Itok, Loor Eō: Book of Mormon
Ta Meļeļe In Ijtō n̄an N̄a?
M̧aaj 30–Eprōļ 12 Ijtō
Ilo Ijtō, jej keemem e “raan eo eorōk tata ilo bwebwenato”1—Jerkakpeje eo an ad Rilo̧mo̧o̧r Jisōs Kraist. M̧akūtkūt in ej dilep eo n̄an karōk in m̧ōņōņō eo an Jemedwōj Ilan̄.
Ilo mour eo m̧okta, kar kāālete Jisōs Kraist n̄an erom ad Rilo̧mo̧o̧r. Ekar kallim̧ur n̄an kōpooj juon iaļ n̄an kōj n̄an jeorļo̧k jerawiwi ko ad im n̄an bar ro̧o̧l n̄an m̧weo im̧ōd ilan̄.
Ilo jibbon̄ōn Ijtō eo m̧oktata, Jisōs ekar kakūrm̧ool kallim̧ur eo An. Ekar ajno̧ ioon mej. Āinwōt juon tōprak, “E ej meram eo im mour eo an laļ; aaet, meram eo ejjeļo̧k jem̧ļo̧kin, eo emaron̄ jab tinaad; aaet, im barāinwōt mour eo ejjeļo̧k jem̧ļo̧kin, kōn menin ejjab maron̄ wōr ļo̧k wōt mej” (Mosaia 16:9).
Ta kōjeraam̧m̧an ko Jerkakpeje eo ekar būkitok n̄an eok?
Ukweļo̧k
Jisōs Krasit ej kajjitōk ippād kajjojo, “Kom̧in jab ke kiiō ro̧o̧l tok n̄an Eō, im ukeļo̧k jān jero̧wiwi ko ami, im oktak, bwe In maron̄ kōmour kom̧?” E ej kallim̧ur, “Jabdewōt eo enaaj itok, e Inaaj bōk” (3 Nipai 9:13–14). Ekōjkan am̧ en̄jake n̄e kwoj ukweļo̧k?
Jerkakpeje
Mej aaet enaaj waļo̧k, bōtaab anjo̧ eo an Rilo̧mo̧o̧r eo ioon mej ej kam̧ool bwe aolep renaaj jerkakpeje—ānbwin im jetōb rej bar juon alen koba ilo jekjek eo eweppān (lale Alma 11:43). Ekōjkan an jeļāļo̧kjeņ eo kōn Jerkakpeje eo bōktok n̄an eok kōjatdikdik?
Mour indeeo
Pinmuur eo an Rilo̧mo̧o̧r eo ej kōm̧m̧an bwe en pidodo mour indeeo, ak mour āinwōt Anij. N̄an bōk kōjeraam̧m̧an in, jej aikuj pokake kien ko. Būreejtōn Russell M. Nelson ekar ņa etan iaļ eo n̄an mour indeeo “iaļ in bujen eo.”2 Ta eo jej aikuj kōm̧m̧ane n̄an ļoor iaļ in n̄an mour indeeo?