O Le Mana o le Faatuatua Lagolago
E ala i le siiina o lou lima e lagolagoina, ua e osia se folafolaga ma le Atua, o lē āna auauna nei, o le a e lagolagoina i latou.
O le tele o taimi ou te faalogo ai i taitai perisitua o tuuina atu le faafetai mo le faatuatua lagolago o i latou latou te auauna atu i ai. Mai le lagona i o latou siufofoga, e te iloa ai e loloto ma faamaoni lo latou agaga faafetai. O lo’u faamoemoega i le asō o le faailoa atu o le talisapaia e le Alii o lo outou lagolagoina o Ana auauna i Lana Ekalesia. Ma ia uunaia ai foi outou e faaaoga ma tuputupu a’e i lena mana e lagolagoina ai isi i lou faatuatua.
Ae e te le’i fanau mai, sa e faaalia lena mana. Toe mafaufau i tua i mea tatou te iloa e uiga i le lalolagi o agaga ae tatou te lei fananau mai. Na tuuina atu e lo tatou Tama Faalelagi se fuafuaga mo Ana fanau. Sa tatou i ai iina. O Lusifelo, lo tatou uso agaga, na tetee i le fuafuaga lea o le a aumaia ia i tatou le saolotoga e filifili ai. O Ieova, o le Alo Pele o le Tama Faalelagi, na lagolagoina le fuafuaga. Na taitaiina e Lusifelo se fouvalega. Na manumalo le siufofoga lagolago o Ieova, ma sa Ia ofofua atu e avea ma o tatou Faaola.
O lou i ai i lenei olaga faitino ua faamautinoa mai ai ia i matou na e lagolagoina le Tama ma le Faaola. Na manaomia ai le faatuatua ia Iesu Keriso e lagolago ai le fuafuaga o le fiafia ma le tulaga o Iesu Keriso i le [fuafuaga] i le taimi sa itiiti ai lava ni mea na e iloaina e uiga i luitau o le a fetaiai ma oe i le olaga faitino.
O lou faatuatua e lagolagoina auauna a le Atua na i ai lava i le fatu o lou fiafia i lenei foi olaga. Ina ua e taliaina se lu’i a se faifeautalai e tatalo ia iloa ai o le Tusi a Mamona o le afioga a le Atua, na e maua le faatuatua e lagolago ai se auauna a le Alii. Ina ua e taliaina le valaaulia e papatiso, na e lagolagoina se auauna faatauvaa a le Alii.
Ina ua e faatagaina se tasi e tuu [ona] lima i luga o lou ulu ma fai atu, “Talia le Agaga Paia,” na e lagolagoina o ia o sē umia le Perisitua Mekisateko.
Talu mai lena aso, ua e lagolagoina, e ala i le auauna atu faamaoni, i tagata taitasi o ē na faaee atua le perisitua i ou luga ma i latou taitoatasi o ē na faauuina oe i se tofi i lena perisitua.
I le amataga o lou aafiaga faaleperisitua, o le lagolagoina taitasi o se gaoioiga faigofie lea o le faatuatuaina o se auauna a le Atua. I le taimi nei, o le toatele o outou ua siitia atu i se tulaga lea e manaomia ai nisi mea se tele i le lagolagoina.
E te filifili pe lagolagoina tagata uma ua valaauina e le Alii—i soo se mea lava ua valaauina i ai latou e le Alii. O lena filifiliga e tupu i konafesi i le lalolagi atoa. Ua tupu i lenei [konafesi]. I ia ituaiga o sauniga, o suafa o tamalii ma tamaitai—o auauna a le Atua—e tolaulau atu, ma e valaaulia oe e sii lou lima e lagolagoina. E mafai ona e taofia lau palota lagolago, pe e te tautino mai lou faatuatua lagolago. E ala i le siiina o lou lima e lagolagoina, ua e faia ai se folafolaga. Ua e osia se folafolaga ma le Atua, o lē āna auauna nei, o le a e lagolagoina i latou.
O nei tagata e le atoatoa, e pei lava o oe. O le tausia o au folafolaga o le a manaomia ai le faatuatua lē maluelue faapea na valaauina i latou e le Alii. O le tausia o na folafolaga o le a aumai ai foi le fiafia e faavavau. O le lē tausiaina o i latou o le a aumaia ai le faanoanoa ia te oe ma i latou e te alofa i ai—ma e oo lava i le toesea o mea e le mafai e lou malosi ona mafaufauina.
