Pe o E Ola Ea i se Olaga e Sefulu-Talā?
Saunia e Epikopo Gérald Caussé
Epikopo Pulefaamalumalu
Pe o e vaavaai atu ea i le tāua faaletino o mea po o le tāua faavavau o mea?
I tausaga ua mavae, a o avea au ma se peresitene o le siteki i Pale, Farani, sa ta’u mai ai ia te au e faapea, o le a sūsū mai Peresitene Gordon B. Hinckley (1910–2008) i Pale mo ni aso se lua, ma o le a avea au ma ana avetaavale. O le a ou pikiina o ia i le malaevaalele ma ave o ia i lona faletalimalo ina ia mafai ai ona malolo o ia. O le aso e sosoo ai, ou te aveina ai o ia mo ni ana asiasiga. O se tasi o asiasiga sa manao o ia e faia i se fanuamaliu a le militeli a le I.S. lea o loo lagomau ai lona uso, o lē na maliu i le fulū i le taimi o le Taua I a le Lalolagi.
Ae ina ua ou pikiina Peresitene Hinckley, sa lei foliga na vaivai tele o ia. Sa ia uu i luga lona tootoo ma fai mai, “Peresitene Caussé! Ta o loa e galulue!”
Sa fia alu o ia i le fanuamaliu i le taimi lava lena. Ae paga lea, na ou logoina le faatonu e o atu iina i le aso e sosoo ai, o lea la, ina ua ma taunuu atu, na tapuni ma na leai se tasi sa i ai iina.
O le aso na sosoo ai, sa ma pisi tele ma sa leai se taimi ma te toe o atu ai i le fanuamaliu. I lena afiafi, sa tuuina mai ai e Peresitene Hinckley se $10 (I.S.) pepa ma fai atu, “ou te faamalie atu na le’i mafai ona ou alu i le fanuamaliu. Ou te matuai faafetai tele pe a mafai ona e faatauina ni fugalaau ma tuu i le tuugamau o lou uso.”
Sa ou faatauina fugalaau, ae ou te lei faaaogaina lena tupe pepa. O le aoauli o le Aso Sa na sosoo ai, sa matou o ai ma lo’u aiga ma tuu teu fugalaau i luga o le tuugamau. Sa matou pueina se ata o lo matou aiga i luma o le tuugamau ma fugalaau uma ma auina atu ia Peresitene Hinckley.
O loo ia te au pea lena $10 pepa. O loo i totonu o a’u tusitusiga paia. Afai ou te fesili atu, “O le a le taua o lenei tupe pepa?” o le tele o tagata o le a fai mai, “Sefulu tala.” Ae ia te au, e tele mamao atu lona taua. O lenei tupe pepa sa sefulu tala lona aoga, ae mo a’u, e taugata tele i le taimi lenei. O se mea e manatua o sina taimi sa ou maua faatasi ma se perofeta a le Atua.
Tuu i Lou Olaga le Faamoemoega ma le Aogā e Faavavau
I o tatou olaga, o loo i ai le tele o mea e i ai sona tāua e le gata mai faaletino. E toatele tagata o loo ola i se mea ou te ta’ua o se olaga “sefulu tala.” O ituaiga tagata nei e mafai ona faapea mai, “Aai, feinu, ma fiafia, aua o taeao tatou feoti” (2 Nifae 28:7).
Ae o le tāua o minute taitasi o le olaga iinei i le lalolagi e i ai se aafiaga maoae e i tua atu o lenei olaga e tau i le faavavau. O le faafeagai o uiga faaalia o le “aai, feinu, ma ia olioli” o le ia “toloai mo outou lava oa o le lagi” (Mataio 6:20).
O ni nai faataitaiga nei o le tuuina o le faataua e faavavau i mea:
-
O le malumalu. Mo le toatele o tagata, e na o se maota matagofie lava. E matagofie, ae mo i tatou, o le maota o le Alii, lea e mafai ona tatou maua ai sauniga ma osia ai feagaiga e faataga ai o tatou olaga ma o tatou aiga ina ia faavavau.
