Aoaoina o le Auala e Talanoa Atu ai le Agaga ia te Oe

Saunia e Chakell Wardleigh Herbert

O Mekasini a le Ekalesia

E le faigata tele e pei ona tatou manatu i ai.

Ata

fafine o loo faitau tusitusiga paia

Ata na tusia e J. Kirk Richards

“Ua ou matua le mautonu lava pe aisea na ou maua ai se uunaiga e auauna atu ia te ia ae na te le’i talisapaiaina.”

O la‘u uo o Sara (ua suia le igoa) sa faamatala mai ma loimata ia te a’u le auala na ia faalogo ai e faapea, o se uo ua leva na maua talu ai nei sana pepe, ma o Sara, o le sa tatalo mo ni avanoa auauna atu ai, sa lagonaina le uunaiga e ofo atu e aumai lana taumafataga o le afiafi. Sa talia e lana uo le ofo.

Ae e le’i ogatusa mea e pei ona fuafuaina.

Sa faaletonu mea uma a o tapena le taumafataga, ma ina ua taunuu atu Sara i le fale o lana uo i se itula mulimuli ane nai lo le mea na fuafuaina, sa ta’u atu ma le ita e lana uo ia te ia ua uma ona aai lona aiga ma tapuni le faitotoa.

Sa matua faanoanoa Sara i le mea na tupu, ae sa tele lava ina ia lagonaina le le mautonu—na te le’i iloaina pe na ia mauaina moni se uunaiga mai le Agaga e auauna atu i lana uo pe sa na o sona lava manatu.

O le toatele o i tatou ua oo i ni tulaga faapenei—ou te iloa e faapena a’u. O tulaga na tatou lagonaina ai le uunaia e faia ni faaiuga patino, mo na o na faaiuga e le ogatusa ma le ala na tatou faamoemoeina. I taimi faapena, atonu tatou te taumanatunatu pe fesootai moni mai le Agaga Paia ia i tatou.

E talanoa moni mai le Agaga Paia ia i tatou, ae o le aoao ia iloa Ana uunaiga e manaomia ai le faataitai. O nisi nei o manatu e fesoasoani ia e iloa ai ma faalagolago i Lona leo.

1. Manatua o le mauaina o le Agaga Paia o se filifiliga.

Pe a faamauina i tatou o ni tagata o le Ekalesia, ua ta‘u mai ia i tatou i le faamanuiaga ia “talia le Agaga Paia.”

O le upu autu o le taliaina.

O le taliainao lona uiga e ui atonu na tuuina mai ia i tatou le meaalofa o le Agaga Paia, ae e pule lava i tatou pe talia lena meaalofa e le mafaatusalia e ala i le filifili e ola agavaa mo Lana mafutaga ona filifili lea e faalogo i Ana uunaiga malu.

E pei ona aoao mai Elder David A. Bednar o le Korama a Aposetolo e Toasefululua: “E le galue le Agaga Paia i o tatou olaga ona e tuu lima i luga o o tatou ulu ma o na upu taua e fa e tautalagia. A o tatou mauaina lenei sauniga, e tofu talia e i tatou taitoatasi se tiutetauave paia e faifai pea, ia naunau, ia saili, ia galue, ma ola agavaa ai ina ia tatou ‘mauaina le Agaga Paia.’” ¹

O le mauaina o le Agaga Paia ma le iloaina o Lana faatosinaga e aofia ai faatinoga o le faatuatua e pei o le tatalo, suesue i tusitusiga paia, ma le auai i le malumalu. I le iuga, afai o loo e taumafai e mulimuli ia Iesu Keriso i aso taitasi, o le a avea le “Agaga Paia ma au soa e le aunoa” (Mataupu Faavae ma Feagaiga 121:46; tagai foi fuaiupu 45).

2. Ia iloa e mafai ona talanoa mai le Agaga ia te oe i aso uma.

Ioe, i aso uma. E pei ona aoao mai i se taimi Peresitene Lorenzo Snow (1814--1901), “O le avanoa sili lea mo Au Paia o Aso e Gata Ai taitasi … o la tatou aiā tatau le mauaina o faaaliga a le Agaga i o tatou olaga i aso taitasi.” ²

Ae faatasi ai ma faatosinaga o le lalolagi ia i tatou taliga ma le tele o tiutetauave e le uma i o tatou tauau, e le o se mea e ofo ai lo tatou misia o le leo filemu, ma le itiiti o le Agaga Paia i o tatou olaga.

O se mea e mafai ona fesoasoani tatou te iloa ai Lona siufofoga i aso uma o le faia lea o se lisi o mea lelei na tutupu po o mea na musuia i tatou e fai pe tautatala ai. E tele taimi tatou te le iloa ai faaaliga sei vagana ua uma ona tatou faatinoina se uunaiga ma toe tepa i tua i o tatou aafiaga.

