Elder Peter M. Johnson
Fitugafulu o le Pulega Aoao
I le mavae ai ona talia e Peter M. Johnson, o le atalii o se supavaisa o meatotino ma se avetaavale laitiiti, se sikolasipi i le Iunivesite o Polika Iaga–Hawaii, na ia maua o ia lava o tu i luma o se faiaoga inisitituti.
“A [le] o lou auai i le Ekalesia i le auala sa’o, po o le a fai sina umi mo oe,” na ta’u atu ai e le faiaoga.
Na sa’o lava le faiaoga. I le silia ma le tausaga mulimuli ane, na “anapogi ai ma tatalo [Peter] mo se tali.” Na papatisoina o ia i le aso 16 o Aokuso, 1986.
O Peter Matthew Johnson, o le lona fa o le fanau e toalima na soifua mai ia McKinley Johnson ma Geneva Paris Long i le aso 29 o Novema, 1966, i Queens, Niu Ioka, ISA.
Na tete’a ona matua ina ua 11 ona tausaga, ma sa siitia atu lona tinā i Hawaii. Tasi le tausaga mulimuli ane, na auai atu ai Peter i le Malo o Isalama ma avea ma se Mosalemi. Na tuuina atu e lenei faalapotopotoga le taiala ma le lagolago ma na saunia ai o ia e opomauina le talalelei a Iesu Keriso.
I le 15 o ona tausaga, na siitia atu ai Peter i Hawaii ma nonofo faatasi ai ma lona tinā O iina, na ia iloa ai taaloga—aemaise o le pasiketipolo—ma amata galue ai e agai i le aotauina i le iunivesite, [avea] ma tagata o Le Ekalesia a Iesu Keriso o le Au Paia o Aso e Gata Ai, auauna atu faafaifeautalai i le Misiona a Alapama Birmingham, ma faaipoipo atu i le malumalu ia Stephanie Lyn Chadwick i le 1990. O le ulugalii, lea na feiloai a o taaalo pasiketipolo i le Iunivesite o Iuta i Saute, e toafa o la alo.
“Ua ou i ai iinei e auauna atu i le Alii,” o le saunoaga lea a Elder Johnson i lona valaauga i le Fitugafulu. “Po o le a lava le tagatanuu po o le aganuu po o le nofoaga ou te sau ai, o lo’u tofiga o le auauna atu i le Alii ma lo’u loto atoa, mafaufau, ma le malosi ma ia fai ma sui o le Alii i Ona tagata. E alofa le Faaola ia i tatou uma. O i tatou o atalii ma afafine o le Atua.”
Na maua e Elder Johnson ni faailoga o le tagata malaga ma le matua o faiva i le tausitusi mai le Iunivesite o Saute Iuta ma se PhD i le tausitusi mai le Iunivesite o le Setete o Arisona. Sa ia galue o se polofesa faiaoga i le BYU–Hawaii, polofesa lagolago i le Iunivesite o Polika Iaga, ma polofesa faiaoga i le Iunivesite o Alapama. Na ia auauna atu o se Fitugafulu Eria, peresitene o se siteki, failautusi o mea tautupe a se siteki, ma se taitai misiona o se uarota.