ដៃជំនួយរបស់ហាវិន
ហាវិន អាយុ ១៤ ឆ្នាំមកពីរដ្ឋយូថា ស.រ.អា. បានសម្រេចចិត្តដើម្បីប្រារព្ធអបអរការក្លាយជាយុវនារីម្នាក់នៅក្នុងសាសនាចក្រដោយការបម្រើដល់អ្នកដទៃទៀត ។
នាងនិយាយថា « វាបានចាប់ផ្ដើមពីគំនិតតូចមួយ » ។ « ពូរបស់ខ្ញុំបានទៅប្រទេសបង់ក្លាដែសដើម្បីធ្វើកិច្ចការមនុស្សធម៌ ហើយបានរៀនពីការលំបាកដែលប្រជាជននៅទីនោះកំពុងជួបប្រទះ ។ ខ្ញុំចង់ជួយពួកគេ—ដូច្នេះខ្ញុំបានមើលក្នុងកម្មវិធី JustServe ហើយបានមានគំនិតដើម្បីធ្វើកញ្ចប់ដែលធ្វើដោយដៃសម្រាប់ជនភៀសខ្លួននៅទីនោះ » ។
ហាវិនបានប្រមូលការបរិច្ចាគនានានៅសាលានាង បង្កើតទំព័រ GoFundMe ហើយសូម្បីតែបានយកធុងសម្រាមរបស់អ្នកជិតខាងចេញក្រៅដើម្បីជួយរៃអង្គាសប្រាក់សម្រាប់កញ្ចប់ទាំងនោះ ។ នាងនិយាយថា « ខ្ញុំយកធុងសម្រាមប្រហែល ២២ ចេញក្រៅ និងធុងវត្ថុអាចកែច្នៃឡើងវិញ ១១ ធុង ជារៀងរាល់ថ្ងៃច័ន្ទ និងអង្គារ » ។ « ជាធម្មតាខ្ញុំប្រើប្រាស់ប្រាក់ដែលខ្ញុំរកបាននោះសម្រាប់កម្មវិធីក្រុមចម្រៀងរបស់ខ្ញុំ និងដើម្បីសន្សំសម្រាប់បេសកកម្ម ប៉ុន្តែខ្ញុំបានសម្រេចចិត្តដើម្បីប្រើប្រាស់ប្រាក់របស់ខ្ញុំនៅខែនោះដើម្បីជួយទិញសម្ភារជំនួសវិញ » ។
បន្ទាប់មកហាវិនបានចេញទៅទិញសម្ភារទាំងអស់ដែលនាងត្រូវការសម្រាប់កញ្ចប់ទាំងនោះ រួមមានទាំងស្រោមជើង ស្រោមដៃ កន្សែងបង់ក និងមួក ។ នាងបានច្រកកញ្ចប់នីមួយៗ ហើយក៏បានទាក់ទងជាមួយនឹងនាយក Lifting Hands International ដើម្បីសម្របសម្រួលបញ្ជូនកញ្ចប់ទាំងនោះទៅប្រទេសបង់ក្លាដែស ។
« ពេលវេលាភាគច្រើនបំផុតនៅក្នុងគម្រោងរបស់ខ្ញុំគឺចំណាយទៅលើការរៀបចំកញ្ចប់ទាំងនោះ ។ ប៉ុន្តែរាល់ពេលដែលខ្ញុំដាក់របស់មួយចូលទៅក្នុងកញ្ចប់នោះ ខ្ញុំបានដឹងថា វានឹងបានទៅដល់នរណាម្នាក់ដែលត្រូវការ ហើយថាពួកគេនឹងទទួលពរយ៉ាងយូរដោយសារសម្ភារៈទាំងនោះ » ។
មកទល់នឹងពេលបញ្ចប់គម្រោងរបស់នាង ហាវិនបានមានអារម្មណ៍ថា ទំនុកចិត្តរបស់នាងក្នុងសមត្ថភាពរបស់នាងដើម្បីបម្រើត្រូវបានស្ថាបនាឡើង ។ « ខ្ញុំបានរៀនពីការណ៍នេះថាខ្ញុំអាចជួយបានច្រើនប៉ុណ្ណា បើខ្ញុំព្យាយាមអស់ពីសមត្ថភាពខ្ញុំនោះ ។ ខ្ញុំក៏មានអារម្មណ៍អាណិតអាសូរដល់មនុស្សដែលខ្ញុំកំពុងជួយផងដែរ ដែលបានជួយខ្ញុំឲ្យមានអារម្មណ៍កាន់តែខិតជិតនឹងព្រះអង្គសង្គ្រោះ ហើយស្គាល់អារម្មណ៍ខ្លះដែលទ្រង់មានចំពោះយើង » ។
កាលដែលយើងប្រារព្ធអបអរខួបរបស់អង្គការយុវនារី យើងម្នាក់ៗអាចចងចាំថា យើងជាគំរូនៃព្រះគ្រីស្ទ ។ ដូចជាហាវិនដែរ យើងអាចធ្វើជាជំនួយដ៏ធំដល់មនុស្សដទៃទៀត ពេលយើងព្យាយាមអស់ពីសមត្ថភាពយើងដើម្បីបម្រើដូចជាទ្រង់ធ្វើ ។