo i le taimi e asiasi ai i le fomai. I le mavae ai o le tele o suesuega faafomai i le 2017, sa iu ina faamaonia ai le maua o a’u i le tulaga amata o le gasegase o le faiai, o se faamai e vave le puipuia e aafia ai le faiai ma le maea ario.
Talu mai lena suesuega, sa ou faaaluina se taimi tele e mafaufau ai i vavega a le Faaola, aemaise lava Ana vavega faamalolo. E masani ona ou mafaufau, ou te manaomia se tasi o Ana vavega. E i ai lo‘u faatuatua, aisea la e le mafai ai ona i ai sa’u vavega e faamaloloina ai a’u mai lo‘u ma’i?
Mauaina o le Faamalologa Faaleagaga
O le suesueina o vavega faamalolo a le Faaola, ua ou maua ai se malamalamaaga sili atu ma le talisapaia o se tasi o na vavega faapitoa.
Ina ua latou iloa le toe foi atu o Iesu i Kapanaumi, sa faapotopoto ai se motu o tagata e toatele, atonu ona sa latou faalogo i Ana faamalologa talu ai. E toafa tagata na siiina se tamaloa ma‘i supa i luga o se moega e pei o se fata e vaai le Faaola. Sa matua toatele naua le motu o tagata sa le mafai ai ona latou o atu i le faitotoa ma o atu i totonu o le potu e vaai ai o Ia. O le a la le mea na latou faia? Sa latou o i luga o le taualuga, faaavanoa se pu, ma tuu ifo i lalo le tamaloa e ala i le maea. (Tagai i le Mareko 2:1–4.) Oka se lelei o uo a lenei alii.
Na silafia e Iesu lo latou faatuatua ma fetalai atu, “Atalii e, ua faamagaloina au agasala” (Mareko 2:5).
I le faalogoina o lenei mea, sa tuuaia e le au tusiupu le Faaola i le upuleaga, ma faapea atu, “E mafaia ea ia te ai ona faamagaloina o agasala, ua na o le toatasi o le Atua lea?” (Mareko 2:7).
Sa tali atu Keriso, “Po o le fea e faigofie? po o le fai atu i le supa, Ua faamagaloina au agasala; po o le fai atu, Ina tulai ia, ma ave lou moega, ma savali?” (Mareko 2:9). Ae peitai ina ia latou iloa ai sa ia te Ia foi le mana e faamagalo ai agasala o le Alo o le Atua ma le Faaola o le lalolagi, ona Ia faamaloloina lea o le tagata supa (tagai Mareko 2:10–11).
Sa ou mafaufau soo i lenei aafiaga. O iinei ua aumai ai lenei tamaloa i le Faaola ina ia mafai ai ona faamaloloina mai lona ma‘i faaletino, ma o le a le mea na fai muamua e le Faaola? Ua Ia faapea ane ua faamagaloina le tamaloa mai ana agasala. Na te faamaloloina o ia faaleagaga. E ui tatou te le iloa po o a agasala na manaomia ai e lenei tamaloa le faamagaloga ma pe o le a foi le umi na feagai ai lenei tamaloa ma ana agasala ma lona ma‘i, ae ou te iloa o loo ta’u mai ai o le faamalologa muamua na faia e le Faaola i lenei tagata o le faamaloloina lea o ia faaleagaga.
A o ou mafaufau loloto i lenei mea, na ou maua le uunaiga lenei: Ua uma ona ou mauaina se tasi o vavega a Iesu Keriso—o le vavega faamalolo ua mafai ona o Lana Togiola. E i ai uma o tatou ma’i faaleagaga. Tatou te manaomia uma lava le faamalologa faaleagaga. Ua faatinoina e le Faaola le vavega o Lana Togiola mo i tatou uma ina ia mafai ai ona tatou salamo ma toe foi atu i le afioaga o le Tama Faalelagi. Tau lava ina tatou maua le faatuatua e maua ai faamanuiaga ua uma ona Ia faaavanoa mai mo i tatou. O lenei vavega faaleagaga e sili atu ona taua nai lo soo se vavega o le faamalologa faaletino e mafai ona i ai.
Lagonaina o le Faamoemoe i le Toetu
O loo ou manao pea ina ia faamaloloina faaletino.
Ma ua oo ina ou iloa ua faia foi e le Tama Faalelagi ma le Faaola lena mea. Ona o le maliu ma le Toetu o Keriso, ua ou iloa ai o le a ou toetu foi ma maua se tino e faavavau, ma atoatoa. O le a faamaloloina a‘u mai soo se faama’i o loo faatigainaina ai a‘u i le taimi nei. E ui o lena vavega ua faatulagaina e tupu i se taimi i le lumanai ma o se mea e tulimatai atu i ai, ae i lo‘u manatu e le o se vavega e itiiti ifo nai lo se faamalologa faaletino e faafuasei.
I lenei olaga faaletino, tatou te savavali ai i le faatuatua, ma le le iloa po o le a le mea o i luma atu. E ma’eu lo‘u faafetai mo lo’u faatuatua ma le malamalama o Iesu o le Keriso, o le Alo o le Atua soifua, o le Faaola o le lalolagi. Ua Ia tuuina mai ia i tatou ia meaalofa maoae. Ou te lagonaina soo Lona alofa. Ou te tatalo o le a outou lagonaina foi Lona alofa.
Ia tumau pea le malosi o lo tatou faatuatua ma le malamalama ia te Ia.