Atonu na fesiligia oe, pe o le a fesiligia, pe e te lagolagoina lou epikopo, peresitene o le siteki, le au Pulega Aoao, ma Taitai Aoao o le Ekalesia. Atonu e tupu a o talosagaina oe e lagolagoina au ofisa ma taitai i se konafesi. O nisi taimi atonu o se faatalanoaga ma se epikopo po o le peresitene o le siteki.
O la’u fautuaga ia e fai muamua na fesili ia te oe lava ia, ma mafaufau ma le faaeteete ma le agaga tatalo. A o e faia, atonu e te toe tepa i tua i ou manatu, o upu, ma galuega faato’a uma a na fai. Taumafai ia manatua ma faaupu tali o le a e tuuina atu pe a faatalanoaina oe e le Alii, i le iloaina o le a Ia faia i se aso. E mafai ona e saunia e ala i le fesili ifo ia te oe lava ia i fesili faapenei:
-
Pe sa ou mafaufau pe na talanoa i ni vaivaiga faaletagata o tagata na ou tautino atu e lagolagoina?
-
Pe sa ou vaavaai mo se faamaoniga o loo taitaiina i latou e le Alii?
-
Pe sa ou mulimuli ma le faaeteete ma le faamaoni i la latou taitaiga?
-
Pe sa ou talanoa e uiga i le faamaoniga na ou vaaia o i latou o auauna a le Atua?
-
O o’u tatalo soo ea mo i latou [ma ta’u o latou] igoa faatasi ai ma lagona o le alofa?
O na fesili o le a taitai atu ai le toatele o i tatou i se lagona o le lē toafimalie ma se manaʻoga ia salamō. Ua poloaiina i tatou e le Atua e aua le faamasino atu i isi ma le amioletonu, ae o le faatinoga, tatou te iloa le faigata o le aloese mai lena mea. Toetoe lava o mea uma tatou te faia e galulue faatasi ai ma tagata e taitaiina atu lava i tatou i le iloiloina o i latou. Ma e toetoe lava o vaega uma o o tatou olaga, tatou te faatusatusa ai i tatou i isi. Atonu tatou te faia mo le tele o mafuaaga, o nisi e talafeagai, ae e masani lava ona taitai atu ai i tatou i le faitio.
Na tuuina mai e Peresitene George Q. Cannon se lapataiga lea ou te tuuina atu ia te outou e fai ma a’u lava [lapataiga]. Ou te talitonu sa ia saunoa i le upumoni: “Ua filifilia e le Atua Ana auauna. Na fetalai mai o Ia o Lana aia tatau o le ta’usalaina o i latou, pe a manaomia le ta’usalaga. Na te le’i tuuina mai ia i tatou taitoatasi ia faitio ai ma ta’usalaina ai i latou. E leai se tagata, po o le a lava le malosi o i ai lona faatuatua, po o le a lava le maualuga o le Perisitua, e mafai ona tautala leaga e uiga i ē ua faauuina a le Alii ma saili masei i le pule a le Atua i luga o le fogaeleele e aunoa ma le faatupuina o Lona lē fiafia. O le a aluese le Agaga Paia mai sea tagata, ma o le a alu atu o ia i le pogisa. O sea tulaga, e te le o iloa ea le taua o le tatau ona tatou faaeteete?”1
O la’u matauga o tagata o le Ekalesia i le lalolagi atoa e masani lava ona faamaoni le tasi i le isi faapea ma i latou o ē pulefaamalumalu ia i latou. Peitai, o loo i ai ni faaleleiga e mafai ma e tatau ona tatou faia. E mafai ona tatou tutulai maualuluga atu i lo tatou malosi e lagolago ai le tasi ma le isi. O le a manaomia ai le faatuatua ma taumafaiga. O fautuaga nei e fa ou te tuuina atu mo i tatou ia galulue ai i lenei konafesi.
-
E mafai ona tatou faailoaina ni faatinoga faapitoa ia na fautua mai e failauga ma ia amata i le asō ona faataunuuina. A tatou faia, o le a faateleina lo tatou mana e lagolagoina ai i latou.
