Mga Tanom sa Pagpamatuod
Unsay buot ipasabut sa pag-angkon og pagpamatuod?
Si Elisa misulod sa Primary ug milingkod tupad sa iyang higala nga si Armando.
“Maayong pag-abot!” Miingon si Sister Russo. “Sugdan nato sa usa ka kanta.”
Si Elisa mikanta uban sa iyang klase. “Pagtuo samas liso: I’gtanum motubo” (Songbook sa mga Bata, 50).
Si Sister Russo miapud-apod og mga papel ug mga krayola. “Hunahunaa unsay atong gikanta,” miingon siya. “Kon motanom kamo sa inyong binhi sa pagtuo, motubo kini ngadto sa usa ka pagpamatuod. Karon drowinga kon unsay hitsura sa inyong pagpamatuod kon kini usa ka tanom.”
Gitutukan ni Elisa ang iyang blangko nga papel. Ang tanan nagsugod sa pagdrowing. Si Elisa mipasiplat sa drowing ni Armando. Ang iyang tanom adunay tul-id nga punoan nga dunay daghang dahon. Morag sangig nga nagtubo sa balkonahe sa iyang apartment. Tingali mao usab ang dagway sa iyang pagpamatuod! Gigunitan niya ang iyang krayola ug nagdrowing sama sa kang Armando.
“Palihug ablihi ang inyong mga kasulatan ngadto sa Alma 32,” miingon si Sister Russo.
Gibasa nila ang mahitungod sa pagtanom og usa ka binhi diha sa inyong kasingkasing ug mobati niini nga nagtubo. Gitan-aw ni Elisa ang iyang tanom sa pagpamatuod. Siya ba adunay pagpamatuod? Unsa may gipasabut niana? Gusto siyang mangutana apan mibati og kaulaw.
Sa dihang nahuman na ang klase, si Sister Russo miduol ni Elisa.
“Ingon og wala ka mahimutang. Naa bay problema?” Nangutana si Sister Ruso.
Gitan-aw ni Elisa ang iyang drowing pag-usab. “Wala ko makasiguro kon duna ba koy pagpamatuod. Wala gyud ko makahibalo unsay gipasabut niana.”
Si Sister Russo mabinationg mipahiyom ni Elisa. “OK ra. Nahinumdom ka ba unsa ang hugot nga pagtuo?”
Miyango si Elisa. “Pagtuo sa butang nga wala nato makita?”
“Sakto kana!” Miingon si Sister Russo. “Unsa ang pipila ka butang nga imong gituohan?”
Sayon kana nga pangutana. “Nagtuo ko sa Langitnong Amahan ug ni Jesukristo. Nasayud ko nga nahigugma Sila kanako.”
Mipahiyom si Sister Russo. “Bag-o lang gyud nimong gipakigbahin ang imong pagpamatuod! Ang usa ka pagpamatuod mao ang unsay imong gituohan mahitungod sa ebanghelyo.”
Naghunahuna si Elisa mahitungod niini. “Kon mao duna nakoy pagpamatuod?”
“Oo!” Gikuha ni Sister Russo ang iyang mga kasulatan. “Ug hinumdumi unsay atong gibasa karon? Imong alimahan ang binhi pinaagi sa pagbuhat sa mga butang sama sa pagsimba. Dayon ang imong pagpamatuod magkalig-on.”
Gibati ni Elisa nga nakasabut siya. “Mao nga gidrowing nato ang atong mga pagpamatuod sama sa mga tanom?”
“Sakto. Tungod kay ang mga tanom motubo sa hinay-hinay,” miingon si Sister Russo. “Mao usab ang mga pagpamatuod. Kasagaran dili kini moabut diha-diha. Motubo kini sa hinay-hinay.”
Mas nindot ang gibati ni Elisa sa tanom nga iyang gidrowing. Sa dihang nakauli na siya, misulat siya “Ang Akong Tanom sa Pagpamatuod” tupad sa iyang drowing. Gibitay niya sa iyang higdaanan. Nasayud siya nga ang iyang pagpamatuod nagtubo na. Ug gusto niya nga magpadayon sa pagsunod ni Jesus aron kini mas modako pa!