Iakwe jān Būlōn̄ Wōjke eo Ekwojarjar!
Iakwe, kom̧ro Margo im Paolo.
Allōn̄ in, n̄an kemeeme Jepļaaktok Eo, kom̧ro ej loļo̧k jikin in ijo Visōn eo M̧oktata ekar Waļo̧k ie 200 iiō ko rem̧ootļo̧k!
Ke Josep Smith ekar 14 an iiō, ekar jokwe ilo juon em̧ kōm̧m̧an jān aļaļ ilo New Yok, USA. Ekar wōr ļalem brother im jilu sister. Ekar pokake pāāren ro an im ekar lukkun jeļā m̧ōttāik ro jet. Ekar riiti Baibōļ ippān baam̧le eo an, ak rekar jab aolep etan n̄an juon wōt kabun̄.
Josep ekar juon eo eniknik ilo jerbal. Ekar jipan̄ jōki wōjke ko bwe baam̧le eo an ren maron̄ ekkat kein ikkan. Ekar barāiwōt jipan̄ baam̧le eo an aini bōlbōl ko rej toor jān wōjke maple ko n̄an kōm̧m̧an juka.
Josep ekar kōņaan kappukot juon kabun̄ eo me āinwōt kabun̄ eo ilo Bailbōļ. Juon raan ekar etal n̄an būlōn wōjke ko im ekar jar. Jemedwōj Ilan̄ im Jisōs Kraist rekar waļo̧k n̄an e. Rekar ba n̄an e bwe em̧ōj jeorļo̧k jerawiwi ko an. Rekar barāinwōt ba n̄an e ke ej aikuj jab kobaļo̧k ilo jabdewōt kabun̄ ko. Ejjab to Kabun̄ eo an Jisōs enaaj bar jepļaaktok!
Elōn̄ armej ro rekar kajjirere kōn Josep kōn ta eo ekar loe. Rekar ba ekar maron̄ ekkōn an naan. Ak Josep ekar kapen wōt ilo an kwaļo̧k m̧ool eo. Ekar ba, “Ikar jeļā, im iaar jeļā bwe Anij ekar jeļā, im iban kar maron̄ kariab e” (Josep Smith—Bwebwenato 1:25).
Rainin, armej remaron̄ loļo̧k jikin eo ijo Josep ekar jar ie. Eaiboojoj im eļap aeņōm̧m̧an.
Ajri rein rej jokwe ijo Josep ekar rūttoļo̧k ie!
Ijeļā bwe Būlōn Wōjke eo Ekwojarjar ej juon jikin eo ejeņoļo̧k kōnke Josep Smith ekar jar im lo Jemedwōj Ilan̄ im Jisōs ie.
Piper D., 5 an iiō, New York, USA
Eļap aō kam̧m̧oolol bwe jej jokwe epaakeļo̧k m̧weo im̧ōn Josep Smith. Em̧m̧an ippa etal n̄an Grandin Em̧ eo kōn kein būriin eo. Eļap an em̧m̧an ippa alooje ijo rekar kōm̧m̧an kadedeikļo̧k kape eo jinointata an Bok in Mormon.
Rijeje eo ej jokwe ilo, New York, USA
Kom̧m̧ol kōn ami loļo̧k Būlōn Wōjke eo Ekwojarjar ippam tok. Bar lo eo juon iien!
Pija in ļaddik ro jān Julie Poulson; kōmeļeļe jān Katie McDee