Itulau i le lotoifale
Ua Taliaina e Talavou i Aukilani le Suiga
O le ta’imua fou a Tamaiti ma le Autalavou ua mulimulitaia le suiga aoao a le Ekalesia agai i tapuaiga e fai i aiga, e taulai atu i aoaoga ma le tuputupu ae patino sili atu. O lenei suiga ua mafaufau ai nisi o talavou mai le Uarota a Massey Park i le Siteki a Aukilani Niu Sila Papatoetoe e uiga i lo latou alualu i luma faaleagaga, faaleatamai, faaletino ma faaleagafesootai i lenei tausaga.
“O se tasi o a’u sini . . . o le avea lea ma tagata ola-tutoatasi faaleagaga,” sa fai mai ai Arizana, 13. “Ou te fia manao e atiae lo’u lava ia iloa e uiga i le talalelei e aunoa ma le tau uunaia e lo’u tina po o se taitai. Ou te fia manao e fuafua a’u lava ia faaiuga.”
E i ai ia Tai’ulagi (Lagi) e sefululima tausaga le matua se faamoemoega talitutusa faapena. “O la’u sini o le auai atili i le faitauina o tusitusiga paia ma i afiafi faaleaiga, ina ia mafai ona ou mauaa atili i le talalelei.”
Sa avea Arizana ma Lagi o se soa i se Tamai Misiona a le Autalavou a le siteki, lea sa la auauna atu ai i tamaitai talavou le toaaga ma valaaulia i latou i se gaoioiga a le Autalavou. Sa fesoasoani lea aafiaga i teineiti e malamalama ai i le mafuaaga e matua taua ai mo le autalavou ona i ai se molimau malosi o le talalelei. Ua i ai nei ia i latou se talisapaia sili atu mo suiga i faalapotopotoga a le Peraimeri ma le Autalavou.
“I nei aso, e toatele tamaiti e le iloa po o a mea latou te mananao e fai pe a oo ina latou matutua” sa fai mai ai Lagi, “ma e le tele so latou mauaa i mea faaleagaga, o lea ou te lagona ai ua lelei atu lenei polokalama—aemaise mo le autalavou—ona e fesoasoani tatou te mafaufau ai e uiga i mea tatou te mananao e fai i o tatou olaga.”
Na faaopoopo mai Arizana, “Ua ou lagona le fiafia o loo silafia e taitai o tatou manaoga ma o loo fetuunai i ai. Ua ou lagonaina foi le faamanuiaina tele i le iloa e taua a’u i taitai ma lo tatou Tama Faalelagi.”
Mo le auuso o Denzyl ma Daniel, o le fetuunai atu i le ta’imua fou a Tamaiti ma le Autalavou e tatau ona sologa lelei ona ua olioli lava i laua i le aoaoina o le talalelei i totonu o le aiga.
“Ou te fiafia i le auala e fai ai matou lesona i le fale,” fai mai ai Daniel e 10-tausaga-le-matua. “A ma o i le fale o lo’u tama i faaiuga o vaiaso, o lona uiga o nisi taimi ma te le [auai ai] i le lotu, a fai la matou lesona i le fale ma fai le matou Sau, Mulimuli Mai ia te Au, o le a ou aoao pea e uiga i le talalelei.”
O lona uso o Denzyl, 15, na matauina o faatosinaga mai uo i vasega na muamua atu a alii talavou i nisi taimi sa faigata ai ona auai i lesona, ae o le aoao i le fale e sili atu ona punouai ai. “Ou te iloa e tatoso lava o’u vae i taimi uma pe a fai mai tina ua oo i le taimi o le lesona, ae ou te lagona lava i taimi uma le lelei pe a uma . . . Ou te fiafia i tusitusiga paia ola (living scriptures) ma punaoa e faaaoga e tina e fesoasoani ai e aoao mai le lesona. Ou te manatu o se ala lelei lea e aoao ai i matou o tamaiti.”
O sini a Denzyl mo le 2020 e faaleagaga ma faaleagafesootai. “[Ou te manao] ia mafai ona tautala atu ma faasoa atu mea ou te aoaoina i le fale faatasi ma isi autalavou i le lotu. . . . Ou te fia maua le lototele e avea ai ma se faataitaiga i isi. Ou te iloa ou te le malosi i le faasoa atu o la’u molimau ae ou te faamoemoe i se aso o le a ou mafaia ai ona ou te alofa i le talalelei.”
O loo i ai ia Daniel le galuega faafaifeautalai i lona mafaufau. “O se tasi o a’u sini o le aoao atili lea e uiga i tala i totonu o tusitusiga paia, ma ia iloa atili Iesu Keriso. Ou te manao e faasoa atu i lo’u tama ma le aiga o lo’u tama, e le o auai i se isi lava lotu.”