Ua Na’o Tusiga Faatekinolosi: Autalavou Matutua
Faaaogaina o Fautuaga e 5 a Peresitene Nelson e Faateleina ai Lou Faatuatua
Afai e te lagona ua tauvaivai lou faatuatua, mulimuli i fautuaga nei e lima mai le perofeta.
Tatou te feagai uma lava ma tofotofoga ma uunaiga e tofotofoina ai lo tatou faatuatua i aso uma. O nisi taimi o nei luitau e mafai ona foliga mai e lofituina tele e onosaia. Ae sei ou faamautinoa atu ia te outou e mafai e i tatou taitoatasi, o le mea moni, ona i ai le faatuatua.
Sa faamalosiau mai talu ai nei Peresitene Russell M. Nelson ia i tatou ia iloa ma “aua nei faaitiitia le faatuatua ua uma ona i ai ia i [tatou].” 1 Sa ia saunoa:
“O le faatinoina o le faatuatua e mafai ona foliga mai e lofituina. E i ai taimi tatou te ono tuufesili ai pe mata e mafai ona tatou aofa’ia ia lava le faatuatua e maua ai faamanuiaga ia tatou te matuā manaomiaina lava. …
“E malamalama le Alii i o tatou vaivaiga faaletino. E i ai taimi tatou te faaletonu uma ai lava. Ae ua Ia silafia foi e uiga i lo tatou gafatia sili. …
‘E le manaomia e le Alii se faatuatua atoatoa mo i tatou e maua ai Lona mana atoatoa. Ae ua Ia talosagaina i tatou ia talitonu.” 2
Faatasi ai ma lenei upumoni i le mafaufau, manatu i fautuaga nei e lima mai ia Peresitene Nelson i le auala e mafai ai ona faateleina teisi atu lo tatou faatuatua ia Iesu Keriso i aso taitasi.
1. “Su’esu’e.”
I le avea ai ma autalavou matutua, tatou te taitaia ni olaga pisi tele. Ae o le a pisi pea le olaga, ma e mafai lava ona tatou faaavanoaina se taimi mo le Alii ma suesue i Lana talalelei. Na aoao mai Peresitene Nelson, “O le faateleina o lou a’oa’o e uiga i le Faaola, o le faigofie atu foi lena o le faalagolago i Lona alofa mutimutivale, Lona alofa lēmafuatia, ma Lona mana faamalosi’au, faamalolo, ma togiola.” 3
O le suesueina o tusitusiga paia e le faapea o le faitauina mo le tele o itula. O le suesue e mafai ona 20, 10, pe oo lava i le 5 minute o le suesueina ose autu. Po o le a lava le taimi e tuuto atu ai, afai tatou te tatalaina o tatou loto i savali i tusitusiga paia i aso taitasi, o le a faateleina lo tatou faatuatua ia Iesu Keriso.
Ua faatumulia tusitusiga paia i tagata moni o e na lava le faatuatua ia Iesu Keriso e aveesea ai mauga pe oo ai i isi vavega. O le faatofuina o oe lava i na tala o le a fesoasoani ia te oe e malamalama atili ai i le taua o le faatuatua, pe faapei foliga o le faatuatua, o vavega e oo mai e ala i le faatinoina o le faatuatua, ma le auala e mafai ona e amata faia ai lou faatuatua ia le maluelue.
O le suesueina o le misiona, auaunaga, ma aoaoga faavae a Keriso i tusitusiga paia o le a fesoasoani ia te oe e malamalama ai i le mana o le faatuatua ia te Ia e aumaia i lou olaga ma le ala e faatatau ai Lana Togiola ia te oe. 4
2. “Filifili e talitonu ia Iesu Keriso.”
E LE Afaina le i ai o ni fesili. Manatua na toefuatai mai le Ekalesia ona sa i ai ni fesili a se tamaitiiti ma ole atu i le Tama Faalelagi ia iloa le upumoni.
Afai e i ai ni a tatou fesili pe leai se poto (tagai Iakopo1:5–6), suesue i tusitusiga paia, saili punavai faamaoni, ma ole atu i le Tama Faalelagi i le tatalo e uiga i na fesili. E finagalo o Ia ia tatou saili ma ia iloa le upumoni ma o le a le taitai seseina i tatou.
E oo lava i na fesili po o masalosaloga atonu o loo ia i tatou, ua aioi mai Peresitene Nelson ia i tatouia “filifili pea e talitonu ma tumau i le faamaoni. Avatu au fesili i le Alii ma i isi puna faatuatuaina. Su’esu’e ma se naunautaiga ia talitonu nai lo le faamoemoe e mafai ona e maua se mea sese na tupu i le soifuaga o se perofeta po o se mea faaletonu i tusitusiga paia. ” 5
Atonu tatou te mafaufau, “Ae e mafai faapefea ona ou tumau i le faamaoni pe a i ai ni a‘u fesili po o masalosaloga e le mafai ona ou maua tali i ai?”
