Rūm̧m̧an Ded ro
Ekōjkan an Rūm̧m̧an Ded ro Kōm̧m̧an Oktak ilo Jepļaaktok eo ej Wōnm̧aanļo̧k wōt
Rūm̧m̧an ded rekar iien otemjej eaorōk ilo jerbal in lo̧mo̧o̧r.
Jabdewōt iien kwoj ron̄ juon kūr jān juon ritōl an Kabun̄ in n̄an bōk ko̧naam̧ ilo Jepļaaktok eo ej wōnm̧aanļo̧k wōt ak n̄an jipan̄ ain Israel, kwonan̄in ke ļōmņak, “Ta eo imaron̄ kōm̧m̧ane? N̄a ij juon armej bajjōk,” “N̄a idik,” “Ijjan̄in de m̧are,” ak “Ejjab bwe jeļā ippa. Ta oktak eo imaron̄ kōm̧m̧ane?”
Kajjojo iaad ekar wōr kain ļōmņak rōt kein rej kejoktok ļōmņak ko ad jān iien n̄an iien. Bōtaab kajjieon̄ n̄an kaikōn̄ am̧ pere eok make ilo am̧ riiti jantōj kein rej itok.
-
Josep Smith ekar 22 wōt iiō dettan ke ekar jino ukōt Bok in Mormon.
-
Oliver Cowdery ekar barāinwōt 22 an iiō im John Whitmer ekar 26 (im er jim̧or ekar ejjeļo̧k rejtaer) ke raar jino jerbal āinwōt rijeje ro an Josep.
-
Ilo 1835 eo, ke Doulul eo an Jon̄oulruo Rijilōk ro kar jino in tata kūr, dettan iiō ko aer raar jān 23 n̄an 35 iiō dettaer.
-
Elōn̄ iaan Armej ro Rekwojarjar jino in tata raar kobatok ilo Kabun̄ in im kar kajeeded gospel eo raar rūm̧man ded ro.
Ilo aolep men, Anij ekar jerbal ilo rūm̧m̧an ded ro ilo raan ko im̧aan tata an Jepļaaktok eo an gospel eo an Jisōs Kraist. Armej ro rekar āinwōt kom̧.
Ļōm̧ņak kake mennin.
Kabun̄ in ejjamin naaj kar ajeded ilo aolepān laļ in rainin eļan̄n̄e aolep raar ļōmņak reban kar maron̄ kōm̧m̧ane juon oktak. Im kom̧—aaet kom̧!—kom̧ij m̧ōttan diktak in epepe eo kar kāālete n̄an wōnm̧aanļo̧k wōt ilo kōjepļaaktok im tōl Kabun̄ eo an Jisōs Kraist rainin.
Kar Jilkintok Kom̧ N̄an Ijin. Kiiō. Kōn juon Un.
Ke kōnono kōn epepen in ad, Būreejtōn Russell M. Nelson ekar katakin: “Kom̧ij mour ilo ‘awa eo kein kajen̄o̧uljuon.’ Irooj ekar kean̄ bwe en̄in ej iien eo āliktata Enaaj kūr rijerbal ro n̄an jikin kallib eo An n̄an aiintok rikāālet ro jān emān kona ko an laļ in. (Lale K&B 33:3–6.) Im kar jilkintok kom̧ n̄an bōk koņami ilo aintok in.”1
Ļōmņak kōn kajoor eo an 65,000 mijenede ro rej jerbal aolep raan rej kwaļo̧k gospel eo aolep raan, ilo aolepān laļ in. Ļōmņak kōn aolep rūm̧m̧an ded ro rej kōm̧m̧ani bujen ko ilo tampeļ, bōk n̄an em̧m̧an eo an priesthood eo kar kōjepļaaktok im kōjeraam̧m̧an ko an tampeļ im bujen n̄an tiljek, n̄an kōkajoorļo̧k baam̧le ko aer, im n̄an kalōk aelōn̄ in kiin̄ eo an Anij ioon laļ in. Ļōmņak kōn rūm̧m̧an ded ro rej jerbal āinwōt ritōl ro an Kabun̄ in ilo aolepān laļ in. Ļōmņak kōn ro me rej bun̄ m̧aanļo̧k n̄an ļoor Jisōs Kraist kōjekdo̧o̧n aolep apan̄ ko ņae er. Rūm̧m̧an ded ro rej juon m̧ōttan eo aorōk an Jepļaaktok eo jān jino in. Im Jepļaaktok eo ej wōnm̧aanļo̧k wōt ekar juon m̧ōttan aorōk an mour ko rellōn̄ an rūm̧m̧an ded ro rej uwaan Kabun̄ in.
Ta Meļeļe in Jepļaaktok eo n̄an Kōj
N̄an elōn̄ iaad, ad bōk koņaad ilo Jepļaaktok eo ej itok āinwōt juon tōprak jān ta eo kar katakin kōj. N̄an Vennela Vakapalli, juon rūm̧m̧an ded rioktak jān Andhra Pradesh, India, “Jepļaaktok eo ej kōn kappukōt revelesōn. Josep Smith ekar kappukōt revelesōn ilo wōjke ko. Eaar kapilōk ippān Irooj, ekar kōttar uwaak eo, ekar kijenmej. En̄in ej ta eo ij iakwe.” Vennela ej kōmeļeļik, “M̧okta jān aō kar ron̄ kōn Jepļaaktok eo, ikar jab jeļā eļap kōn kappok revelesōn. Juon iaan men ko reļļap tata me ekabwilōn̄ eō ej ewi jon̄an an kar jolok iien n̄an bōk revelesōn jān Anij. Ej ta eo ikar ekkatak jān Jepļaaktok eo.”
Emma im Jacob Roberts, juon ripālele redik jān Utah, USA, rej errā bwe Jepļaaktok eo ej kōn “an revelesōn wōnm̧aanļo̧k wōt”—n̄an kōj make im n̄an laļ in—”bwe en maron̄ wōr juon ad rikanaan, juon rikōnono ijin ioon laļ in jān Anij, kanooj lale bwe jabdewōt apan̄ ko laļ in ej būktok, ewōr juon eo me ej jerbal im jar im ukōt ippān n̄an kanooj lale bwe jej pojak im maron̄ jelm̧ae jabdewōt apan̄ ko laļ in ej būkitok āinwōt an oktak ko.”
“Ekanooj in ļap jeļāļo̧kjeņ me ej itok ippān Jepļaaktok eo ekōm̧m̧an an mour eo aō pidodoļo̧k im dikļo̧k an inepata,” Jacob ej ba. Ej itok kōn juon kam̧ool “bwe ewōr juon Anij eo ej iakwe kōj im ej mije kōj,” Emma ej ba. “Jibadbad eo An ej ad m̧ōņōņō. Āinwōt rūm̧m̧an ded ro, jemaron̄ lukkuun in lōke im ļoor E kōnke jejeļā kōttōpar eo An ej ad m̧ōņōņō. Jejeļā bwe jej armej ro n̄an indeeo, im bwe ej letok n̄an eō eļap kōjatdikdik im tōmak, bwe jabdewōt men ij kōm̧m̧ane kiiō im jabdewōt bōd ko ij kōm̧m̧ani kiiō, ij maron̄ wōt ukweļo̧k im epād ippa iien eo n̄an eddōkļo̧k im ekkatak.”
Kain kam̧ool jab in ekar barāinwōt jipan̄ Ramona Morris, juon rūm̧m̧an ded jān Barbados, ke ekar ilo iien eo jino ekkatak kōn jepļaaktok eo. Ibwilijin men ko jet, liin ekar bōk juon naan in kam̧ool bwe “Jemedwōj Ilan̄ ej pād n̄an kōj. Jepļaaktok eo ej bōktok aenōm̧m̧an eo n̄an ro me rej kajjitōkin mour eo aer im kajjitōkin karōk eo an Anij n̄an er.”
Bōtaab jekdo̧o̧n n̄e meļeļe kōn Jepļaaktok eo ekar bōktok alikkar eo ilo mour eo an, liin ekar barāinwōt kwaļok bwe “kanooj ettoļo̧k jān opiij ko reļļap an Kabun̄ in, epen n̄an ekkejel ippān gospel eo, bōtaab kōnke ewōr ippa juon naan in kam̧ool ekajoor gospel eo kar kōjepļaaktok, ijeļā bwe jekdo̧o̧n n̄e ittoļo̧k jān opiij ko reļļap an Kabun̄ in, ij maron̄ in wōt en̄jake juon m̧ōttan Jepļaaktok eo, bwe ijjab makeļo̧k iiaō.”
Im liin ekar jab ettoļo̧k, Rūm̧m̧an ded ro ipeļaakin laļ in rej bōk koņaer ilo Jepļaaktok eo kōn jerbal in jipan̄ an tampeļ, menmenbwij an baam̧le, im jerbal in mijenede. Kōn meļeļe kōn revelesōn an juon make me jej bōk jān ekkatak kōn Visōn eo M̧oktata an Josep Smith im Jepļaaktok eo, jemaron̄ aolep wōnm̧aanļo̧k wōt n̄an kappukōt n̄an jeļā ankilan Anij im ta m̧ōttan eo jemaron̄ kōm̧m̧ane ilo Jepļaaktok eo ej wōnm̧aanļo̧k wōt.
