Autalavou Matutua
Vaaiga i Na Taimi Pogisa ma le Faanoanoa
Atapue mai le Getty Images
Sa tofu i tatou uma ma ni aso pogisa ma faanoanoa lea tatou te lagona ai le pei e leai se mea o sa’o. I taimi faapena tatou te ono fesili ifo ai ia i tatou lava, “Aisea ua tupu ai ia te au? Aisea ua tupu ai i lenei taimi? E faapefea ona ou onosaia lenei mea?” O le mea e lelei ai, e lei tuua na’o i tatou. E mafai ona tatou faalagolago i le taitaiga alofa a lo tatou Tama Faalelagi.
A o ou laitiiti, sa masani ona ou faitio ma fesiligia mafatiaga sa feagai ma au— seia oo ina tupu se mea lea sa aafia ai lo’u olaga e faavavau. Sa ou aafia i se faalavelave, o le mea na leaga ai, sa motusi uma ai tamatamailima o lo’u lima agavale. E ui i le faigata ona onosaia o lena mea, o lena tofotofoga na aoao ai au e faatuatua i le Tama Faalelagi. Ma, e ui i mea uma, ae sa ou aoao e autalia’imala ma ia lotofaafetai ma ia aua ne’i fati. Sa i ai se mea o totonu o a’u sa suia atoa, ma sa ou lagonaina le ala na faaloaloa mai ai e le Tama Faalagi Lona alofa ia i tatou ma taitaia i tatou e ala i mea faigata uma lava tatou te oo i ai i le olaga. E mafai ona faitau i la’u tala i le lomiga faafuainumera o le lomiga lenei.
I lana tusiga o loo i le itulau e 44, o loo faamanatu mai ai foi e Julieta ia i tatou, e mafai ona tatou fiafia e oo lava i le lotolotoi o le afi faamama ma vaavaai atu i le lumanai ma le faatuatua. I tusiga ia e na’o tusiga faaeletonika e maua ai, ua faamanatu mai ai e Lydia ia i tatou ia vaavaai mo le faamoemoega i o tatou tofotofoga. O tofotofoga o mea ia e fesoasoani ia tatou faapei ai o lo tatou Tama Faalelagi. Ma i le itulau 48, ua molimau mai Brixton, a o mafai e le Faaola ona faamalolo o tatou manu’a, e aofia ai ma luitau o le soifua maloloina faalemafaufau, o nisi taimi e talafeagai ai—ma e sili ona lelei—le aapa atu i isi mo se fesoasoani.
Ou te iloa ma lo’u loto atoa o faigata uma—o taimi pogisa ma faanoanoa uma i o tatou olaga—e mafai ona taitai atu ai i se faamoemoega paia ma o lena faamoemoega o le faamamaina lea o i tatou ma suia i tatou ina ia i ai se aso e mafai ai ona tatou atoatoa e pei o lo tatou Tama Faalelagi.
Alofaaga,
Seneuefa