ខួបលើកទី ១៥០ នៃអង្គការយុវនារី
ដោយ សិស្ទើរ ប៊ូនី អេច ខ័រឌុន
ប្រធានយុវនារីទូទៅ
ព្រះវរបិតាសួគ៌មានកិច្ចការដ៏អស្ចារ្យមួយសម្រាប់ក្មួយៗធ្វើ នៅក្នុងការរៀបចំសម្រាប់ការយាងមកជាលើកទីពីររបស់ព្រះអង្គសង្គ្រោះ ។
កាលដែលខ្ញុំគិតអំពីការណ៍អស្ចារ្យទាំងឡាយដែលព្រះវរបិតាសួគ៌បានធ្វើសម្រាប់បុត្រាបុត្រីទ្រង់ ដួងចិត្តខ្ញុំបានពោរពេញទៅដោយភាពអស្ចារ្យ និងការដឹងគុណទាំងស្រុងចំពោះក្ដីស្រឡាញ់ដ៏ច្រើនលើសលុបដែលព្រះអម្ចាស់មានចំពោះបុត្រីទ្រង់ ។ ទ្រង់ស្រឡាញ់ក្មួយៗ !
ហើយដោយសារតែទ្រង់ស្រឡាញ់ក្មួយៗ ១៥០ ឆ្នាំកន្លងមកនេះ ទ្រង់បានបំផុសគំនិតដល់ថ្នាក់ដឹកនាំសាសនាចក្រឲ្យបង្កើតអង្គការយុវនារី ដើម្បីជួយក្មួយៗក្លាយជាមនុស្សដែលព្រះចង់ឲ្យក្មួយប្រែក្លាយ ។ ព្យាការី ព្រិកហាំ យ៉ង់ ( ១៨០១–៧៧ ) បានលើកទឹកចិត្តយើងឲ្យពង្រឹងទីបន្ទាល់របស់យើងដោយការរស់នៅតាមដំណឹងល្អ ៖ « មានតម្រូវការមួយសម្រាប់បុត្រីវ័យក្មេងនៃវង្សអ៊ីស្រាអែល ដើម្បីទទួលបានទីបន្ទាល់ដ៏រស់រវើកមួយអំពីសេចក្ដីពិត ។ … ខ្ញុំមានបំណងចង់ឲ្យក្មេងស្រីរបស់យើងទទួលបាននូវចំណេះដឹងមួយអំពីដំណឹងល្អដោយខ្លួនពួកគេផ្ទាល់ » ។១ លោកក៏បានមានប្រសាសន៍ផងដែរថា « ទីបន្ទាល់បន្ថែមទៀតត្រូវបានទទួលដោយបាតជើង ជាជាងដោយការលត់ជង្គង់ » ។២
អង្គការយុវនារីបានធ្វើការសម្របសម្រួលអស់រយៈពេលជាច្រើនឆ្នាំនេះដើម្បីបំពេញតាមតម្រូវការនៃគ្រានោះ ។ ប៉ុន្តែទោះបីជាកម្មវិធីរបស់វាត្រូវបានសម្របសម្រួល ក៏ទិសដៅរបស់វាសម្រាប់យុវនារីពុំបានផ្លាស់ប្ដូរឡើយ—គឺដើម្បីជួយក្មួយៗឲ្យទទួលបានទីបន្ទាល់ដ៏រស់រវើកមួយ ហើយឈានឆ្ពោះទៅមុខនៅផ្លូវនៃសេចក្ដីសញ្ញាជាមួយនឹងសេចក្ដីជំនឿ ។ កាលដែលក្មួយៗរៀនស្គាល់ថាខ្លួនឯងជានរណា ហើយប្រព្រឹត្តនៅក្នុងសេចក្ដីជំនឿ នោះក្មួយៗនឹងទទួលពរជ័យដែលព្រះវរបិតាសួគ៌មានក្នុងឃ្លាំងសម្រាប់ក្មួយៗ ។
ថ្នាក់ទាំងឡាយនៃក្រុមយុវនារីអំឡុងពេលជាច្រើនឆ្នាំមកនេះ
ពេលថ្នាក់យុវនារីទើបតែចាប់ផ្ដើម វាត្រូវបានហៅថា « សមាគមន៍កាត់បន្ថយ » ដោយមានគោលដៅដើម្បី « ធ្វើឲ្យប្រសើរឡើងនៅក្នុងគ្រប់អ្វីៗដែលល្អ និងស្រស់ស្អាត » ។ មកទល់នឹងដើមទសវត្សរ៍ឆ្នាំ ១៩០០ វាបានក្លាយជាសមាគមន៍កែលម្អទៅវិញទៅមកសម្រាប់ស្ត្រីវ័យក្មេង ហើយមិនយូរប៉ុន្មានថ្នាក់ទាំងឡាយបានបញ្ចូលយុវនារីដែលមានអាយុ ១២ ដល់ ២៤ ឆ្នាំ ។ ឈ្មោះនៃថ្នាក់ទាំងឡាយបានផ្លាស់ប្ដូរក្នុងរយៈពេលកន្លងមកនេះ រួមមាន នារីបោះជំរុំភ្លើង ប៊ីហៃ ហ្កាដៀន និងគ្លីនន័រ ។ កាលដែលសាសនាចក្របានលូតលាស់ ហើយយុវនារីបានជួបជុំនៅប្រទេស និងភាសាផ្សេងៗ ពួកគេបានធ្វើអស់ពីសមត្ថភាពដើម្បីសម្របសម្រួល ឧទាហរណ៍ឈ្មោះដូចជា ម៉ៃម៉េត ក្លាយទៅជា « Rosenmädchen » ( នារីផ្កាកូលាប ) ជាភាសាអាល្លឺម៉ង់ ។
សព្វថ្ងៃនេះ ដោយមានយុវនារីនៅស្ទើរតែគ្រប់ប្រទេស នោះថ្នាក់ទាំងឡាយត្រូវបានរៀបចំឡើងយោងទៅតាមតម្រូវការរបស់វួដ ឬសាខានីមួយៗ ហើយទាំងអស់នោះត្រូវបានស្គាល់ជាឈ្មោះរួមមួយថា យុវនារី ។
តម្រូវការសម្រាប់កម្មវិធីយុវនារី ក៏បានផ្លាស់ប្ដូរអស់ជាច្រើនឆ្នាំមកនេះផងដែរ ។ នេះជាការផ្លាស់ប្ដូរមួយចំនួន ។
ក្នុងឆ្នាំ ១៩១៥ ៖
-
រៀនបំពាក់កែបសេះ និងគ្រប់គ្រងសេះមួយក្រុម ។
-
ទន្ទេញវគ្គបទគម្ពីរ ។
ចាប់ពីទសវត្សរ៍ឆ្នាំ ១៩៤០ ដល់ ១៩៦០ ៖
-
បង្កើនទំនុកចិត្តរបស់អ្នកដោយការមានឥរិយាបទល្អ ( ការអង្គុយ ការឈរ និងការដើរ ) ។
-
អនុវត្តភាពរាបសាដែលជាសញ្ញាសម្គាល់របស់ស្ត្រី ។
នៅក្នុងទសវត្សរ៍ឆ្នាំ ១៩៨០ ៖
-
អានកូនសៀវភៅពួកអ្នកផ្សព្វផ្សាយសាសនាពីរក្បាល ហើយបង្រៀនមិត្តភក្តិ ឬសាច់ញាតិម្នាក់ទៀតនូវអ្វីដែលអ្នកបានរៀន ។
-
អនុវត្តលំហាត់ប្រាណយ៉ាងហោចណាស់ ៣០ នាទីក្នុងមួយថ្ងៃ ប្រាំថ្ងៃមួយសប្ដាហ៍ រយៈពេលបីសប្ដាហ៍ ។
ក្នុងឆ្នាំ ២០០៩ ៖
-
សិក្សាអំពីសារៈសំខាន់នៃព្រហ្មចារីភាព និងគុណធម៌ ។
-
អានព្រះគម្ពីរមរមនទាំងមូល ។ កត់ត្រាគំនិតរបស់អ្នកនៅក្នុងសៀវភៅកំណត់ហេតុរបស់អ្នក ។
2020
-
ណែនាំពីកម្មវិធីថ្មី
កម្មវិធីកុមារ និងយុវវ័យ
កាលដែលក្មួយៗមើលទៅលើតម្រូវការទាំងនេះតាមរយៈភ្នែកខាងវិញ្ញាណ នោះក្មួយៗនឹងកត់សម្គាល់ឃើញថា វាមាននូវគំនិតទូទៅមួយ ។ អតីតកាល និងបច្ចុប្បន្នមកជាមួយគ្នា រួមគ្នាជួយដល់យុវនារីឲ្យខិតមកកាន់តែជិតព្រះយេស៊ូវគ្រីស្ទ ហើយអភិវឌ្ឍខាងវិញ្ញាណ ខាងបញ្ញា ខាងសង្គម និងខាងរាងកាយ ។
នៅក្នុងឆ្នាំ ២០១៩ កម្មវិធីអភិវឌ្ឍផ្ទាល់ខ្លួនថ្មីមួយត្រូវបានណែនាំដើម្បីអញ្ជើញក្មួយៗឲ្យមានទាំងភាពខ្លួនទីពឹងខ្លួន និងទីពឹងព្រះអង្គសង្គ្រោះ ។ ក្មួយៗត្រូវបានអញ្ជើញឲ្យស្វែងរកព្រះវិញ្ញាណបរិសុទ្ធ ហើយដាក់គោលដៅខ្លួនឯងផ្ទាល់ កាលដែលក្មួយៗពុះពារដើម្បីប្រែក្លាយកាន់តែដូចព្រះអង្គសង្គ្រោះរបស់យើង ព្រះយេស៊ូវគ្រីស្ទ ។ ខ្ញុំចូលចិត្តការទុកចិត្តដែលកម្មវិធីនេះបង្ហាញនៅក្នុងខ្លួនក្មួយៗ ជាយុវនារីនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
