Fesoasoani Taumafaiga a Fesoasoaniga Alofa i le Faitau Afe
O se tausima’i pasi i Initonesia o loo tu i autafa o se tinā fou. Ua faamaeaina e tausima’i pasi i lenei nofoaga autu mo le fanauina [o pepe] se kosi Fesoasoani i Pepe e Manava [Helping Babies Breathe] na faatautaia e le Auaunaga Limafoai a le AAG.
O se alii talavou i Kana o loo ataata atu ina ua uma ona faatietie i se nofoa faataavalevale ma se fesoasoani mai se enisinia tau tekinolosi a le Auaunaga Limafoai a le AAG.
Na auai le faalapotopotoga a le fesoasoaniga alofa a le Ekalesia, Auaunaga Limafoai a le AAG, i ni galuega faatino e 2,885 i atunuu e 141 i le tausaga ua tuanai, galulue faatasi ma faalapotopotoga faapaaga o fesoasoaniga alofa e 1,900. Talu mai le 1985, ua tuuina atu e le Auaunaga Limafoai a le AAG le silia ma le $2.2 piliona i fesoasoaniga—e aofia ai tinoitupe, sapalai o mea e manaomia, foai atu i tulaga tau oloa i atunuu ma teritori e 197, e tusa ai ma lipoti faaletausaga 2018 a le Auaunaga Limafoai a le AAG lea na faasilasila mai i le aso 19 o Fepuari, 2019.
Ua faaosofia taumafaiga o fesoasoaniga alofa a le Ekalesia e ala i le agaalofa ma le alofa mo fanau uma a le Atua ma faamamafa atu nei mataupu faavae taiala—tausiga o i latou e matuai manaomia le fesoasoani, uunaia le ola tutoatasi, ma le faalauiloaina o tulaga faavolenitia ma auaunaga. O nei mataupu faavae, e faavae i luga o le faatuatua ia Iesu Keriso, e faamalosia tagata taitoatasi ma aiga e tusa lava po o le a le ituaiga tagata, tapuaiga, po o le tagatanuu.
E fesoasoani le Ekalesia i le tali atu i faalavelave faafuasei (e aofia ai taumafaiga faavolenitia), auaunaga mo e leaga le vaai, tausiga o tinā ma pepe faatoa fananau mai, vai mama ma tumama, tuipuipui, faaavanoaina o nofoa faataavalevale ma mea e fesoasoani e savavali ai, fesoasoani i tagata e saunia meaai mo i latou lava e faaaoga ai vaifofo ma punaoa i le lotoifale, ma fesoasoaniga vave ma mo se taimi umi mo tagata sulufai. Na auai foi le Ekalesia i galuega faatino i nuu i le lotoifale i setete e 43 ma itumalo i le I.S. ma Kanata e fesoasoani i e leai ni fale, toe faatulagaina o tagata sulufai, ma isi mea e manaomia.
“Matou te lagona le agaga faafetai tele ma le fesootaiga ma tagata uma taitoatasi o e na saofagā i le manuia o le galuega fesoasoaniga alofa i le 2018,” na saunoa ai Sister Sharon Eubank, peresitene o le Auaunaga Limafoai a le AAG ma le Fesoasoani Muamua i le Au Peresitene Aoao o le Aualofa. Fai ma o ia o le lipoti e fai ma sui o le agalelei o le faitau fia sefulu ma afe o tagata.