Kon Nahigugma Kamo Kanako
Ang 2019 nga tinuig nga tema sa kabatan-onan mao ang usa ka tawag sa paglihok—usa ka personal nga imbitasyon gikan sa atong Manluluwas. Hingpit ba kamong mouyon? Nahigugma ba kamo Kaniya? Andam ba kamong mosunod sa Iyang mga tunob?
Ang atong Manluluwas nga si Jesukristo mihimo og butang alang kanato nga dili nato mahimo sa atong kaugalingon. Ug unsa ang Iyang gipangayo agig balus niini? Nangayo Siya nga tumanon nato ang Iyang mga sugo aron kita mapanalanginan nga makabaton kanunay sa Iyang Espiritu nga magauban kanato (tan-awa sa Moroni 4:3).
Ang mga sugo mao ang gasa sa gugma. Ang Manluluwas yanong miingon, “Kon nahigugma kamo kanako, inyong pagatumanon ang akong mga sugo,” apan ngano? Tungod kay Siya nahigugma KANINYO! Siya gusto nga kamo magmalipayon. Siya gusto nga ang inyong kinabuhi mapuno sa kalipay ug walay katapusan nga mga posibilidad. Siya gusto nga kamo luwas ug mapanalipdan gikan sa mga dautan sa kalibutan. Siya gusto nga mobu-bu og mga panalangin diha kaninyo nga daghan kaayo “nga walay lawak nga igo sa pagdawat niini.” (3 Nephi 24:10). Siya gusto nga kamo mobalik ug mopuyo uban Kaniya pag-usab ug mag-aambit sa tanan nga gisaad nga mga panalangin sa Langitnong Amahan.
Hinumdumi kanunay kon unsa ka dako ang gugma sa Langitnong Amahan sa Iyang mga anak. Siya adunay hingpit nga gugma alang kaninyo. Mapakita ninyo ang inyong gugma alang Kaniya pinaagi sa pagtuman sa Iyang mga sugo. Ang inyong matarung nga mga lihok makahatag og daghang mga panalangin kaninyo ug ngadto niadtong anaa sa inyong palibut.
Sama sa gisulti sa atong propeta, si Presidente Russell M. Nelson, nga miingon: “Nagkinahanglan kami nga moapil kamo kanamo niini nga grupo sa kabatan-onan sa Ginoo. Lahi gayud kini kon wala kamo!” Gidapit kamo Niya sa “pagbarug [ug] magpakalahi gikan sa kalibutan” pinaagi sa pagsunod sa mga sumbanan diha sa Alang sa Kalig-on sa Kabatan-onan ug pinaagi sa pagtuman sa mga sugo—nga “makita, madungog, molihok, ug magsinina nga sama sa usa ka tinuod nga disipulo ni Jesukristo.” (“Paglaum sa Israel” [tibuok kalibutan nga debosyonal sa kabatan-onan, Hunyo 3, 2018], 8, HopeOfIsrael.lds.org).
Samtang maningkamot kamo sa pagsunod sa Ginoo ug sa Iyang mga propeta, ang gahum sa Espiritu Santo mopuno kaninyo sa gugma sa Dios ug mopamatuod nganha kaninyo sa inyong balaan nga pagkatawo isip anak nga lalaki ug anak nga babaye sa Dios. Kadto nga mga panalangin motubo samtang maningkamot kamo nga magpuyo nga matarung. Ang Ginoo ug ang propeta misalig kaninyo. Nahigugma sila kaninyo. Kami mosaad nga ang dakong pagsalig, kasiguroan sa kaugalingon, ug kahupayan moabut kon kamo mosunod ug motuman sa mga sugo.