ជាមួយនឹងការគាំទ្រពីគណៈប៊ីស្សព និងគណៈប្រធានយុវនារីរបស់ក្មួយៗ ក្មួយៗក៏ត្រូវបានដឹកនាំដោយគណៈប្រធានថ្នាក់ផងដែរ—មិត្តភក្ដិរបស់ក្មួយៗដែលត្រូវបានហៅ និងញែកចេញដើម្បីដាក់ផែនការ និងអនុវត្តកម្មវិធីយុវនារី ។ មានយុវនារីចំនួនច្រើនជាងកន្លះលាននាក់នៅជុំវិញពិភពលោកសព្វថ្ងៃនេះ ដែលកំពុងត្រូវបានដឹកនាំដោយមិត្តភក្ដិរបស់ពួកគេ !
យុវនារីទាំងអស់ត្រូវបានបង្រួបបង្រួមគ្នាដោយបារវចនាមួយ ដែលមាននូវគោលការណ៍គ្រឹះទាំងនេះ ៖ ក្មួយគឺជាបុត្រីសំណព្វរបស់ព្រះបិតាមាតាសួគ៌ ក្មួយជាសិស្សក្នុងសេចក្ដីសញ្ញារបស់ព្រះយេស៊ូវគ្រីស្ទ ក្មួយស្វែងរក ហើយធ្វើតាមវិវរណៈផ្ទាល់ខ្លួនដែលបានមកតាមរយៈព្រះវិញ្ញាណបរិសុទ្ធ ហើយក្មួយគឺជាសាក្សីដ៏ចែងចាំងនៃព្រះ នៅពេលក្មួយព្យាយាមក្លាយដូចជាព្រះអង្គសង្គ្រោះរបស់យើង គឺព្រះយេស៊ូវគ្រីស្ទ ហើយផ្ដល់ការងារបម្រើដល់អ្នកដទៃទៀតនៅក្នុងព្រះនាមដ៏បរិសុទ្ធរបស់ទ្រង់ ។
ក្មួយមានគេស្រឡាញ់ និងត្រូវការ !
ក្នុងនាមជាបុត្រីជាទីស្រឡាញ់របស់ព្រះវរបិតាសួគ៌ដែលមានព្រះជន្មរស់នៅ និងពោរពេញដោយក្ដីស្រឡាញ់ ក្មួយៗត្រូវបានរៀបចំជាពិសេសដើម្បីក្លាយជា « អ្នកសង្គ្រោះនៅលើភ្នំស៊ីយ៉ូន » ។៣ ដូចដែលព្យាការី រ័សុល អិម ណិលសុន បានមានប្រសាសន៍ថា « ព្យាការីគ្រប់រូបបាននិយាយអំពីជំនាន់របស់យើង នៅពេលដែលអ៊ីស្រាអែលនឹងត្រូវបានប្រមូលផ្ដុំ ហើយពិភពលោកនឹងរៀបចំខ្លួនសម្រាប់ការយាងមកជាលើកទីពីររបស់ព្រះអង្គសង្គ្រោះ ។ ចូរគិតពីចំណុចនេះ ! ក្នុងចំណោមមនុស្សទាំងអស់ដែលធ្លាប់រស់នៅលើផែនដីនេះ ពួកយើងគឺជាមនុស្សដែលបានចូលរួមនៅក្នុងព្រឹត្តការណ៍នៃការប្រមូលផ្ដុំដ៏អស្ចារ្យចុងក្រោយនេះ » ។៤
នេះគឺជាការអញ្ជើញដ៏ពិសិដ្ឋឲ្យចូលរួមក្នុងកិច្ចការព្រះវិហារបរិសុទ្ធ និងពង្សប្រវត្តិ បម្រើនៅក្នុងមុខតំណែងថ្នាក់ដឹកនាំ ផ្ដល់ការងារបម្រើដល់បងប្អូនស្រីរបស់ក្មួយៗ និងចែកចាយទីបន្ទាល់របស់ក្មួយៗជាមួយនឹងគ្រួសារ និងមិត្តរបស់ក្មួយៗ ។ ក្មួយមានគេស្រឡាញ់ និងក្មួយៗមានគេត្រូវការ !
