Juon Bao Edik Ekar Kakeememej Eō
Laura Linton
Utah, USA
Pija jān Carolyn Vibbert
Kar 26 aō iiō ke eaar jako ajri eo moktata nejim̧ro ļeo pāleeō. Kennedy ekar nan̄inmej kōn juon brain tumor ke ekar 13 wōt allōn̄ rūttoan. Ālkin jilu iien m̧wijm̧wij ko, ļalem alen chemotherapy, im būjin uno ko im kōm̧adm̧ōd ko, ekar mej ilo pā ko peim ilo 20 allōn̄ rūttoan.
Ekar rup būruō kōn jako eo an leddik jidikdik eo nejū aiboojoj, kajnet, im kajoor. Ekōjkan an menin maron̄ waļo̧k? Ekōjkan aō maron̄ wōnm̧aanļo̧k wōt? Ekar wōr būjin aō kajjitōk, bōtaab ejjeļo̧k kar ippa jabdewōt uwaak ko. Jet raan ko ālkin kallib eo, ļeo pāleō im n̄a kar loļo̧k uleej eo, ekab de kalbubu kōn wut piin̄ ko raiboojoj im repin ko jān iien kallib eo.
Ke ikar ļōmņak kōn leddik eo nejū, iaar lo juon koon in bao euddik, ekanooj dik n̄an an ekāke, kālōn̄ kālaļ ioon ujoj eo. Bao in ekar kakeememej eō kōn Kennedy kōnke ekar riakwe menin mour ko. Bao eo ekar kālōn̄ kālaļ ioon ujoj eo n̄an lōb eo im kar ikkure ilo repin ko im wut ko. Ikar ettōn̄ dikdik, jeļā bwe en̄in ej lukkuun ta eo Kennedy enaaj kar kōņaan. Innām bao eo ekar ekkāke n̄an eō. Ikar jab n̄an jidik kōm̧akūt juon m̧ajōļ. Bao jidikdik eo ekar ekkāke n̄an lukkuun turu, babutok ioon neeō, kar kiil mejān, im oļo̧k im kiki.
Ekar pen aō kōmeļeļeik en̄jake ko ikar būki ilo iien eo. Iaar en̄jake āinwōt eļan̄n̄e iaar bōk juon atbakwōj jān Kennedy. Ikar jab maron̄ jibwe leddik eo nejū, bōtaab bao jidikdik in—juon menin kōm̧anm̧an an Jemādwōj ilo Lan̄—kar maron̄ itok im kakkijeik bar uddik eo bōran ioō, kakeememej eō bwe Jemedwōj Ilan̄ ekar meļeļe metak eo aō im iien otemjej pād ijo n̄an kaenōm̧m̧an eō im jipan̄ eō ilo mālijjon̄ in.
Elder David A. Bednar jān Doulul eo an Jon̄oulruo Rijilōk ro ekar ba, “N̄e naan ko rejjab maron̄ letok kaenōm̧m̧an eo ilo iien rup bōro jej aikuj … , n̄e meļeļe eo im un eo ejjab maron̄ letok jetjet in meļeļe kōn kalijōkļo̧k ko im kōmattōr ko an mour, … im n̄e ej āinwōt bwe bōlen jej lukkuun in makeļo̧k iaad, em̧ool jejeraam̧m̧an jān tūriam̧o kake eo em̧m̧an an Irooj” (“The Tender Mercies of the Lord,” Liahona, May 2005, 100).
Ijjan̄in de bōk aolep uwaak ko n̄an kajjitōk ko aō, bōtaab tūriam̧o in em̧m̧an ekar bar kam̧ool n̄an eō bwe Jemedwōj Ilan̄ ej iakwe Kenndy im n̄a im bwe kōn en̄taan in pinmuur eo an Nejin, Jisōs Kraist, ewōr aō kōjatdikdik bwe Kennedy, ļeo pāleō, im n̄a naaj koba ippān doon bar juon alen āinwōt juon baam̧le.