Elder Hans T. Boom
Fitugafulu o le Pulega Aoao
Ina ua valu tausaga o Elder Hans T. Boom, na masii atu lona aiga mai Amsterdam i le aai o Breda, o loo i le vaega i saute o Netalani. O lona tamā, o se alii Take na soifua a’e i Initonesia ma o se tagata liliu mai i le Ekalesia, sa [ia] lagona e tatau ona tuua e lona aiga le aai tele ma toefoi atu i tupuaga a ona augatama.
O le taimi na faaaluina e Elder Boom ma lona aiga i lena tamai paranesi na faamaonia le avea ai ma se faavae o aoaoga o le auaunaga faaleEkalesia—auaunaga ua ia tuuina atu ai lona ola atoa ma o le a faaauau pea ona tuuina atu i lenei valaauga fou o se Fitugafulu o le Pulega Aoao.
“O mea uma ua ou avea ai ma mea uma ua ou maua ou te nofo aitalafu ai i le Alii ma o avanoa ua Ia tuuina mai ia te au e aoao ai ma tuputupu ae ai,” na ia saunoa mai ai.
Na soifua mai i le aso 13 o Iulai, 1963, i Amsterdam ia Hans ma Ankie Boom, o Hans Theodorus Boom o le ulumatua lona lua i le fanau e toafa a le au Booms. Na aoao atu e ona matua le talalelei i totonu o le latou aiga ma uunaia le la fanau ina ia galulue malosi.
I le 18 o tausaga, na auauna atu ai Elder Boom i le Misiona a Egelani Lonetona i Sasae. I ni nai masina talu ona maea lana misiona, sa ia feiloai ai i lona toalua i le lumanai, o Ariena Johanna “Marjan” Broekzitter, i se konafesi mo talavou matutua o le Ekalesia. Na faaipoipo le ulugalii i le aso 27 o Iulai, 1984, i Rhoon, Netalani, ma na faamauina i le tolu aso mulimuli ane i le Malumalu o Lonetona Egelani. E toatolu o la alo tama.
Sa galue Elder Boom o se failautusi i le puleaoga o le Kolisi a Markenhage ma o se tagata e tofia tagata faigaluega mo le Franchise Development Benelux. I le taimi o lona valaauga o se Pulega Aoao, sa galue o ia o se pule o fefaatauaiga mo le MacLean Agencies.
Na auauna atu Elder Boom o se Fitugafulu Eria, fesoasoani i se au peresitene o se siteki, peresitene o Alii Talavou o se siteki, peresitene o se paranesi, ma se fesoasoani i se au peresitene o se paranesi. I le taimi o lona valaauga, na auauna atu o ia o se faiaoga inisitituti ma se tagata faisauniga o le malumalu i Le Malumalu o Hague Netherlands.