Map jān Getty Images
Rūm̧m̧an Ded ro rej Tōl Kabun̄ in
Jemaron̄ in rūm̧m̧an ded wōt, bōtaab jemaron̄ in ritōl ro an Kabun̄ in kiiō. Kōjekdo̧o̧n an e wōt membōr in Kabun̄ in ilo baam̧le eo an, Janka Toronyi jān Győr, Hungary, ej kajoorļo̧k jān rūm̧man ded ro m̧ōttan aer bōk ko̧naer ilo m̧ōttan ko jet an Jepļaaktok eo: “Elōn̄ iaan ro m̧ōtta rekar etal n̄an mijen, im ekar kanooj in em̧m̧an n̄an lo eddōkļo̧k eo aer innām rej bar ro̧o̧ltok im ekanooj in ļap aer eddōkļo̧k jān aolep en̄jake ko aer. Ej juon en̄jake em̧m̧an n̄an kōmwōj aolep. Im ej kabwilōn̄lōn̄ iien otemjej n̄an lo rūm̧man ded ro ejjeļo̧k rejtaer m̧ōtta jerbal ilo kūr ko aer im jet iien em̧ool iien ko rem̧m̧an rej kōm̧m̧ani er make, āinwōt baļintier n̄an rikapilōk ilo kweilo̧k ko an FSY (N̄an Kōkajoorļo̧k Jodikdik ro). Ij en̄jake āinwōt Jepļaaktok eo ejjab aolep iien kōn katakin armej ro kōn gospel eo—ej kōn kōkajoorļo̧k membōr ro me repād ippād.”
Rūm̧m̧an ded ro ilo Hungary remeļeļe bwe rej ritōl ro an Kabun̄ in ilju im jekļaj. “Rej aikuj kōm im kōmij aikuj ekeke n̄an kadedeļo̧k jerbal eo, eo ej jet iien tōr jān jon̄an,” Janka ej kwaļo̧k. “Irooj ej kōm̧ōkajļo̧k jerbal eo im kōmij m̧ōttan. Jet iien kōmij ļōmņak, ‘Ekōjkan aō aikuj in kar kōm̧m̧ane menin?’ Bōtaab em̧m̧an n̄an lo bwe ritōl ro am ekanooj in ļap lōke eo ippāer ilo kōm. Ekaļujurjur n̄an ro me rej iakwe Kabun̄ in im wōr juon naan in kam̧ool ippāer, kōnke kōm jeļā bwe juon raan kōm naaj bōk eddo eo. Kōmij aikuj in bōk eddo eo n̄an eddōkļo̧k eo ilo jetōb am make.”
Sean im Stefany Joseph jān Western Australia rej bōk ko̧naer ilo Jepļaaktok eo kōn lale jodikdik ro ilo ward eo aer. “N̄an n̄a, bōk koņaō ilo Jepļaaktok eo ej jipan̄ epepen ko an ilju im jekļaj meļeļe ta gospel eo im ekōjkan an maron̄ jipan̄ er im ro jet ilo mour ko aer,” Stefany ej ba. “Kōm maron̄ jipan̄ ejake juon pedped eo ekajoorļo̧k n̄an Kabun̄ in ilo laļ eo am tok ālik.”
“Kōm kōņaan jipan̄ jodikdik ro bōk juon naan in kam̧ool kōn Bok in Mormon im Josep Smith im kile bwe rej lukkuun in ajri ro nejin Anij kōn er make,” Sean ej kōmeļeļeik. “Kōmij jab kōņaan bwe en juon men eo rej baj al wōt kake ilo Būraimere—kōm kōņaan bwe ren lukkuun jeļā bwe ej m̧ool.”
N̄an Vennela, mour kōn gospel eo ilo India ekar jab aolep iien pidodo, bōtaab liin ejeļā kōn kajoor eo an membōr rūm̧m̧an ded ro enaaj im̧we ro jet im jipan̄ eddōkļo̧k eo an Jepļaaktok eo. “Ijin, aolep rūm̧m̧an ded ro rej lukkuun tiljek. Rej kappukōt iien ko rem̧m̧an n̄an kwaļo̧k naan in kam̧ool ko aer,” liin ej ba. “Kōmij āinwōt bainier ro ilo India. Kōmij em̧m̧akūt jān jikin ko roktak im jet iaam em̧ool ilo̧k jān baam̧le ko am. Mour emaron̄ in apan̄ ijin, bōtaab kōmij kāālet wōt n̄an mour kōn gospel eo. Jeje ko rekwojarjar rej letok n̄an kōm kōjatdikdik eo, kajoor eo, im peran eo.”
