Aiaiga Faavae, Taualumaga, Punaoa Fou

O le a siitia atu tamaiti ma le autalavou mai le vasega e tasi po o le korama i le vaitausaga e sosoo ai ia Ianuari nai lo le maea ai o o latou aso fanau.

Faamatalaga i malumalu. Na tuuina mai e le Au Peresitene Sili se faamatalaga i le aso 2 o Ianuari, 2019, fai mai se vaega: “I le aluga o nei seneturi e tele, o faamatalaga e faatatau i galuega faalemalumalu ua fetuunaia i lea taimi ma lea taimi, e aofia ai le gagana, metotia o le fausiaina, fesootaiga, ma le tausiaina o faamaumauga. Ua aoao mai perofeta o le a leai se mutaaga i ia fetuunaiga e pei ona faatonuina mai e le Alii i Ana auauna.”

Siitaga o tamaiti ma le autalavou. Ua faamaea nei e tamaiti le Peraimeri ma siitia atu le autalavou mai le vasega e tasi po o le korama i le vaitausaga e sosoo ai ia Ianuari nai lo le maea ai o o latou aso fanau. O le uiga foi o lenei mea ua mafai e le autalavou ona maua se pepa faataga e faatapulaa le faaaogaina o le malumalu mo le uluai taimi ia Ianuari o le tausaga e atoa ai le latou tai 12 tausaga ma e mafai ona faauuina alii talavou i le Peristua Arona ia Ianuari o le tausaga e atoa ai le latou tai 12 tausaga.

Isi avanoa mo le auaunaga. Ua faalauiloa mai e le Auaunaga Alofa a le AAG lana faigapaaga ma le JustServe.org e faalauiloa ai le galuega taimua o le #YouCanDoSomething, e valaaulia ai tagata e auauna atu i le lotoifale ma foai atu i galuega lelei i le lalolagi ina ia fesoasoani e suia le lalolagi. Ina ia amata, asiasi i le itulau “How to Help” i le LDSCharities.org.

Punaoa fou mo le auaunaga. O le uepisaite. O le Auaunaga Lenei (ministering.ChurchofJesusChrist.org) ua toefaafou faatasi ma tusiga ma vitio faaopoopo. O punaoa i luga o le saite e mafai ona fesoasoani i tagata faitau e aapa atu i le agaalofa, fausia sootaga anoa atili, faaleleia a latou tomai o le faalogo ma isi. O anotusi fou e aofia ai tusiga o Mataupu Faavae o Auaunaga lea ua lolomiina i mekasini Ensign ma le Liahona e fesootai i saunoaga o le konafesi aoao e uiga i le auaunaga, ma vitio e mafai ona faasoaina, upusii, ma mau.

Faamoemoe ma le faamalologa mo tagata na aafia i le sauaina. O se uepisaite fou a le Ekalesia, abuse.ChurchofJesusChrist.org, ua tuuina mai punaoa ma meafaigaluega aoga mo tagata ua aafia i le sauaina ma mo i latou o e mananao e fesoasoani e taofia le sauaina. Ua tuuina atu foi e le Au Peresitene Sili se tusi i le aso 26 o Mati, 2019, e uunaia ai taitai o le Ekalesia e aapa atu i le alofa e fesoasoani ia i latou o loo mafatia mai le sauaina. Faatasi ai ma le tusi o se punaoa o faamatalaga na toefaafou ai taiala mo le auala e fefautuaai ai e epikopo ma au peresitene o siteki tagata na aafia i le sauaina i feusuaiga ma le pe faapefea ona faatautaia faatalanoaga ma tagata o le Ekalesia. Na faalauiloa foi e le Ekalesia se vitio, “Protect the Child,” ma toefaafou tusiga o Autu o le Talalelei i le sauaina.

Vaega fou ma polokalama. O le Fuafuaga o le Suesuega o loo faaalia a le faafouga sili ona lata mai o le polokalama Gospel Library e mafai ai e oe ona seti se faatulagaga mo le suesueina o soo se anotusi e maua i le polokalama. O Sauniga ua Saunia o se meafaigaluega fou a le FamilySearch lea e faafaigofie ai le sailiga o igoa mo le malumalu, e tuuina atu ia te oe le tele o le taimi e auauna ai i lou aiga ma fiafia i faamanuiaga o le malumalu. Ma e i ai i le FamilySearch le toeitiiti atoa le tolu tasene o gaoioiga fou e faia i le aiga, e pei o le “Walk Where They Walked,” e fesoasoani ai e faaauai tagata laiti i talafaasolopito o aiga. Ua mafai ona maua gaoioiga i gagana e 10.

Lē fautuaina gaoioiga tetele. E ui e ono talafeagai le faamanatuina o aganuu ma talafaasolopito i le lotoifale, ae ua lē fautuaina nei e le Ekalesia gaoioiga tetele e pei o tauvaga a tamaitai [pageants]. E tolu tauvaga a tamaitai [pageants] o le a faaauau pea: o le Tauvaga a Tamaitai [Pageant] i Ilinoi, ISA, ma le lagolago mai le laumua o le Ekalesia; o le Tauvaga a Tamaitai [Pageant] o le Mesa i Arisona, ISA, i lalo o le taitaiga a le eria; ma le Tauvaga a Tamaitai [Pageant] Peretania, i lalo o le taitaiga a le eria, e tai fa tausaga ma fai. Ua faamutaina foi e le Ekalesia faafiafiaga faaleaganuu a le autalavou ao lei faapaiaina le malumalu ae e fiafia i faigalotu a le autalavou faatasi ma taitai o asiasi mai o le Ekalesia.