-
O Le Tusi a Mamona. O le tele lava o tagata o le a faapea mai, ua na o se tusi e i ai se tala manaia. Ae mo i tatou, o le afioga a le Atua.
-
Sefuluai. O le toatele o tagata o le a fai mai, “O le tupe lena e te tuuina atu i lau ekalesia.” Mo i tatou, e le na o se tupe. O se faaaliga o le faatuatua ma le usiusitai i poloaiga a le Alii. Ma e faatusa i faamanuiaga e mafai ona tatou maua pe a tatou faamaoni.
-
O le Upu o le Poto. E toatele tagata e faapea mai, e faatatau i le soifua maloloina faaletino. E moni lena mea, ae e sili atu nai lo o lena. Ua tatou iloa afai tatou te mulimuli i le Upu o le Poto, o le a faatasi le Agaga o le Alii ma i tatou.
-
Molitino faaleulugalii. O le tele lava o tagata e manatu ua na o se tuinanau faaletino. Ae i le va o se alii ma se tamaitai ua faaipoipoina, aemaise lava i latou o e ua faamauina i le malumalu, e sili atu nai lo o lena. E faatatau i le i ai o se aiga ma le faaali atu o le alofa ma le lotogatasi i totonu o se faaipoipoga.
-
Aoga ma galuega. O le toatele o tagata o le a faapea mai, o le auala tatou te maua ai se olaga toafimalie ma taulima ai manaoga o o tatou aiga. Ae tatou te talitonu e faatatau foi i le fausiaina o le ola tutoatasi, o se mataupu faavae faaleagaga lea. E mafai ona tatou faaaogaina lo tatou faitalia e tutoatasi ai ma fesoasoani i isi.
Saili le Ogatasi i le va o le Faaletino ma le Faaleagaga
O itu faaletino ma faaleagaga o o tatou olaga e felavesa’i vavalalata lava, ma e le tatau ona tatou taumafai e tuueseese i laua. O vaega faaletino e tatau ona auauna atu ai i faamoemoega e faavavau.
Ua fetalai mai le Alii, “O mea uma lava ia te au, e faaleagaga ia” (Mataupu Faavae ma Feagaiga 29:34). Ua Ia fetalai mai foi e faapea, “o le tagata o le agaga lea. O elemene ua faavavau, ma o le agaga ma le elemene, ua soofaatasi e le matuueseeseina, e mauaina se atoatoaga o le olioli; ma a tuueseese, e le mafai e le tagata ona maua se atoatoaga o le olioli” (Mataupu Faavae ma Feagaiga 93:33–34). E le mafai ona atoatoa lo tatou agaga pe a aunoa ma le tino, ma o le mafuaaga lena o le i ai o le toetutu. O le faaeaga e i ai i le sootaga ogatasi ma le lotogatasi i le va o le faaletino ma le faaleagaga.
Faia o Faaiuga faatasi ai ma le Agaga
O faaiuga e faatatau i mea faaleagaga po o mea faaletino e tatau ona faia faatasi ma le Agaga o le Alii. E i ai se vaaiga e faavavau a le Alii. Na te silafia mea uma mai le amataga e oo i le iuga. E alofa atoatoa o Ia ia i tatou—e sili atu nai lo le tatou alolofa ia i tatou lava. O le sailia o Lona finagalo, nai lo o tatou lava loto, o le a atili ai ona fiafia ma lelei o tatou olaga. E mafai ona tatou iloa Lona finagalo e ala i Lona Agaga, lea e oo mai e ala i le tatalo, faitauina ma le mafaufau loloto i tusitusiga paia, ma le fefautuaai ma o tatou aiga.
E mafai faapefea la ona tatou iloa Lona Agaga? Ua fetalai mai le Alii:
“Ma o le mea ua lē faagaeetia ua lē mai i le Atua, ma o le pouliuli lea. O le mea e mai i le Atua o le malamalama lea; ma o ia o lē e mauaina le malamalama, ma tumau pea i le Atua, e mauaina le malamalama atili; ma o lena malamalama o le a tupu susulu malamalama tele pea lava pea seia oo i le aso e atoatoa ai” (Mataupu Faavae ma Feagaiga 50:23–24).