Muamua, e mafai ona faaauau pea ona tatou saili mo le upumoni ma se naunautaiga e talitonu nai lo le saili ma se faamoemoe e saili pepelo po o ni mea sese. Ma le lona lua, e mafai ona tatou mulimuli i le fautuaga a Peresitene Nelson ia “tuu le faateleina [o o tatou] masalosaloga e ala i le faamatalaina i isi tagata masalosalo. Faataga le Alii e ta’ita’i oe i lau malaga o le sailiga faaleagaga.” 6
A o tatou faatinoina nei mea, o le a molimau mai le Agaga Paia ia i tatou e uiga i le folafolaga e mafai ona tatou “iloa le moni o mea uma lava” (Moronae 10:5).
3. “Faatino i le faatuatua.”
Ua tatou aoao mai tusitusiga paia e le mafai ona i ai le faatuatua e aunoa ma se galuega (tagai Faaliliuga a Iosefa Samita, Iakopo 2:17).
O le a se mea e te faia pe afai ua ia te oe se faatuatua tele atu? Mafaufau i ai. Tusitusi e uiga i ai. Ona maua atili ai lea o le faatuatua e ala i le faia o se mea e manaomia tele ai le faatuatua.” 7
O le faatinoina i le faatuatua e le faapea e tatau ona faigata. Tau lava o le aapa atu mo au tusitusiga paia i aso uma, ma le talitonu e mafai ona e maua le taitaiga; tatalo ma le talitonuga o le a taialaina oe e le Tama Faalelagi; ma o le filifili e mulimuli i poloaiga i aso taitasi e ui lava i faaosoosoga a le lalolagi o faatinoga uma ia o le faatuatua. Ma o le tele o lo tatou faia o nei faatinoga laiti e tumu i le faatuatua, o le tele foi lena o lo tatou mauaina o le faatuatua sili atu.
4. “Auai i sauniga paia ma le agavaa.”
O lau tautinoga e auai ma le agavaa i sauniga paia, e aofia ai le faamanatuga i vaiaso taitasi, o le a, e pei ona aoao mai Peresitene Nelson, “tatalaina le mana o le Atua mo lou olaga.” 8
Na saunoa Mai Elder Taniela B. Wakolo o le Fitugafulu, “O le auai i sauniga ma le faamamaluina o feagaiga e o faatasi ai o le a aumaia ia te oe le malamalama ofoofogia ma le puipuiga i lenei lalolagi ua matua faapogisaina.” 9
E finagalo le Tama Faalelagi ia tatou taitoatasi e selesele faamanuiaga o le auai i sauniga o le malumalu. Afai e te manao e auai i nei sauniga ae e te le o mautinoa po o fea e amata ai, aua e te fefe e saili lou epikopo mo se fesoasoani i le iloaina o le auala e saunia ai ma ia agavaa mo nei sauniga.
5. “Ole atu i lou Tama Faalelagi, i le suafa o Iesu Keriso, mo se fesoasoani.”
Na saunoa Peresitene Nelson: “O le faatuatua e manaomia ai le galue. O le mauaina o faaaliga e manaomia ai galuega. Aua ‘ai se ōle atu, e maua e ia; o lē saili foi, e iloa e ia; e toina foi i lē tu’itu’i atu” [Mataio 7:8]. Ua silafia e le Atua le mea o le a fesoasoani i lou faatuatua e tuputupu a’e ai. Ōle, ma toe ōle atu pea.” 10
E pei ona molimau mai Peresitene Nelson, o loo i ai iina le Tama Faalelagi ma Iesu Keriso e fesoasoani ia i tatou. E alolofa i La’ua ia i tatou. E mafai ona tatou tatalo e le aunoa i lo tatou Tama Faalelagi mo se fesoasoani i le iloaina o le auala e tuputupu a’e ai lo tatou faatuatua. Ma a o tuputupu a’e lo tatou faatuatua ia Iesu Keriso, o le a aveesea e lo tatou faatuatua ia mauga o puapuaga i o tatou olaga ma “fesoasoani ia te oe e liliu luitau i le tuputupu a’e ma avanoa e le mafaatusaliaina.” 11
Afai la e te lagona e pei ua mou ese atu lou faatuatua, mulimuli i nei laasaga mamana e amata ai ona faatupulaia lou faatuatua ia Iesu Keriso ma Lana talalelei nai lo le faatagaina ia faaitiitia. A o e faia lea mea, o le a faia e le Alii “mea vaivai ia avea ma mea malolosi” (Eteru 12:27), ma o le a e iloa ai o le a lava moni le malosi o lou faatuatua e aveesea ai ou mauga faaleagaga.