Savali faaleautaitai i le eria
O Le Faapotopotoina o Isaraelu e Moni Lava
Ua tatou aoao mai le Mataupu Faavae o le Faatuatua 10, o le faapotopotoina o Isaraelu e moni lava. Atonu la tatou te fesili ifo ia i tatou lava, o le a so tatou sao i lenei folafolaga mai le Alii? Ma, e mafai faapefea ona tatou aumaia le fanau a le Atua ia te Ia ia lagonaina le olioli e aumaia e le talalelei?
E mafai ona tatou tuuina atu avanoa mo a tatou uo ma ē pele ia i tatou ia lagonaina ai le olioli lea e suia ai olaga atoa ma faamanuiaga e faavavau pe a tatou faasoa atu ia i latou le talalelei a Iesu Keriso. E pei lava ona valaauina Mose e le Atua anamua e faapotopoto Isaraelu1, o loo taitaia foi i tatou e lo tatou perofeta, o Peresitene Russell M. Nelson, o lē ua valaauina e laveai Isaraelu faaonapo nei mai le nofopologa faaleagaga ma taitai atu i tatou agai i le faaeaga.
E mafai faapefea ona avea i tatou ma tagata auai mataalia i le galuega o le faapotopotoina i itu uma e lua o le veli i o tatou aso?
E anoanoai le faitau afe o tagata e lei faalogo lava i le talalelei a Iesu Keriso. E ono lofituina i tatou i lenei mea pe a tatou mafaufau atu i le telē moni o le tofiga e faasalalau atu le talalelei i le lalolagi uma.
I le Iakopo 5:72, ua tatou aoao ai e ui e maoae le galuega, ae o Iesu Keriso o le Alii o le Tovine ma o le a Ia le tuua lava e galulue na o i tatou. Ua tuu mai ia i tatou taitoatasi sina vaega itiiti o faatosinaga e faatino ai a tatou galuega. Pe a tatou aapa atu ma le alofa i o tatou aiga ma uo, auauna atu ma tautua i o tatou valaauga ma nuu, auai i sauniga o le malumalu, ma faasoa atu le upumoni o le toefuataiga, ua tatou auai uma—aufaatasi ma le Faaola, i le galuega maoae o le faapotopotoina.
O le mausa a lo matou aiga mo augatupulaga o le tausia o lagomeli lea e tau atu i le aoina o le meli. Mo lenei mea ina ia mataalia ma faamanuiaina, e tofu ai tagata taitoatasi o lo matou aiga ma se galuega e fai. O le tele o nei galuega atonu e laitiiti ma masalo e le taua tele ae ua mamanuina e faafetaia’ia ai taleni ma tomai o tagata taitoatasi. O fanau aupito laiti i le aiga e i ai le galuega o le tapunia o le ki uamea telē pe a tutumu fagu meli. E matua mitamita lava i latou i lea tamai tiutetauave o le galuega, ma e fiafia i latou taitoatasi i le faatauaina i lo latou matafaioi.
E pei o nei fanau tuuto, o tuuto atu o o tatou taimi ma le malosi ma le mea sili ona taua—o le auala tatou te lagonaina e uiga i le natura o lo tatou tiutetauave, e taua i le faataunuuina o le faapotopotoina ma le manuia o se punaoa taua ma suamalie.
O se isi auala faigofie ae mamana e avea ai ma ni tagata auai mataalia i le faapotopotoina, o le anapogi ma le tatalo o le tagata lava ia mo a tatou taumafaiga. Ua tatou aoao i le Alema 6:6 e faapea, “. . . sa poloaiina fanau a le Atua e tatau ona latou faapotopoto faatasi soo i latou lava, ma aufaatasi i le anapogi ma le tatalo malosi mo le manuia o agaga o i latou o e sa latou le iloa le Atua.”
Pe a tatou tatalo ma maua faamanuiaga o le anapogi faaletagata lava ia ma faaleaiga, e mafai ona tatou ole atu ina ia taitai atu [i tatou] ia i latou e le’i mauaina le talalelei. O tatalo taitasi e ofoina atu o le a tuufaatasia i se liligi tele autasi o le faatuatua lea o le a mafai ai ona oo atu le talalelei i malo uma ma o le a faaauau ai pea le vavega o le faapotopotoina.
Ou te valaaulia outou ia faia se tautinoga faaletagata lava ia ina ia avea ma se tagata auai mataalia i le faapotopotoina o Isaraelu i ni auala iti ma faigofie i totonu o tiute o faatosinaga. Sa saunoa Peresitene Nelson, “Soo se taimi lava tatou te faia ai soo se mea mo soo se tasi ua tatou fesoasoani e faapotopoto Isaraelu i itu uma e lua o le veli”2.
“Ua manaomia oe e le Alii i le taimi nei i lo se isi lava taimi ia avea ma se meafaigaluega i Ona aao. Ua i ai ia i tatou uma se sao e fai i lenei vavega . . .”3.
A tatou maua le faatuatua i le Alii o le Tovine ma galulue ma lo tatou malosi, o a tatou saofaga iti ae faifai pea o le a aumaia le vavega maoae o le faapotopotoina o fanau faapelepele a le Alii i le saogalemu o Siona.