2022
Tutu Atu o ni Molimau o Lana Laveaiga
Aperila 2022

“Tutu Atu o ni Molimau o Lana Laveaiga,” Liahona, Ape. 2022.

Mataupu Faavae o le Auaunaga

Tutu Atu o ni Molimau o Lana Laveaiga

Ua faaalia e le Faaola Lona naunautaiga e laveai Lona nuu i auala e silisili ma faatauvaa.

Ata
tamaitai o loo fai lana ufi fofoga mo le puipuiga o loo lagolago atu i se uo ua gasegase i le KOVITI-19

Ina ua iloa e Lourdes Cutti de Alvarez o Iurukuei e lua ni fula [tuma] na i ai i lona faiai, sa ia tau atu i lana uo o Marcela Suarez Albano o le a faataotolia o ia i le falemai mo taotoga ma o le a manaomia ai ni togafitiga uumi i le maea ai o le taotoga. Sa popole o ia pe o le a faapefea ona taulima e lona aiga o se fanau e toafa le tulaga faigata.

Sa saofafai i lalo Marcela ma lana tama teine e 16 tausaga le matua, o Rocío, e mafaufau loloto i auala e mafai ona la auauna atu ai ia Lourdes. E lei leva ona i ai Marcela i le falemai na o ia. Sa ia manatuaina le lagona o le tuuatoatasi ma se eseesega na ia faia ina ua o mai Lourdes ma tuafafine o lana uarota e asiasi mai. O lea na fesoasoani ai Marecela ma Rocío e faatulaga se vaega o feau tusitusia i telefoni feaveai faatasi ma tuafafine i le uarota. O lenei mea na faigofie ai ona latou faatulagaina meaai mo le aiga. O le taulimaina o taumafataga o le afiafi na tuuitiitia ai le avega a Lourdes. Sa auina atu foi e tuafafine se mau po o se savali i aso taitasi e faamalosia ai lona agaga ma faaali atu ai lo latou alolofa mo ia.

Sa faasoa mai e le tama teine a Lourdes, o Ana Clara: “Sa faigata le le i ai o Tina i le fale. Ae na auina mai e le Tama Faalelagi le fesoasoani ia te au ma lou aiga. O se sasaa tele mai o Lona alofa. O le mea na faia e Marcela e tuufaatasia ai tagata o le uarota e fesoasoani ia i matou sa ofoofogia. O taimi uma lava matou te vaaia ai se isi aiga ua o mai, sa matou lagonaina, e ala mai ia i latou, le alofa mama o Keriso. Sa latou faasoa mai upu faamalosiau, talie mai i matou, ma fesoasoani e faamalosia i matou. E le masalomia lava sa faatasi lo tatou Tama Faalelagi ma i matou i taimi uma. Sa mafai ona matou lagonaina e ala i ataata na matou vaaia i foliga o i latou o e na o mai e fesoasoani ia i matou.

I se tausaga mulimuli ane, sa faataotolia ai Marcela i le falemai ona o se aafiaga o le fatu. Sa manatua e Lourdes ma Ana Clara le ala na faamafanafanaina ma faamalosia ai i laua e le Alii e ala ia Marcela ma Rocío ma sa naunau e faaali atu lo la alolofa ma le lotofaafetai i se taui.

Ua Valaaulia i Tatou e le Atua e Fesoasoani e Laveai Isi

Ua naunau le Alii e asiasi atu i Lona nuu i o latou puapuaga (tagai Mosaea 24:14). Na te tuuina mai ia i tatou avanoa e auai ai i le laveaiina o Ana fanau o loo manaomia le fesoasoani. Ua faafia ona Ia faaali mai i le tusi o Esoto. Sa faaaoga e le Alii ia Mose e fesoasoani ai e laveai Isaraelu mai le nofopologa i Aikupito ma fesoasoani ia i latou ia ola i le vao (tagai Esoto 12–16). Sa manaomia le faatuatua mo Mose e faaloaloa atu ai lona lima, ae o le Alii na “faatafeeseina … le sami” (Esoto 14:21).

Mataupu Faavae e Mafaufau i Ai

A o e mafaufau i ou avanoa ma tofiga e auauna atu ai i isi, mafaufau i mataupu faavae nei o loo faaalia i tala nei:

  • Afai o le a tatou galulue i le faatuatua e fesoasoani i isi, e pei o Marcela ma Mose, e mafai e le Alii ona faaalia Lona mana i o latou olaga.

  • O le aapa atu i se uo e le tagolima e le faapea e tatau lava ona faia o se gaoioiga maoae (tagai Alema 37:6). O se taumafataga mafanafana po o se feau tusitusia faigofie e mafai ona fesoasoani i le tagata ia lagonaina le alofagia ma le tausiaina.

  • O uso ma tuafafine o auaunaga a le autalavou e mafai ona fesoasoani e laveai i latou o siomia i latou mai popolega ma mafatiaga. Aua nei galo ona faaaofia i latou pe a e mafaufau loloto i auala e fesoasoani atu ai.

  • A tatou faasoa atu pe na faapefea ona laveaiina i tatou e le Alii i o tatou lava olaga, ua tatou tutu o ni molimau o Lona alofa ma le naunautai e laveai Lona nuu (tagai Mosaea 24:13–14). Vaavaai mo ni auala masani e faasoa atu ai i talanoaga, ala o faasalalauga faaagafesootai, po o feau tusitusia.

  • Tatou te le tau faatali mo le Alii e taitaia i tatou. Afai tatou te mananao e fesoasoani, e mafai ona avea i tatou ma ala o le faia o mea lelei e tele. (Tagai i le Mataupu Faavae ma Feagaiga 11:8; 58:27–28.)

O Le a se Mea e Mafai ona Tatou Faia?

Ua faaali mai pea lava pea e le Faaola, Lona naunautaiga e laveai Lona nuu o le feagaiga mai mafatiaga faaletino ma faaleagaga i auala maofa ma faatauvaa. Na te faia lenei mea ina ia mafai ai ona tatou tutu o ni molimau i isi. E mafai faapefea ona e faasoa atu mea na Ia faia mo oe?