Na’o Tusiga Faatekinolosi
Aoao le Faatufugaga a Lē Faamalolo
E ono mataupu faavae e mafai ona fesoasoani ia i tatou e lagolago atili ai i latou e manaomia le fesoasoani.
Pe na ta‘u atu e se uo ia te oe e uiga i se tulaga faigata ma sa e le mautinoa pe o le a le mea sili e fesoasoani ai, pe na e toe tepa i tua i se taimi mulimuli ane ma moomoo maimau pe ana ese lau tali? Pe na e taliaina ea se valaauga ma popole po o le a le lelei e mafai ona e fesoasoani ai ia i latou na valaauina oe e auauna atu i ai?
O le fuaiupu lona tolu o le viiga “Faaola e, Ia Ou Alofa” (Viiga, nu. 150) ua faamalosiau mai, “Faamalolo i tagata, ma alofa i e vaivai.” O se upumoni mamana! O i tatou taitoatasi, e tusa lava po o a o tatou talaaga po o tulaga, e mafai ona avea atili e faapei o lo tatou Faaola e ala i le aoao pe faapefea ona siitia ma faamalosia isi.
O mataupu faavae nei e ono e mafai ona fesoasoani ia te oe e aoao ai le faatufugaga a le Faamalolo. 1
1. Alofa muamua.
O fanau uma a le Atua e agavaa mo le alofa ma le agalelei. Atonu tatou te le malamalama i aafiaga o se tagata lava ia, ae e mafai ona tatou faaali atu e le aunoa le alofa ia te ia. Pe a tatou popole moni lava i se isi tagata, o le a susulu atu lena mea i a tatou fegalegaleaiga. O le a fatuina ai se faavae o le faatuatuaina lea e mafai ona matuai aoga lava a o tatou faatautaia ni talanoaga luitauina—aemaise lava pe a tatou le faia ni upu sa’o i le taimi e sa’o.
2. Faalogo ina ia malamalama.
Ia faaeteete ia ’aua nei faia ni manatu taumatemate e uiga i lagona o isi po o le mafuaaga latou te faia ai mea latou te faia. Nai lo lena, fai atu fesili ma faalogo ma le sini o le malamalama po o le a le mea o loo feagai ma le isi tagata. Manatua, e te le tau faaleleia le tulaga. Afai tatou te taulai atu i le na o le foiaina o le faafitauli, e mafai ona tatou auina atu ma le le faamoemoeina le savali faapea o mea o loo faasoaina e le isi tagata e le taua.
Nai lo lena, e mafai ona tatou faataitaia le faalogo ma le onosai—taumafai ia malamalama e aunoa ma le fuafuaina o mea o le a sosoo ona tatou fai atu. A o tatou aoao e tau lava o le faalogo ma nonofo faatasi ma se tasi i o latou tiga, tatou te fatuina se lagona o le sootaga lea e mafai ona avea o se faamalologa.
3. Aoao atu upumoni.
A uma ona tatou malamalama i le tulaga, atonu tatou te lagona le fia faasoa atu o mea ua tatou iloa e uiga i mataupu faavae o le talalelei o le faamafanafanaga. Ole atu ma le agaga tatalo mo le fesoasoani a le Agaga ia iloa ai le mea e faasoa atu. Taulai atu i upumoni o le a fesoasoani i le tagata e savalia se ala e agai atu i le olioli e faavavau.
Na aoao mai Sister Michelle D. Craig, o le Fesoasoani Muamua i le Au Peresitene Aoao o Tamaitai Talavou, “ Atonu o mea aupito i taua mo i tatou, o le vaai manino lea po o ai le Atua ma pe o ai moni foi i tatou—o atalii ma afafine a ni matua faalelagi ua i ai se ‘amio atua ma le taunuuga e faavavau.’” 2
4. Faafailele le faatuatua.
E mafai ona tatou uunaia isi ia faatuatua i lo latou Tama Faalelagi, o le e silafia ma alofa ia i latou; lo latou Faaola, o lē ua malamalama atoatoa ia te i latou; ma le Agaga Paia, o lē ua naunau e taialaina i latou. O se mea e faigofie e pei o le tatalo faatasi ma i latou po o le faitauina faatasi o tusitusiga paia e mafai ona fesoasoani e faafailele ai lo latou faatuatua.