-
E mafai ona tatou tatalo mo i latou a o latou saunoa mai ina ia molioo e le Agaga Paia a latou upu i loto o tagata faapitoa tatou te alolofa i ai. A tatou iloaina mulimuli ane na taliina a tatou tatalo, o le a faateleina lo tatou mana e lagolago ai na taitai.
-
E mafai ona tatou tatalo ina ia faamanuiaina ma faalauteleina ni failauga faapitoa a o latou tuuina maia a latou savali. A tatou vaaia ua faalauteleina i latou, o le a tatou tuputupu a’e i lo tatou faatuatua e lagolagoina i latou, ma o le a tumau.
-
E mafai ona tatou faalogo i savali mai failauga ia e sau o se tali ia tatou tatalo faaletagata lava ia mo se fesoasoani. A oo mai ni tali, ma o le a oo mai lava, o le a tatou tuputupu a’e i lo tatou faatuatua e lagolagoina ai auauna uma a le Alii.
E le gata i le faaleleia o le lagolagoina o i latou o ē o auauna atu i le Ekalesia, ae o le a tatou iloaina o loo i ai se isi nofoaga lea e mafai ai ona tatou faateleina sea mana. O iina, e mafai ona aumaia faamanuiaga sili atu ia i tatou. O loo i le fale ma le aiga.
Ou te talanoa atu i le talavou laitiiti o umia le perisitua o loo nofo i le fale ma lona tamā. Se’i o’u tau atu ia te oe mai lo’u lava aafiaga le uiga o le lagonaina e se tama o lou faatuatua lagolago. Atonu e foliga toafimalie o ia ia te oe. Ae o loo ia feagai ma luitau sili atu nai lo mea o loo e iloaina. I nisi taimi e le mafai ona ia iloa atu le ala i faafitauli i ona luma.
O lou faamemelo mo ia o le a i ai sina fesoasoani mo ia. O lou alofa mo ia o le a fesoasoani atili. Ae o le mea o le a sili ona fesoasoani o upu faamaoni e pei o upu nei: “Tama, sa ou tatalo mo oe, ma sa ou lagona o le a fesoasoani le Alii ia te oe. O le a lelei mea uma. Ou te iloa o le a lelei.”
O upu e pei o na upu e i ai foi le mana i le isi itu, tamā i le atalii. Pe a fai e se atalii se mea sese ogaoga, masalo i se tulaga faaleagaga, atonu na te lagonaina ua ia toilalo. I le avea ai ma ona tamā, i lena lava taimi, atonu e te te’i pe a, uma ona e tatalo ia iloa le mea e fai, o le a tuu e le Agaga Paia upu i lou gutu: “Atalii, ou te lagolagoina oe, po o le a lava. E alofa le Alii ia te oe. Faatasi ai ma Lana fesoasoani, e mafai ona e toe foi mai. Ou te iloa o le a e mafaia ma o le a e faia. Ou te alofa ia te oe.”
I le korama a perisitua ma i le aiga, o le faateleina o le faatuatua e lagolago ai le tasi ma le isi o le ala lea e faatu ai Siona lea e finagalo le Alii tatou te fausiaina. Faatasi ai ma Lana fesoasoani, tatou te mafaia ai ma o le a tatou faia lava. O le a manaomia ai le aoaoina ia alofa atu i le Alii ma o tatou loto atoa, mafaufau, manatu, ma le malosi atoa ma alofa le tasi i le isi e pei ona tatou alolofa ia i tatou lava.
A o tatou tuputupu a’e i lena alofa mama o Keriso, o le a faamalūlūina o tatou loto. O le a faalotomaualaloina i tatou e lena alofa ma taitai i tatou ia salamo. O le a tuputupu a’e lo tatou talitonuga i le Alii ma isi. Ona tatou agai atu lea i le avea ma ē tasi [le loto], e pei ona folafola mai le Alii tatou te mafaia.2
Ou te molimau atu e silafia ma alofa le Tama Faalelagi ia te oe. O Iesu o le Keriso soifua. O Lana Ekalesia lenei. Ua tatou umia Lana perisitua. O le a Ia faamamaluina a tatou taumafaiga e tuputupu a’e i lo tatou mana e faaaoga ma lagolagoina ai le tasi ma le isi. Ou te molimau atu ai i le suafa paia o Iesu Keriso, amene.