I se isi faaupuga, o mea e faagaeetia ai i tatou, o mea e atiina ae ai i tatou, o mea e aumaia ia i tatou le olioli, o mea e maua ai le malamalama i o tatou olaga, ua musuia mai le Atua. O nisi taimi e oo lava i o tatou lava manatu e musuia e le Atua.
Sa ou faia ni faaiuga e faavae i uunaiga faaleagaga ina ua fai mai lo’u poto e fai se isi mea. O lena mea ua faamaonia lava e sili atu ona maualuga i le mea o le a faatonu mai e lo’u poto.
Mo se faataitaiga, ina ua uma ona ma filifili ma lo’u toalua ma te faaipoipo, sa ma malilie e tuu se vaaiga e faavavau i la maua faaipoipoga—ia toaga pea i le Lotu, ia faaipoipo i le malumalu, ma isi lava mea. O na filifiliga ua matuai faamanuiaina ai i ma’ua ma tuuina mai ai le umi ma le loloto i la ma’ua faaipoipoga.
I se tasi o taimi i lo’u olaga, sa i ai sa’u galuega sa maualuga le totogi faatasi ai ma ni tiutetauave ma ni faailoaga maoae. I se tasi aso na fai mai ai lo’u toalua, “Ua e pisi tele i lau galuega. E tatau ona e tatalo ma mafaufau pe tatau ona su’e sau galuega fou o le a mafai ai ona tele ou avanoa e auauna atu ai i le Alii.” Sa ma tatalo ma maua se faamautinoaga mai le Agaga e tatau ona sui la’u galuega. Ae sa fai lava si o’u le mautonu. Ina ua ou tatalo e uiga i ai, sa ou ta’u atu i le Alii le igoa o le kamupani e tasi o le a ou mafaufau e faigaluega ai pe afai ou te faamavae ma la’u galuega.
O le tolu vaiaso mulimuli ane, sa ou faafesootaia ai se ofisa e sueina tagata faigaluega ma faia ai se faatalanoaga. I le faaiuga, na fai mai ai le tagata, na faatoa talosaga nei mai lava se tasi o ana kamupani mo se faatonu fou. O le kamupani lea na ou ta’ua i la’u tatalo. O se kamupani laitiiti, ma e ta’i 10 tausaga pe a ona faatoa i ai lea o ni avanoa faapenei. O se vavega lava.
Sa ou talasua ma ta’u atu i lo’u toalua, “o loo i ai sa’u tala fiafia ma se tala le lelei. O le tala fiafia o le a faafaigaluegaina ai a’u e le kamupani lena. O le tala le lelei o le, ou te manatu o loo teuina e le Alii se mea mo a’u.”
Sa ou saini e amata i le kamupani lena i se Aso Faraile. I le Aso Toonai, na valaauina ai au e avea ma peresitene o le siteki.
Sa ma tuuina ma lo’u toalua se faataua tele atu i uunaiga a le Agaga ma le tautuaina o le Atua nai loo faamanuiaga faaletino po o lo ma’ua lotomalie faaleatamai po o le aloaiaga faaleagafesootai. Sa ma’ua sailia le finagalo o le Alii ma maua ai le faamautinoaga faaleagaga e faapea, o le a lelei mea uma. O se tasi lena o aafiaga aupito maoae i lo’u olaga.
Tagai i le Tāua Moni
Ou te le’i faanoanoa i le faamuamuaina o le faaleagaga i luga a’e o se isi lava manatu. O nisi taimi e lagona ai le pei o se osigataulaga, ae ua ou aoaoina e faapea, i se vaaiga umi mulimuli ane, e na’o le pau lenei o le mea e taulia. Aua le ola i se olaga e “sefulu-talā.” O le faaogatusa o o tatou olaga ma le faamoemoega o lo tatou olaga nei o se tuufaatasiga lea mo le olioli ma le fiafia, e le gata i lenei olaga ae faapea foi i le olaga a sau.
Ata pue o kopi o le Tusi a Mamona na saunia e Celia Jeffery