មិត្តជាទីស្រឡាញ់របស់ខ្ញុំអើយ ព្រះវរបិតាសួគ៌មានកិច្ចការដ៏អស្ចារ្យមួយសម្រាប់ក្មួយៗធ្វើ នៅក្នុងការរៀបចំសម្រាប់ការយាងមកជាលើកទីពីររបស់ព្រះអង្គសង្គ្រោះរបស់យើងគឺព្រះយេស៊ូវគ្រីស្ទ ! ក្មួយៗគឺជាផ្នែកមួយដ៏សំខាន់នៃកិច្ចការនោះ ។ ទ្រង់ស្រឡាញ់ក្មួយៗ ទ្រង់មានព្រះទ័យចង់ឲ្យក្មួយៗរួមចំណែកក្នុងកិច្ចការរបស់ទ្រង់ ទ្រង់ទុកព្រះទ័យលើក្មួយៗ !
ខ្ញុំសូមបន្ថែមជំនឿ និងការទុកចិត្តរបស់ខ្ញុំលើក្មួយៗ ទៅលើអ្វីដែលព្យាការីជាទីស្រឡាញ់របស់យើង គឺប្រធានណិលសុន ដែលបានប្រកាសថា « ចៅៗគឺស្ថិតនៅក្នុងចំណោមមនុស្សល្អបំផុតដែលព្រះអម្ចាស់ធ្លាប់បានបញ្ជូនមកកាន់លោកិយនេះ ។ ចៅៗមានសមត្ថភាពដើម្បីកាន់តែឆ្លាត និងកាន់តែឈ្លាសវៃ ហើយមានឥទ្ធិពលទៅលើពិភពលោកជាងជំនាន់មុនៗ ! »៥
ខ្ញុំសូមអធិស្ឋានថា ក្មួយៗនឹងអនុញ្ញាតឲ្យពាក្យពេចន៍នៃបារវចនាក្រុមយុវនារីជ្រាបចូលក្នុងដួងចិត្តរបស់ក្មួយៗ ហើយចូលរួម ហើយតាំងចិត្តធ្វើកម្មវិធីថ្មីនេះ ដោយឱបក្រសោបយកគ្រប់ឱកាសដើម្បីខិតកាន់តែជិតនឹងព្រះអង្គសង្គ្រោះ ហើយរៀនបន្ថែមទៀតពីទ្រង់ ។ ចូរក្លាយជាមនុស្សដែលទ្រង់សព្វព្រះទ័យឲ្យក្មួយៗប្រែក្លាយ ។ ខ្ញុំដឹងថាពេលដែលក្មួយៗធ្វើដូច្នោះ ជីវិតរបស់ក្មួយៗនឹងត្រូវបានបំពេញដោយឱកាសទាំងឡាយដើម្បីចែកចាយពន្លឺរបស់ទ្រង់ និងក្ដីស្រឡាញ់របស់ទ្រង់ជាមួយគ្រួសារក្មួយ មិត្តភក្ដិ និងគ្រប់គ្នានៅជុំវិញក្មួយ ។ កាលដែលក្មួយៗពុះពារធ្វើតាមទ្រង់ នោះទីបន្ទាល់របស់ក្មួយៗនឹងក្លាយកាន់តែរឹងមាំ ហើយមិនរង្គោះរង្គើឡើយ ។
រូបថតដោយ ឡេសលី និលសុន
រចនារូបភាពដោយ ខូរី អេចបឺត
រូបថតដោយ ម៉ាត់ រីអ័រ