Itulau i le lotoifale
O Le Saogalemu i Falelotu o le Tiutetauave lea o Tagata Uma o le Au Paia o Aso e Gata Ai
O le faafouga i taiala o le puipuiga o se tali atu lea i ‘tulaga fesuisuiai i le lalolagi atoa’.
Ua toefaafou e le Ekalesia a Iesu Keriso o le Au Paia o Aso e Gata Ai ana taiala e fesoasoani ai i ona taitai ma tagata ia faatumauina le saogalemu a o i ai i fanua o le Ekalesia. “O le fesuisuiai o tulaga i le lalolagi atoa” o le pogai lea o lenei faafouga, sa tusia ai e le Au Epikopo Pulefaamalumalu i se tusi i taitai o le Ekalesia.
“E tatau ona fesoasoani nei taiala e aoao ai taitai ma tagata i le ala e faateleina ai le saogalemu i falelotu ma gaoioiga a le Ekalesia,” na fai mai ai le tusi na sainia e Epikopo Pulefaamalumalu o Gérald Caussé ma ona fesoasoani, o Epikopo Dean M. Davies ma Epikopo W. Christopher Waddell. “Matou te valaaulia taitai ina ia talanoaina i totonu o aufono a uarota ma siteki ma ia faaaoga e aoao atu ai tagata o le ekalesia, pe a tatau ai, e taulima ai ni popolega faalelotoifale. E tatau i taitai ona faaaoga faalelei nei taiala ma ia nofouta i tulafono faalelotoifale.”
Ua faatonuina e taiala le Au Paia o Aso e Gata Ai ia faalagolago i tulafono faalelotoifale ua faamalosia i faalavelave faafuasei ma fautua atu ni faiga masani e mafai ona faatino e le au paia e faateleina ai le saogalemu. Ua aofia i nei mea le nofouta o le tagata i lona siosiomaga, tumau le toafimalie, faailoa atu le faauoga ma le faaaloalo i tagata asiasi uma, ia le tuua na o oe i se fale o le Ekalesia ma mulimuli i uunaiga a le Agaga Paia mo le taitaiga ma le saogalemu. E fesoasoani foi taiala i taitai ia tali lelei atu i taimi pe a oo ina faalavelave se tagata po o se vaega i taimi o se sauniga tapuai.
Ua faaiuina taiala i le fautuaga i le auala e tali atu ai i se tagata fanafana mataalia po o isi tagata faaoolima mataalia. O nei faatonuga o loo aoao atu e tagata tomai faapitoa o tulafono faamalosia ma le vaega o puipuiga e fai ma auala sili ona talafeagai e tali atu ai i se tulaga faapea. Ua faatonuina taitai ma tagata o le ekalesia ia tamoe, lafi pe fusu, e faalagolago i le tulaga [o loo i ai]:
Tamoe. Solaese vave pe afai o loo i ai se auala saogalemu. Ia vave le minoi atu i se auala ulufafo aupito saogalemu ma alu ese mai le falelotu ma agai atu i se nofoaga saogalemu. Aluese filemu, e aunoa ma le tatai atu o le mafaufau o le tagata faaoolima. O tagata matutua e tatau ona faamautinoa ua vaai faalelei ma faitauina ia tamaiti uma lava. Aua ne’i toe foi i le falelotu po o se ofisa po o se potuaoga mo ni aitema patino. Aua le alu ma feaveai soo se mea e ono sese ai le vaega e faamalosia tulafono, e faapea o se auupega.
Lafi. Afai ua le mafai ona e solaese saogalemu, lafi mai le iloa atu e le tagata faaoolima. Afai e mafai, ia tapuni, loka, ma poloka faitotoa o potuaoga, ofisa, po o isi potu o loo e lafi ai. Tape moli, tape leo o telefoni feaveai, ma ia faapupuu i le fola ma ia mamao ese mai faamalama. Afai e i ai se taugafana i le va o le vaega e faamalosia tulafono ma le tagata faaoolima, e tatau i tagata uma o i totonu o le falelotu ona nonofo pea i totonu o o latou potu ua polokaina, sei vagana ua faatonuina atu e le vaega e faamalosia tulafono.
Fusu. I le avea ai o se faatinoga mulimuli lava, afai ua leai se taimi e tamoe pe lafi ai, ia fusu loa ma le tagata faaoolima. Ia faaaoga soo se mea o i ai e fai ma auupega, ma fusu e taofi ai le tagata faaoolima. Afai o i ai ma nisi tagata, ia faatulaga e puipui outou lava.