O Le Faamanuiaga o le Toefuataiga mo Oe
Saunia e Elder Dale G. Renlund
O Le Korama a Aposetolo e Toasefululua
Ona o le talalelei toefuataiina, ua mafai ai ona e iloa po o ai moni lava oe ma le mea e faamoemoe mai le Atua e te faia.
Ata na tusia e Robert Barrett
I le tala faamusika o le Ta Laauili i luga o le Taualuga, sa faamatala ai e le tagata autu o Tevi, se aoga e tasi o tu ma aga o lona nuu, i le faapea mai, “Ma ona o a matou tu ma aganuu, ua iloa ai e i matou uma taitoatasi po o ai o ia, ma le mea e faamoemoe mai le Atua na te faia.”1 E te le tau faalagolago i tu ma aga mo lenei malamalamaaga. Ona o le Toefuataiga, e mafai ai ona e iloa po o ai oe ma le mea e finagalo le Atua e te faia. Afai e te le o mautinoa i le taimi nei, e i ai sau aia tatau ma se matafaioi e maua ai lena malamalamaaga.
Ua 200 tausaga talu ona maua e Iosefa Samita e 14 tausaga le matua le uluai faaaliga faalelagi na faapea ona amata ai le Toefuataiga. Na oo atu Iosefa i na togavao na lata ane i lona fale i le setete o Niu Ioka, ISA, ona sa popole o ia i le manuia o lona agaga ma sa manao e fia iloa po o le fea o ekalesia e auai. Sa ia fia iloa po o ai o ia ma le mea na faamoemoeina e le Atua mai ia te ia. Sa ia maua tali sa ia sailia, ae sa tele atu mea na ia aoaoina i lena aso ma i le 24 tausaga na sosoo ai. Ona o upumoni toefuataiina, e le gata ina mafai ona e iloa le mafuaaga na foafoaina ai oe e le Atua, ae ua mafai foi ona e iloa lou faasinomaga faaiu. E pei o Iosefa Samita, e mafai foi ona e iloaina mo oe lava.
O Ai Oe?
O oe o se atalii/afafine faapelepele o le Atua, ua Ia silafiaina ma alofaina e Ia. Na iloa e Iosefa lenei mea ina ua faaali mai le Atua le Tama ma Iesu Keriso ia te ia i le 1820. Sa faamaumauina e Iosefa, “Sa fetalai mai le tasi o i laua ia te au, ma fofoga mai ia te au i lo’u igoa ma fetalai mai, ao tusi ane i le tasi—O Lo’u Atalii Pele Lenei. Faalogo ia te Ia!” (Iosefa Samita—Talafaasolopito 1:17).
Na silafia e le Atua ia Iosefa. E moni foi lena mea mo oe. E silafia e le Atua oe. Ua leva ona Ia silafia oe, ma ua Ia alofa ia te oe i le umi ua Ia silafia ai oe. Na te silafia lou gafatia paia e alualu i luma ma ia faaeaina faatasi ma Ia. O lona uiga o loo ia te oe le gafatia e avea ai faapei o Ia.2
Ua tautino mai e le “O Le Aiga: O Se Folafolaga i le Lalolagi” lenei upumoni toefuataiina o’oo’o: “O tagata soifua uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga.”3 O lenei upumoni e ono foliga manino mai i tagata ua loa ona avea ma tagata o le Ekalesia. E le faapea [le manatu] o le toatele o au failotu Kerisiano lauiloa o e ua folafola mai e faapea, o lou faamoemoega autu o le tapuai, viia, ma faaaloalo i le Atua, ma na pau le faamoemoega o le Atua e foafoa ai oe, o le, ina ia mafai ona e vivii, tapuai, ma auauna atu ia te Ia.
Na ala mai ia Iosefa Samita, na faaali mai ai e le Atua e faapea, o Lana galuega ma Lona mamalu o le faamamaluina lea o oe, ina ia aumaia lou tino ola pea ma le ola e faavavau.4 E ui o le faamamaluina o oe e faamamaluina ai o Ia, o le sini ma le faamoemoega a le Atua o le fatuina lea o se siosiomaga e mafai ai ona e alualu i luma. O le iuga faaiu o lou alualu i luma e mafai ona avea o se olioli tumau. Sa aoao e le Tupu o Peniamina lona nuu: “Ia outou manatunatu i le tulaga manuia ma le fiafia o i latou o e e tausi i poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga; ma afai latou te tutumau i le faamaoni e oo i le iuga, e talia i latou i le lagi, ina ia mafai ona latou mau faatasi ma le Atua i se tulaga o le fiafia e lē gata” (Mosaea 2:41).
O loo i ai i le finagalo o le Atua le mea e sili ona lelei mo oe. E agalelei ma alofa o Ia. Ua Ia silafia, ina ia e alualu i luma, sa manaomia ona e sau i le lalolagi, maua se tino, ma iloa le sa’o mai le sese e ala i ou lava aafiaga. E le finagalo o Ia ia faavavau ona e tumau ai o se tamaitiiti po o se tagata talavou, pe finagalo foi o Ia e suia oe ia avea o se fagafao ua aoaoina e usitai tauaso. E leai, e finagalo o Ia e te filifili e mulimuli ia te Ia ma e malosi e ala i ou aafiaga e tuputupu ae ma avea ma se suli i mea uma o loo ia te Ia.5 O lou faasinomaga paia lenei.
