Itulau i le lotoifale
O Se Aiga o le Faatuatua
E toafa tamalii mai le aiga e tasi o loo auauna atu o ni epikopo ma se peresitene o le paranesi i le taimi lava e tasi.
Mo le tele o tausaga o le matua sa fesiita’i ai e Uso Malo Fepuleai lona aiga i soo se mea na manaomia ai o ia. I le avea ai ma se tagata liliu mai i Le Ekalesia a Iesu Keriso o le Au Paia o Aso e Gata Ai i Samoa, sa tausi a’e ai e lenei tamā faatuatua lana fanau e toa 12 i le talalelei ma fatua’i mo i latou se talatuu o le auaunaga lē manatu faapito lea o loo faaauau pea ona mulimulitaia e lana fanau i aso nei.
Sa saunoa Peresitene Henry B. Eyring, Fesoasoani Lua i le Au Peresitene Sili:
“O le a e mauaina nisi o olioli silisili i au taumafaiga ia faia lou fale o se nofoaga o le faatuatua i le Alii o Iesu Keriso ma se nofoaga e faatumulia i le alofa, le alofa mama o Keriso. O le Toefuataiga o le talalelei na amata i se fesili faatauvaa na mafaufauina loloto i totonu o se fale faatauvaa, ma e mafai ona faaauau pea i totonu o o tatou fale taitasi a o tatou faaauau pea ona faamautuina ma faatino mataupu faavae o le talalelei iina. O lo’u faamoemoe lava lea ma lo’u manaoga sili ona loloto talu mai lo’u tamaitiiti. Ua tofu uma outou ma sina vaaiga o se aiga faapea. E toatele outou ua fatuina ni aiga faapena faatasi ma le fesoasoaniga a le Alii.”1
O Malo Fepuleai sa le’i mau’oa pe aoaoina ae sa ia le’i faatagaina lena mea e taofia o ia mai le auauna atu. I lona le gafatiaina ai o se taavale, sa ia savali ai i soo se mea sa manaomia mai ai o ia.
Sa saunoa Epikopo Fagasa Fepuleai, o se tasi o lana fanau e to’a 12, “i le asō, o loo toaaga uma o matou uso ma tuafafine ma o latou aiga i le Lotu ma o loo auauna atu ma le faatuatua i auala eseese. O o matou matua o se faataitaiga sili lea o le faatuatua, ositaulaga, ma le usiusitai.”
O le mea moni, o le toatolu o atalii o Uso Fepuleai ma le toatasi o atalii o ona atalii o loo auauna atu o ni epikopo ma peresitene o paranesi—ma sa valaauina ma vaetofiaina pe tusa o le taimi lava e tasi.
O Epikopo Fitimalo Fepuleai o loo auauna atu o se epikopo i le Uarota a Campbelltown 3 i le Siteki a Macarthur Ausetalia.
O Epikopo Fagasa Fepuleai o loo auauna atu o se epikopo o le Uarota a Pesega 4 o le Siteki a Pesega Samoa.
O Epikopo Adele Fepuleai o loo auauna atu o se epikopo o le Uarota a Ingleburn 2 o le Siteki a Liverpool Ausetalia ma o le atalii o lona uso, o Peresitene Shute Konrad Fepuleai o loo auauna atu o le peresitene o le Paranesi a Shepparton, Vitoria, Ausetalia.
O loo i ai se lagona matagofie o le felagolagoma’i ma le fesoasoania’i i totonu o le aiga o Fepuleai. A o tauivi ai tagata taitasi o le aiga e auauna atu ma le faatuatua e pei ona latou vaaia ai o faia e lo latou tama ma le tamamatua mo le tele o tausaga, latou te aapa atu i le tasi ma le isi mo fautuaga ma le lagolago e faataunuu ai o latou tiutetauave. O le aganuu o loo faafaileleina e lenei aiga lautele maoae o le ‘alofa muamua lava i le Alii ma auauna atu ia te Ia ma lo latou malosi atoa.’
O le tama o Peresitene Shute Konrad Fepuleai o se faataitaiga sili foi o auaunaga. “O lo’u tamamatua, o lo’u tama, ma uso o lo’u tama e talitutusa lava i latou i le ala latou te auauna ai,” sa ia saunoa ai, “Latou te faamautinoa lava i taimi uma e tausia i latou o siomiaina i latou i soo se ala e manaomia ai; o le auala lena sa tausi a’e ai i latou ma o le auala lena na latou tausi a’e ai a’u. E sili atu i mea uma sa latou aoao a’u ia alofa i le Atua ma Iesu Keriso ma tali i Lana valaau e “fafaga a’u mamoe.”
I le saunoa ai e fai ma sui o tagata o le aiga, sa saunoa ai ma le lotomaulalo Epikopo Fagasa Fepuleai, “Matou te talitonu o loo matou i ai faatasi i lenei galuega. E le taua po o fea matou te auauna i ai ae o le auala matou te auauna atu ai.”