Na folafola mai e Peresitene Russell M. Nelson:
‘E le manaomia e le Alii se faatuatua atoatoa mo i tatou e maua ai Lona mana atoatoa. Ae ua Ia talosagaina i tatou ia talitonu. …
“… Amata nei ona faateleina lou faatuatua. E ala i lou faatuatua, o le a faateleina ai e Iesu Keriso lou tomai e aveese ai mauga i lou olaga, e ui i ni ou lu’itau patino e ono tetelē e pei o le telē o le Mauga o Evaresi.” 3
E faatatau lenei mea i o tatou olaga faapea foi olaga o i latou o loo tatou taumafai e fesoasoani i ai.
5. Faaauau ona auauna atu
A o tatou fausia ni sootaga ma faalogo ma le toto‘a i mea e manaomia e isi, e mafai ona tatou faatuatuaina o le a fesoasoani le Agaga ia i tatou ia iloa le ala e faatino ai—i le taimi lava lena ma i se auala faifai pea. O nisi o tofotofoga ma luitau e tumau mo se taimi umi. O i latou tatou te auauna atu i ai atonu e manaomia le fesoasoani faifai pea pe a uma ona oo mai ma ua mou atu le uluai faalavelave. A tatou sailia ma le agaga tatalo le taitaiga ona tatala lea o o tatou mata ma loto, o le a tatou maua le fesoasoani faalelagi e iloa ai pe faapefea ona auauna atu ma le atamai i le tasi ma le isi.
6. Faasoa atu a tatou lava avega.
O le toatele o i tatou e naunau e fesoasoani i se isi tagata. Ae e toafia i tatou e naunau e tali atu i se fesili faamaoni “O a mai oe?” ma se tali faamaoni? Pe o lava lo tatou faatuatuaina o isi ina ia vaivai ai ma faasoa atu mea o loo tutupu moni lava i o tatou olaga?
Ua faamatala mai e tusitusiga paia ni nai taimi na talia ai e le Faaola ma fesili atu foi mo se auaunaga. O nisi nei o faataitaiga:
-
Sa Ia taumafa i fale o isi (tagai Mareko 2).
-
Sa Ia faatagaina Ona vae ina ia mulumuluina i le suauu taugata (tagai Luka 7).
-
Sa Ia fesili atu i le fafine i le vaieli mo se vai (tagai Ioane 4).
-
Na Ia tuu atu i isi e vaai i le taimi na atuatuvale ai o Ia (tagai Ioane 11).
Atonu o le mea e tasi e mafai ona tatou aoao mai nei tala i le soifuaga o le Faaola o le, pe a tatou faasoa atu ma le faamaoni o tatou olaga i isi, ua tatou maua le avanoa e faamanuia ai isi ma faamanuiaina ai i tatou i le taimi lava e tasi. Atonu tatou te faasoa atu se mea o le a fesoasoani i se isi tagata ia iloa ai e le o tuua na o i latou i a latou tauiviga—ma atonu o i latou o se tali lea i a tatou lava tatalo.
E le manaomia ona tatou fefefe pe a o mai isi ia i tatou ma luitau o o latou olaga. A o tatou amata mai se nofoaga o le alofa ma le faalogo, o le a fesoasoani le Agaga ia i tatou ia iloa le auala e auauna atu ai ma faafaileleina le faatuatua. E mafai, ma e tatau foi ona tatou ole atu mo se fesoasoani. I nei auala uma, ua tatou mulimuli i le faataitaiga a Iesu Keriso, o le “ala, ma le upu moni, ma le ola” (Ioane 14:6). O Ia o le punavai moni o le faamafanafana ma le faamoemoe. O Ia o le Fomai Sili.