យុវមជ្ឈិមវ័យ
ការស្វែងរកស្វាមី/ភរិយាម្នាក់—និងព្រះគុណរបស់ព្រះអង្គសង្គ្រោះ
រូបថតមកពី Getty Images
ព្រះអម្ចាស់សន្យាថា « គុណ [ របស់យើង ] មានគ្រប់គ្រាន់សម្រាប់អ្នកស្លូតត្រង់ » ( សូមមើល អេធើរ ១២:២៦ ) ។ បន្ទូលទាំងនេះគួរតែផ្ដល់ដល់យើងជាយុវមជ្ឈិមវ័យនូវសេចក្ដីសង្ឃឹម និងការលួងលោម ជាពិសេសពេលវាទាក់ទងនឹងការស្វែងរកដៃគូអស់កល្ប ។ ជាញឹកញាប់ ពួកសិស្សរបស់ព្រះយេស៊ូវគ្រីស្ទដែលងាយទុកចិត្តគេស្វែងរកសេចក្ដីស្រឡាញ់ដោយចិត្តបើកចំហរ តែត្រូវបានធ្វើឲ្យខកចិត្តដោយក្ដីសង្ឃឹមដែលមិនបានដូចចិត្ត ឬត្រូវរកាំចិត្តដោយអាកប្បកិរិយាមិនល្អពីអ្នកដែលពួកគេណាត់ដើរលេងជាគូរនោះ ។ ការស្វែងរកនេះអាចបង្កើតជាការភ័យខ្លាច កំហឹង ភាពជូរចត់ និងភាពតានតឹង ជាពិសេសប្រសិនបើវាបន្តអស់ជាច្រើនឆ្នាំហួសពេលរៀបការដែលអ្នករំពឹងទុក !
ប៉ុន្តែ ដូចដែលអ្នកអាចស្រមៃឃើញថា ព្រះពុំមានព្រះរាជបំណងឲ្យយើងមានអារម្មណ៍ទាំងនេះឥតឈប់ឈរនោះទេ ពេលយើងធ្វើតាមការបញ្ជារបស់ទ្រង់ឲ្យរៀបការ ហើយចិញ្ចឹមបីបាច់គ្រួសារដ៏សុចរិត និងរីករាយនោះ ។ តាមពិតទៅ ព្រះមានព្រះទ័យចង់ឲ្យយើងមានអារម្មណ៍រីករាយ អំឡុងពេលនៃការស្វែងរកនេះ !
ដោយទុកការណ៍នេះនៅក្នុងគំនិត អត្ថបទនៅក្នុងផ្នែកនេះត្រូវបានរៀបរាងឡើងដើម្បីជួយអ្នកដកយកភាពតានតឹងចេញពីការស្វែងរកដៃគូអស់កល្ប ។ អ្នកនឹងឃើញមានរឿងរ៉ាវអំពី របៀបដើម្បីរីកចម្រើននៅក្នុងជីវិត ដោយមិនគិតពីស្ថានភាពរៀបការ ឬនៅលីវ និងដំបូន្មានដែលអាចជួយរៀបចំអ្នកសម្រាប់អាពាហ៍ពិពាហ៍ដ៏ពោរពេញដោយក្ដីស្រឡាញ់បំផុត ពោរពេញដោយការបីបាច់ និងចាក់ឫសយ៉ាងជ្រៅ ។
ពេលអ្នកស្វែងរកមនុស្សម្នាក់ដែលនឹងប្រគល់ដួងចិត្តទាំងមូលរបស់គេដល់អ្នក ដូចដែលអ្នកប្រគល់ដល់គេ នោះសូមយកពេលមួយភ្លែតដើម្បីអានអត្ថបទទាំងនេះ ។ ខ្ញុំសន្យាថា អត្ថបទមួយក្នុងចំណោមនេះនឹងបំភ្លឺដល់ដួងចិត្តអ្នក ហើយជួយអ្នកឲ្យទុកចិត្តថា ព្រះគុណរបស់ព្រះអង្គសង្គ្រោះពិតជាគ្រប់គ្រាន់សម្រាប់អ្នក ។
ដោយស្មោះស្ម័គ្រ
លេនដុន ហរស៍