Ua Na’o Tusiga Faatekinolosi: Autalavou Matutua
Faaaluina o le Taimi e Fai ai Mea Faigofie
Sa ou lagonaina e pei ua leiloa lo‘u sootaga ma le Tama Faalelagi ona sa ou le faia mea faigofie.
Ina ua uma ona faauu mai le aoga maualuga ma maua se galuega, sa ou tauivi e faaavanoa se taimi e faia ai mea faigofie i aso uma e faatumauina ai le malosi o lo’u faatuatua—o mea e pei o le faitauina o tusitusiga paia ma le alu i le inisitituti. Sa ou lagona le pei ua vaivai lo‘u faatuatua ma ua le toe i ai la’u sootaga ma lo‘u Tama Faalelagi.
O lea i se tasi aso sa ou tusia ai i lalo ni sini se lua i luga o se fasipepa: “Faitau tusitusiga paia i aso uma” ma “Alu i le inisitituti i vaiaso taitasi.” Sa ou tuuina lena fasipepa i luga o lo‘u puipui. Sa ou tatalo i le Tama Faalelagi ma ole atu ia te Ia e fesoasoani mai ia te a’u, ma i lena aso sa ou folafola ai ia te a’u lava o le a ou faia moni nei mea.
Ma sa ou faia. Sa amata ona ou faitauina ni mataupu se lua i le Tusi a Mamona i aso uma ma alu i le inisitituti i vaiaso taitasi. O isi vaiaso sa tatau ai ona ou faigaluega ma le mafai ai ona ou auai i le inisitituti, ma o nisi aso sa matuai o’u pisi lava e galo ai ia te a’u ona faitau a’u tusitusiga paia. Sa ou galue foi i isi sini na manaomia ai le taimi ma le gauai. Ae sa ou taumafai pea.
Sa ou lagonaina le latalata atili mai o lo’u Tama Faalelagi ia te a’u nai lo le taimi muamua ma lagonaina Lana fesoasoani soo mai ia te a’u ona sa ou filifili e mulimuli ia te Ia. O le faitauina o le Tusi a Mamona i aso uma na fesoasoani ia te a’u e malamalama atili ai i le fuafuaga o le faaolataga, lea na ou matua fiafia ai lava. Sa oo ina faigofie atu ia te a‘u ona maua tali i a’u fesili e faatatau i le faatuatua. Ma o le auai atu i le inisitituti i vaiaso taitasi na fesoasoani ia te a’u e vaai ai i le malamalama o le Atua i soo se mea ou te alu i ai. I se tulaga lautele, sa ou lagonaina atili le Agaga i lo‘u olaga.
E tele naua mea faigofie e mafai ona tatou faia e fesoasoani ai e faatumauina le malosi o lo tatou faatuatua. E mafai ona tatou mafaufau loloto i savali mai o tatou taitai, o i le lotu, tatalo faamaoni, auai i gaoioiga a le Ekalesia, auauna atu i isi, ma auai i le malumalu. O ni mea laiti ae taua nei.
I autalavou matutua o talitonu ua latou pisi tele e faia mea faigofie ia e faatumauina ai le malosi o lo latou faatuatua: ua ou vaai patino lava e mafai ona faaavanoa se taimi mo na mea. Tatou te filifili pe faapefea ona tatou faaaluina o tatou taimi i aso uma.
O se tasi o mau ou te fiafia lava i ai e uiga i le faatuatua ma faamanuiaga o le Mataupu Faavae ma Feagaiga 63:9: “Peitai, faauta, e le oo mai le faatuatua e ala i faailoga, ae o faailoga e mulimuli ia te i latou o e e talitonu.”
E i ai sa‘u molimau afai tatou te faia la tatou vaega ma faia mea e foliga faigofie i aso uma, o le a faamanuiaina i tatou e le Tama Faalelagi. A o tatou tauivi e faalatalata atili atu ia te Ia, o le a Ia faalatalata atili mai ia i tatou (tagai i le Mataupu Faavae ma Feagaiga 88:63). Ou te iloa e moni lena mea aua ua ou lagonaina le latalata mai o Ia ia te a’u a o ou faia se taumafaiga e faalatalata atili atu ia te Ia.