Eļapļo̧k an Aorōk Jān juon Bāānkōļ Jeļba
Sylvie Houmeau
Quebec, Canada
Kōmeļeļe jān Emily Lui
Ke kar kajjitōk ippa n̄an tōl ekōnono eo ilo kūlaaj eo an Kōrā kōn kūr eo an Rilo̧mo̧o̧r n̄an naajdik sip ko An, ikar kālet bwe eļan̄n̄e ikōņaan kōketak sister ro, ij aikuj kōm̧m̧ane juon men n̄an juon iaan sip ko An.
Ikar kobaik aō peran im ikar an̄in tok ippa juon sister eo eto an bar jar n̄an juon m̧akūtkūt eo an kōrā. Ekar m̧ōņōņō in eo̧ron̄ kūr eo aō im ekar itok limoin kōn iien eo. Ikar en̄jake bwe menin ekar juon waanjon̄ak em̧m̧an, im ikar kijoroor n̄an kwaļo̧k en̄jake eo aō. Ak Irooj ekar ļapļo̧k ijo An n̄an katakin eō.
Juon jibbon̄ ke ikar tōrreejjab, ikar kile bwe bāānkōļ jeļba eo aō ekar jako. Bāānkōļ in me kar letok āinwōt juon menin letok ilo kemeem eo aō ke ikar etal n̄an France, ekar wōr meļeļe me eaorōk ippa. Ikar jino kappukote ilo eiten aolep jikin ko, ak ikar jab maron̄ loe. Innām ikar ba n̄an eō make bwe eļan̄n̄e ikajju jar, enaaj m̧ōkaj aō lo bāānkōļ eo aō.
Ālkin aō jar, ikar kappukote aolep jikin. Ium̧win ruo raan ikar jar ilo m̧ool im lukkun kappukote. Ikar akweļap n̄an Jemedwōj Ilan̄ n̄an jipan̄ eō kappukote, ak ikar jab maron̄ loe. Buruō ekar lukkuun eddodo kōnke bāānkōļ in aō ekar aorōk ippa.
Juon jota ļaddik eo nejū ekar jar ippa iturin beet eo aō. Ālkin jar eo am, ekar bōk juon men im letok n̄an n̄a. Ej bāānkōļ eo aō! Ekar lo ilo ium̧win peet eo. Bolen ijjab maron̄ loe ilo iien aō kar kappukote. Ikar lukkuun m̧ōņōņō bwe ebar ro̧o̧l tok.
Ejjab to, ikar en̄jake juon im̧we: “Kwoj ke jar āinwōt am̧ jar ilo m̧ool kōn sister ro am̧ ilo Kabun̄ in? Rej ke lukkuun aorōk n̄an eok āinwōt bāānkōļ eo am̧? Ak sister ro am̧ ro rejjab uwaan Kabun̄ in? Kwoj ke barāinwōt jar kōn er?”
Ke ikar kwaļo̧k en̄jake eo aō kōn bāānkōļ eo aō ejako ilo Doulul eo an Kōrā ro, ekar juon ekōnono eo em̧m̧an. Ikar ba n̄an sister ro bwe ikar ekkatak bwe n̄e Rilo̧mo̧o̧r ej kajjitōk ippād n̄an naajdik sip ko An, jej aikuj keememej bwe “aorōk in jetōb ko ekanooj ļap ilo mejān Anij” (Katak im Bujen Ko 18:10). Ej kōņaan bwe jen keememej ro ipeļaakid im n̄an iakwe, kea, im jar kōn aolepān ad maron̄ kōn er. Ilo ad kōm̧m̧ane āindein, jenaaj lo bwe aolep eļapļo̧k aer aorōk jān juon bāānkōļ jeļba.