Konifelenisi Lahi ʻo ʻOkatopa 2019

ʻOku haʻu kotoa e ʻū fika ʻo e peesí mei he Liahonaʻo Nōvema 2019.

Uku Loloto Angé

ʻOku ʻUhinga Ki He Hā ʻa e Hoko ko ha Ākongá?

Naʻe pehē ʻe ʻEletā Dieter F. Uchtdorf, “ʻOku ʻikai ko e tuʻunga fakaākongá ʻa hono fai ʻo e ngaahi meʻa ʻoku haohaoá ka ko hono fai ha ngaahi meʻa ʻoku leleí,” (“Ko Hoʻo Fononga Fakaofó,” 87). Naʻá ne pehē fakataha mo ha kau lea kehe ʻi he konifelenisi lahí, ko ʻetau ngaahi filí, kae ʻikai ko hotau ngaahi iví ʻokú ne fakahaaʻi ai hotau tuʻunga totonú.

“Ko e kau muimui moʻoni nai kitautolu ʻo Ia naʻá Ne foaki Hono kotoá maʻa kitautolú? … ʻOku ou kōlenga ki he tokotaha kotoa pē ʻoku fanongo mo lau e ngaahi leá ni: Kātaki fakamolemole, ʻoua naʻa fakatatali hoʻomou līʻoa kakató ke toki fakahoko ʻi hamou faingamālie ʻi ha taimi taʻeʻiloa ʻi he kahaʻú” (ʻEletā Terence M. Vinson, “Ākonga Moʻoni ʻo e Fakamoʻuí,” 11).
“Ko e kau māʻoniʻoní, ko kinautolu ia kuo nau tali e fuakava ʻo e ongoongoleleí ʻi he papitaisó pea feinga ke muimui kia Kalaisi ʻo hangē ko ʻEne kau ākongá. Ko ia ai, ʻko e fiefia ʻa e kau māʻoniʻoní’ ʻoku hangē ia ko e fiefia ʻi he hoko ʻo anga faka-Kalaisí.” (ʻEletā D. Todd Christofferson, “Ko e Fiefia ʻa e Kau Māʻoniʻoní,” 15).
“ʻOku ou fakaafeʻi kimoutolu ke mou fakatukupaaʻi hoʻomou moʻuí ki ha tuʻunga fakaākonga. Fakahoko mo tauhi ʻa e ngaahi fuakavá. Siʻaki hoʻomou ngaahi founga motuʻá ʻi he vai loloto mo hoú. Matuʻaki tanu kakato hoʻomou ngaahi meʻatau ʻo e angatuʻú, ke ʻoua naʻa toe ʻasi hake ha meʻa ki ʻolunga” (ʻEletā Dale G. Renlund, “Tuʻu Taʻeueʻia ʻia Sīsū Kalaisi,” 25).
“ʻOku ʻomi ʻe heʻetau palōmesi ko ia ke manatua maʻu pē ʻa e Fakamoʻuí ha mālohi ke moʻui ʻaki ʻa e moʻoní mo e anga māʻoniʻoní—ʻo tatau ai pē pe ʻoku tau ʻi ha feituʻu tokolahi pe ʻi hotau ngaahi potu liló, ʻa ia ʻoku ʻikai ʻilo ai ʻe ha taha ʻa ʻetau ngaahi ngāué ka ko e ʻOtuá pē” (Lisa L. Harkness, “Ko hono Fakalangilangiʻi Hono Huafá,” 61).
“ʻOku ʻikai fie maʻu ʻe he kau ākonga moʻoni ʻo Sīsū Kalaisí ha meʻa mei he ʻofa ʻoku nau maʻu ki he ʻOtuá mo ʻEne Fānaú. ʻOku tau ʻofa ʻiate kinautolu ʻoku nau fakamamahiʻi mo ʻikai saiʻia ʻiate kitautolú. Tatau pē mo kinautolu ʻoku nau manukiʻi, ngaohikovia pea feinga ke fakamamahiʻi kitautolú” (ʻEletā Dieter F. Uchtdorf, 88).

Ngaahi tā ʻo ha tangata ʻi he halá ʻa Judith Beck, ako ʻe Catherine Frost