Jekdo̧o̧n ia eo kōmij pād ie, āinwōt rūm̧m̧an ded ro, kōm maron̄ wōnm̧aanļo̧k wōt n̄an bōk juon kareel eo ekajoor tata ilo Jepļaaktok eo ej wōnm̧aanļo̧k wōt kōn tōmak eo am im kallim̧ur eo n̄an gospel eo.
Ilju im Jekļaj eo an Kabun̄ in: Ej Pedped wōt Ioom
Kōmij ilju im jekļaj eo an Kabun̄ in. Kōmij pād ilo tariņae eo āliktata. Jemedwōj Ilan̄ ej kōjatdikdik iood n̄an jipan̄ E kōm̧m̧ane jerbal eo An—jerbal in ukōt-mour indeeo eo An. E ejeļā ebwe ad kajoor n̄an bun̄ m̧aanļo̧k wōt im tariņae ņae aolep men ko rijum̧ae eo ej kajjieon̄ kapo im m̧oņ. Im Setan ej jino inepata. E ejeļā ej tariņaeik juon pata eo eluuj ie kōnke jerbal eo an Irooj enaaj anjo̧.
“Kōm jeļā bwe Irooj ej kōm̧ōkajkaj jerbal eo im ejjeļo̧k juon emaron̄ kabōjrake,” Janka ej ba. “Kōm jeļā enaaj waļo̧k jekdo̧o̧n ta. Bōtaab kōmij aikuj jokāālet eļan̄n̄e kōm naaj erom m̧ōttan im jipan̄e m̧aanļo̧k ak alook wōt jen jo iturājet. Ewōr ippād anemkwoj in kāālet eo n̄an erom m̧ōttan, im ewōr ippād naan in kam̧ool eo n̄an maron̄ in kāālet jim̧we eo im kāālet n̄an ļoor Kraist. Kōmij aikuj in erom juon m̧ōttan.”
Kōn menin ej pedped wōt iood n̄an kāālet an wōn rejete jej pād ie.
Ej pedped wōt iood n̄an bōk peran eo n̄an jutak kōn ta eo jej tōmak ie.
Ej pedped wōt iood n̄an kappukōt revelesōn eo an juon make n̄an mour ko ad.
Ej pedped wōt iood n̄an kōtļo̧k an apan̄ ko reppen jej jelm̧ai kōkajoorļo̧k tōmak eo ad ilo Rilo̧mo̧o̧r eo.
Ej pedped wōt iood n̄an ļoor E im kōm̧m̧ane aolep ijo jemaron̄e n̄an bōktok ro jet n̄an E.
Ej pedped wōt iood n̄an niknik n̄an jem̧lo̧k in ilo wāween eo em̧m̧an tata jemaron̄e.
Jej lukkuun ped ilo raan ko āliktata. Im tōl Kabun̄ in ilo ta eo Būreejtōn Nelson ej ņa etan “tōre in bōk eddo eo eļap tata ilo bwebwenato in laļ in ”2 ej āinwōt juon jerbal eddo. Bōtaab ļōmņak kake—Jemedwōj Ilan̄ ebwe An lōke kōj im kar kōjparok kōj n̄an pād ioon laļ in ilo juon tōre ejeno̧lok, iien in n̄e jej jelm̧ae kōn kapok ko im kōm̧ad ko ejjeļo̧k jem̧lo̧kier im ekanooj in lōn̄ ļōmņak in jum̧ae ko.
Kōn jilkintok kōj n̄an ijin ilo tōre in bōk eddo eo eļaptata an aorōk, Jemedwōj Ilan̄ ekar jab ejaake juon jekjek eo ijo jemaron̄ likjab ie. E ejeļā kōjatdikdik eo ad, kajoor eo ad, peran eo ad, im āliktata, E ejeļā jemaron̄ kōm̧m̧ane juon oktak ilo Jepļaaktok eo an Kabun̄ in, jekdo̧o̧n ta iiō eo ad ak jekjek in m̧are eo ad Jekdo̧o̧n ta ewi pen in mālijjon̄ ko ad, ak ewi pen in tōl im kwaļo̧k gospel eo ilo aolepān laļ in emaron̄ in, kōn E ilo turejet eo ad, eo emaron̄ bōlen tariņae ņae kōj? E enaaj jipan̄ kōj kōtōprak men eo epen.