Mark L. Pace
Peresitene Aoao o le Aoga Sa
Faatasi ai ma se faatalanoaga ua uma ona seti mo le mea o le a avea ma se valaauga e auauna atu o se Peresitene Aoao fou o le Aoga Sa, na tuuina atu ai e Uso Mark L. Pace se tautinoga ma le agaga tatalo.
“Tama Faalelagi, po o le a lava Lou finagalo mo a’u e fai, ou te fiafia e fai,” na ia tatalo ai. “Ia silafia ua ou tautino atoa atu i ai.”
Fai mai Uso Pace o lona manaoga autu i lona valaauga fou o le faamanuia atu, lagolago, ma uunaia tagata o le Ekalesia. “Matou te mananao e tuuina atu mea uma ua ia i matou,” na ia fai ai e uiga i le Au Peresitene Aoao fou o le Aoga Sa.
Sa soifua mai Mark Leonard Pace i le aso 1 o Ianuari, 1957, i Buenos Aires, Atenitina, ia Lorin Nelson ma Marylynn Haymore Pace. I lena taimi, sa pulefaamalumalu le tamā o Uso Pace i le Misiona a Atenitina.
Sa feiloai atu Uso Pace i lona toalua o le lumanai, o Anne Marie Langeland, ao avea le toalua ia o ni uo ‘aoga i le vasega lua i le Aai o Sate Leki, Iuta, ISA. Mulimuli ane, ao auai i ni aoga maualuluga eseese i le aai, sa la toe fesootai i le taimi o se gaoioiga tuufaatasi a le seminare. Sa la fetusiai i le tasi ma le isi mo nai tausaga na sosoo ai ao malaga faatasi atu [Anne] ma lona aiga i Nouei, lea na pulefaamalumalu ai lona tamā i le Misiona a Nouei Oslo, ao auauna atu Uso Pace i le Misiona i Sepania Madrid. Sa la faaipoipo i le Malumalu o Sate Leki i le aso 21 o Novema, 1978, ma o ni matua o se fanau e toafitu.
Sa faauu Uso Pace mai le Iunivesite o Iuta ma se faailoga o le tagata malaga i mataupu tau tamaoaiga i le 1980, ma se faailoga o le matuaofaiva i pulega faapisinisi mai le Aoga Faapisinisi a Harvard i le 1982. Ina ua mavae sina taimi na faigaluega ai i le Price Waterhouse i le Aai o Niu Ioka, sa ia auai atu i le Kamupani a Boyer i le Aai o Sate Leki, galue ai i pisinisi mo le atinaega o fanua faatau mai le 1984 i le 2012. I le mavae ai o se tofiga e tolu tausaga o se peresitene o le Misiona a Sepania Barcelona, sa ia auai i le Kamupani a Gardner i le 2015, faiga o atinaega o fanua faatau.
I lena taimi e uiga i lona valaauga fou, sa auauna atu Uso Pace o se Fitugafulu Eria. O ona valaauga o le Ekalesia sa i ai e aofia ai le fesoasoani i se au peresitene o se siteki, fautua maualuga, epikopo, fesoasoani i se au epikopo, peresitene o le korama a toeaina, peresitene o Alii Talavou a le uarota, ma se Taitai sikauti.