O nei upumoni o ni faavae ia i le aoaoga faavae toefuataiina lea na amataina i lena tatalo faatauvaa na faia e Iosefa Samita.
O Le A Se Mea o Faamoemoe Mai Ai le Atua Ia te Oe?
E lua faamoemoega autu o le Atua mo oe. Muamua, ua faamoemoe o Ia e te aoao e uiga, ma mulimuli i Lana fuafuaga. Lona lua, ua faamoemoe o Ia e te fesoasoani atu i isi ia aoao ma mulimuli i Lana fuafuaga.
Sa aoaoina oe i le ata o le faaolataga a le Atua i malo o le muai olaga ma sa [e] taliaina. Atonu sa le o se faaiuga faigofie lenei mea. E tasi-vaetolu le fanau a le Tama Faalelagi na teenaina le fuafuaga. Ae sa e manao e te sau i le lalolagi, maua se tino, ma faaaoga lou faitalia e filifili ai e mulimuli i le fuafuaga. Na silafia e le Atua, ma sa e iloaina foi, a o i ai i lenei lalolagi o le a e faia ni mea sese ma faia agasala. O nei agasala o le a tumau ona taofia ai oe mai le nofo ai i le afioaga o le Atua seiloga e mafai ona togiolaina oe mai au agasala. O le fuafuaga a le Atua na saunia ai Iesu Keriso e fai ma ou Togiola. Na togiolaina e Iesu Keriso au agasala ma mea sese ina ia mafai ai ona aoga le fuafuaga o le faaolataga a le Atua mo oe.6 Sa Ia totogiina le tau tupito ina ia mafai ai ona Ia “maua le Tama ona aia o le alofa mutimutivale” mo oe (Moronae 7:27).
O le fuafuaga a le Atua na tuuina mai ai foi mo oe ina ia maua le meaalofa o le faitalia ina ia mafai ai ona e iloa “o le lelei mai le leaga” (2 Nifae 2:5). O oe o se “sui“ ia te oe lava (tagai i le Mataupu Faavae ma Feagaiga 58:28), e mafai ona faia ni filifiliga mo oe lava. Ae a e faia ni faaiuga leaga po o ni mea sese, e faamoemoe mai le Atua e te faaaogaina lou faitalia e salamo ai. E mafai ona maua le salamo e ala i le Togiola a Iesu Keriso ma e manaomia ina ia mafai ona e mama ai i luma o le Atua.7
E te salamo pe a e liliu atu i le Atua ma faaaoga le faatuatua ia Iesu Keriso. O le faalagolago i le salamo, o le Togiola a Iesu Keriso ua mafai ai ona faamagaloina oe mai le faasalaga lea na semanu e te maua. E faaali atu ua e salamo e ala i le usiusitai i tulafono ma sauniga o le talalelei. Ma, a e salamo, o le a faapea ona e lē ponā, mamā, ma paia.
E pei ona folafola atu e le Atua ia Atamu, “O le ala lenei o le faaolataga mo tagata uma, i le toto o la’u Toatasi na Fanaua” (Mose 6:62). Ona o lo tatou faatuatua ia Keriso ma i le fuafuaga a le Tama Faalelagi, e mafai ai ona tatou “olioli i afioga o le ola e faavavau i le lalolagi lenei, ma le ola e faavavau i le lalolagi a sau, o le mamalu ola pea lava” (Mose 6:59).
O le mea autu lona lua ua faamoemoe mai e le Atua ia te oe, o le fesoasoani atu lea i isi ia aoao i Lana fuafuaga ma fesoasoani ia latou mulimuli ai. O le taimi lava e te malamalama ai o le Atua ma lona Alo o Iesu Keriso, e alolofa ia te oe, e avea ma se mea masani lou manao e faasoa atu lenei upumoni i isi. O le faasoaina atu o le talalelei a Iesu Keriso ua ta’ua foi o le “faapotopotoina o Isaraelu.” Na faamautuina mai e Peresitene Russell M. Nelson:
“La’u autalavou pele tulagaese, na auina mai outou i le lalolagi i lenei taimi patino, lenei taimi aupito taua i le talafaasolopito o le lalolagi, e fesoasoani e faapotopoto ia Isaraelu. E leai se mea o tupu i le lalolagi i le taimi nei, e sili atu ona taua nai lo lena. E leai se isi mea e sli atu lona taunuuga. E matua leailava.
O lenei faapotopotoina e tatau ona avea o mea uma ia te oe. O le misiona lenei na auina mai ai oe i le lalolagi.”8
O le faataunuuina o lenei matafaioi o le feagaiga, o le a aumaia ai ia te oe le olioli9 ma saofaga atu i lou faaolataga faaletagata lava ia.10
Ona na toefuataiina mai le talalelei a Iesu Keriso i le lalolagi, e mafai ona e iloa o ai oe ma le mea ua faamoemoe mai e le Atua ia te oe. Tatou te patipatia le Toefuataiga lea na amataina i le togavao e lata ane i le faatoaga a le au Samita i le setete o Niu Ioka, i le 200 tausaga ua mavae, ona o le maoae ma le taua o loo i ai mo oe. O le tatalo faatauanau a Iosefa na tatalaina ai se soloaiga o faaaliga lea o loo faaauau mai i nei aso e ala i Ana Aposetolo ma perofeta. O loo taitaia e Iesu Keriso Lana Ekalesia ma Lana galuega i le lalolagi ina ia mafai ona e ausia lou gafatia faalelagi e toe mafuta ai ma lou Tama Faalelagi.