“O Le Mea na Ou Maua ai le Mafanafana,” Liahona, Ape. 2022.
O Leo o le Au Paia o Aso e Gata Ai
O Le Mea na Ou Maua ai le Mafanafana
A o pepese o‘u tuagane o auaunaga, sa laua faamalosia la’u molimau sa malamalama le Faaola ia te a‘u, alofa ia te a’u, ma o le a le tuua lava a‘u.
Ina ua ou faaipoipo, ou te lei mafaufau lava o le upu tatala le faaipoipoga o le a avea ma se vaega o la‘u talafaasolopito patino. Ae e ui lava i au aioiga ma taumafaiga sili e laveai le ma mafutaga, na alu ese atu lo‘u toalua ma faamutaina ai le ma faaipoipoga. Sa ou lagona lo’u to’ilalo.
O se taimi o le tiga loloto, faalumaina, ma miti ua le taunuu. Ou te lei oo lava i se faanoanoaga po o le faavauvau sili atu.
I le lotolotoi o o‘u faanoanoaga, na o mai ai o’u tuagane o auaunaga e vaai a‘u. Sa latou faamafanafanaina au ma tuuina mai ia te au se faamanuiaga. Ma, i o laua leo pāū, sa lauau usuina ai se viiga ou te lei iloa mo au. Mo au i lena taimi faigata, o se viiga sili ona matagofie ma faamafanafana na ou faalogo i ai. Na laua usuina faapea:
Fea ou te maua ai le filemu?
Pe a leai se mea e mapu ai
Ma pe a ou tiga?
Ita pe saua,
Ma suesue,
O lo’u loto nei? …
Sa le mafai lo’u tagi i upu ma le musika. Sa la faamautuina mo a‘u, ma faamalosia la’u molimau e uiga, i le upumoni e malamalama le Faaola ia te a‘u, alofa mai ia te a’u, ma o le a le tuua lava na o a‘u i lo’u faanoanoaga.
Ona o le mea na oo i ai le Faaola e ala i Lana Togiola, ua Ia malamalama ai i o tatou lagona. Po o a lava tulaga faigata tatou te feagai, Na te silafia o tatou faanoanoaga. Na tigaina o Ia mo tatou. (Tagai i le Alema 7:11–12.)
Ina ua uma ona pepese o‘u tuagane o auaunaga, sa ou manatua upu na faaaoga e Isaia e faamatala ai le Faaola: “E moni ua na tauave o tatou tiga, ma na tauave o tatou faanoanoa. … Ma o ona faalavalava foi ua malolo ai tatou” (Isaia 53:4–5).
E mafai ona tatou mautinoa e malamalama lo tatou Faaola o Iesu Keriso ia i tatou, alofa ia i tatou, ma o le a i ai pea i o tatou autafa—e oo lava i o tatou faanoanoaga sili ona loloto.