E taua foi le manatua faapea, ina ia faatagaina i tatou e aoao ma tuputupu a’e, atonu e le otootoina mai e le Atua laasaga uma e tatau ona tatou faia i le olaga. E pei ona aoao mai Elder Dale G. Renlund o le Korama a Aposetolo e Toasefululua, “O le sini a lo tatou Tama Faalelagi i tulaga faamatua, e le o le tatau e Lana fanau ona fai le mea sa’o; ae o le tuu atu i Lana fanau e filifili e fai le mea sa’o ma mulimuli ane avea e faapei o Ia.” ³

3. Faitau i le va o laina.

O nisi taimi atonu e ova ai lo tatou mafaufau pe o se savali e mai le Agaga. E taua le faatino i le faatuatua, ae e mafai foi ona tatou iloa pe na oo mai se uunaiga mai le Agaga Paia a o tatou mafaufau i ni nai fesili:

Pe sa e sailia se faaaliga?
O e ola i se ala e faatumauina ai le Agaga ia te oe?
Pe o uunaia oe e le musumusuga e fai mea lelei?
Pe o e naunau ea e faalogo i le Agaga nai lo ou lava manaoga?

Afai o loo e faia le mea sili e saili ai faaaliga ma e maua ai se uunaiga e le talafeagai, ia manatua upu nei a Elder Dieter F. Uchtdorf o le Korama a Aposetolo e Toasefululua: “Atonu e le mafai ona tatou vaai i le ata atoa [o o tatou olaga] i le taimi nei, ae faatasi ai ma le onosai e mafai ai ona lava mea tatou te vaaia e talitonu ai o loo i ai se mamanu matagofie, ma maoae Ma a o tatou tauivi e faalagolago i le Atua ma mulimuli i Lona Alo, o Iesu Keriso, o le a i ai se aso o le a tatou vaaia ai le fua faaiu, ma o le a tatou iloa ai sa taitaiina ma taialaina lava e le aao o le Atua a tatou laasaga.” ⁴

Lea e toe aumai ai i tatou i le talanoaga na ma faia ma Sara.

4. Saili ia iloa pe faapefea ona e lagona le Agaga.

Sa ta‘u mai e Sara ia te a’u, ina ua ia toe foi mai i le fale mai lana taumafaiga matautia e auauna atu i lana uo, sa ia fesili atu i le Tama Faalelagi pe aisea na ia lagonaina ai le uunaiga ae na faaletonu mea uma. Ma a o ia faalogo atu ma le filemu, sa ia maua se manatu manino: “E tele atu le tali nai lo le mea e te mafaufau i ai.”

A o ou mafaufau loloto i mea sa ia ta’u mai ia te a’u, sa faafuasei ona ou mafaufau i se lauga o le konafesi aoao sa ou suesueina talu ai nei—“Faapito’au Faaosolilivau,” saunia e Elder Renlund.

Sa uunaia a’u e faasoa atu nisi o mea sa ia aoao mai: “E malamalama uma Iesu Keriso i le faapito’au ma e i ai le mana e saunia ai se fofo. E leai lava se mea e faatusalia i le faapito’au na Ia onosaia . … E malamalama atoatoa o Ia i mea o loo tatou oo i ai.” ⁵

Sa ou ofoina atu le manatu atonu o lenei uunaiga e faamoemoe ia lagona ai e Sara le faateleina o lona talisapaia ma le alofa mo le Faaola. A o ou faasoaina atu lenei manatu, sa tutu mone i o’u lima atoa, ma sa ou mauaina le faamautinoaga sa ou lagonaina le Agaga.

I lena taimi, sa ou iloa ai le tele o auala na fetalai mai ai le Agaga Paia ia i tatou:

Sa i ai se manatu lelei o Sara e auauna atu i se tasi.
Sa taliina e se leo itiiti i lona mafaufau lana fesili ina ua uma ona tatalo.
Sa faafuasei ona ou mafaufau e uiga i le lauga a Elder Renlund, ma na iu ina avea ma mea na manaomia e Sara ona faalogo i ai .
Sa ou lagonaina se lagona mafanafana ina ua uma ona faasoa atu lea na faamautuina mai o lo‘u manatu e mai ia te Ia.

Sa faauma le ma talanoaga ma lagonaina le Agaga ma maua atili le mautinoa e fetalai moni mai o Ia i a i tatou. Na toe faafouina ai foi lo ma faatuatua e tusa lava pe le liliu atu uunaiga i le ala tatou te faamoemoe i ai, ae e mai lava i le Agaga Paia.

O le iloagofie o le Agaga mai ou lava mafaufauga e faigofie atu a o e ole atu i le Tama Faalelagi e fesoasoani ia te oe ia iloa le ala e talanoa mai ai le Agaga ia te oe. E manaomia ai foi se loto naunautai, se mafaufau lelei faaleagaga, ma se taliga e mafai ona tapeese faatosinaga a le lalolagi.

O loo ou aoaoina pea lenei gagana faaleagaga, ae ou te faafetai mo na taimi, e ala i le meaalofa o le Agaga Paia, ua faamanatu mai ai e le Tama Faalelagi ia te a’u o loo Ia silafia a’u ma ua saunia e taiala a’u—ma i tatou taitoatasi o e o loo faaauau pea ona liliu atu ia te Ia.